كنت كاتبه بوست عن اسمة العيد قبل غير لاحظت مشاء الله نسبة دخول هالبوست كبيرة والكل ولهان على ايام اول وطرت على بالي فكره
ليش احنا نصور ؟؟ اكيد علشان نوثق ايامنا وذكرياتنا الحلوة صح ؟! شفايدة الصور واهي محطوطة بألبومات ومحد يدري عنها
قلت بطلع لي جم البوم واحط لكم بعض الصور الخاصة بأيام الثيمانينات واسولف من الذكريات الخاصة واكيد في اشياء بهالصور بتذكركم حتى انتوا في بعض الاشياء اللي كل الكويتيين يسوونها او عندهم اياها بذيج الفتره الحلوة
شفتوا الحصالة بالصورة الاولى ؟ ماعتقد اكو بنت او ولد ماكان عنده هالحصاله العجيبة بألوانها الوردي والازرق والقفل السكة اللي نقص على روحنا انه قفل لوول بس والله كنا نيمع فيها شحليلنا انا محتفظة فيها لي الحين بس القفل مادري وينه ضاع
الصورة الثانيه ماتذكر وين بالضبط بس كان في شي بالكويت مسوينه علشان مجلس التعاون ومزهلقينا ومسنعينا ومودينا الروضة انا اللي لابسه ازرق 😀
ياحلو حفلات اول صج تونس والاهالي مايترددون لحظة بأن بناتهم يشتركون 
هالدراريع اكو بنت مالبستهم ؟؟ كاشخين فيهم بالبيت كل الالوااااان لا تقولون ما مروا عليكم لوول
ياحلو كيك وبوفيهات اول شي بسيط .. الكيكة المفروض انها تكرمون جلب او خروف بس هذا اللي طلع معاهم وكنااا يانين عليها 
اكشخ خ خ خ سنافر اول غير ههههههه هذا اعتقد بوحده من الحفلات الكشخه للاطفال بالفنادق
صج الزمن تغير شفتوا كاميرة الفيديوو قبل شكبرها وثقيييييله وداخلها شريط بيتاميكس الله يذكره بالخير .. على فكره انا ليلحين عندي فيديو واشرطة بيتاميكس ترااااث لوول
زولية أم كلثوم كشخه ايام الثمانينات خخخخخ
يا حلوك يا بيبسي الثمانينات مدربح شزينه
حتى الهدايا كانت غير خصوصا اول الثمانينات وكانت الدولز كبااااار كل وحده عروستها اطول منها 
شفتوا هالدنيا والعفسة كنت توني مسوية عمليه اللوز ومابقى شي خاص بالباربي ماتدلعت وخذيته 
هني بالحج اعتقد شكوو موديني مادري نزقه .. اللي عرفته انه يدتي وامي الله يرحمها مارضوا يخلوني بالكويت لأني وايد متعلقة فيهم فرحت وصرت دلوعة الحمله 
شفتوا النزاكة ايام الثمانينات ترى كشخه حتى احنا ديزني وسوالف
كريستيان ديور كان عامل عمايله من ذيج الايام ومتسيد كل الماركات 
منو الكسلانه اللي مالبست شريطة امتياز الوردية ؟؟؟ ترى كانت هالشريطة البسيطة قمة الدافع لنا بالدراسه علشان نكشخ فيها ونفرح اهلنا .. يازين بساطتنا اول
شي لابد منه الحنـــــــــــــــة وااااي ما احبها لا بالايد ولا بالراس بس كان غصب شوفوا اخيتي وعليه ملغوصين راسها فيها ومربطة بغترة الوالد لوول وعليه
بس تبون الصج شعورنا كانت تينن من كثر الشعر وكثافته .. مو بنات الحين جيل الاكستنشن 
الوقفة خطيرة .. الظاهر اخيتي بتحر رفيجاتها لووول كشخه لبس الزهرات ايام اول .. الحين في زهرات ومرشدات ؟؟
تذكرون قبل لما نروح الحفلات في النوادي .. نادي المنقف ونادي الشعب وغيرهم
كانوا اييبون مطربين وهدايا حده كان وناسه ويمعه وصفقه ولوية 
تلفون اول بو صماخ .. الكشخه بو دقم هذا يديد واللي فيه ارقام ويدور هذا اقدم .. اما الالوان فذيج الايام هبه الشينية والمائية والخشبيه يميع
هدايا المناسبات شي بسيط وتغليف ابسط مو الحين تغليف الهديه اغلى من الهديه نفسها
سر من اسراري واحلى شي عندي بالدنيا ذيج الايام مكتبتي
وااااي كنت احبها ولي الحين موجودة في بيت يدتي مثل ما اهي بس بدون صوري شلتهم خخخخخ
اتذكر كانت من محل العبدالوهاب انا واختي نفس الشي بس لعبنا بحسبتهم المكاتب صورنا وصور ممثلين وستيكرزات وناسة 🙂 لاحظوا الكيت كات بالجيس خخخخخ
هالساعه كانت هبة عصرنا .. شكبر المينا وسيورها تتغير نسيت شنو ماركتها بس ترى كانت حلوة وكشخه
اكيد كلكم عندكم هالسيارة العجيبة بالبيت .. كنا نتفقص فيها انا واختي 
بالعروس لازم سلة الورد وماتوصل العروس الا واهي مسكينه معفوسة من هالوريدات لوول
اذا حبيتوا البوست بدور صور اكثر عن هالفترة اللي ودي يرد فيني الزمن قري واعيشها مره ثانيه
حق كل المدونات اللي عاشوا هالمرحلة TAG وودي اسوي
شاركونا بصوركم خلونا نعيش هالذكريات الحلوة وطلعوا المستخبي من الالبومات المغبره اللي محد يشوفها بعد كاميرات الديجيتال 😛
