My 80’s theme Birthday

الحمدلله على العمر الماضي وعسى ربي يكتب لنا عمر وسنين اجمل بالصحه والعافيه والطاعه

هالسنه بنات الدوام حبايبي فاجئوني بحفلة اتينن صج صج ماتوقعت شي جذي

فجوا باب مكتب بنت عمي وردوني ٣٠ سنه قري ههههههه

هالسنه عيدميلادي غير لانها اخر سنه لي بعمر الثلاثين والسنه اليايه ادش مرحله يديده بس خلاص حسيت اني كبرت ههههه

المهم براويكم التفاصيل اللي اتينن بأحاى ثيم

اللوحه زوغه مختارين لوحه لوحه فلونه وباي باي لندن وعلى الدنيا السلام ومجلة ماجد ومسرحية شمس الشموس وسالي ووايد اشياء اتهبل

ً

التفاصيل تقتل تقتل من حلاتها شوفوا لعبة السمش زووووغه

والجراغي اللي ينتفخ وينفجر والبالونات والتفافيخ العجينه ام ريحه 😂

لعبة الحية بعد والصابون بدعنا فيه ههههه

وحتى مفرحات القلب مانسوها ههههه كتكات بوقصدير يازينه والشربت المثلج والجيلي والعلوج وبسكوت اول بو قوطي ومونشوز وحتى بفك فلونه

البوفيه عاد شي ثااااااني صج صج ثمانيني ههههه سانكست بارد وسمبوسه وكبه وسندويتشات فول وفلافل وبطاط وبيديان

وتبوله شغل اول وفطاير

فطاير الركن الذهبي بالسالميه هههههه وناسه

حتى الكيك نفس اول بلاك فورست وكيكة فاكهه

الكيكة اتينن اتينن لذيذذذذه من اوبرا طلبيه خاصه اللي بزواياها بيذان

حتى هديتهم علبتها اتينن على شريط VHS

كلشي كلشي كان اينن وايد وايد استانست

حبايبي اغلى البنات خدوجه وهموس وعذوره ونوره وفطومات وامون ودندون ونوف وبشوره وحيوته والوءه والشباب ابراهيم واحمد مشكورين وعسى الله يحفظكم ويسعدكم ❤️

محمية باب دكالة

يوم اليمعه بعد ماطلعنا من مزرعة البحيرة الزرقاء رحنا باب دكاله

تبعد عن البحيره الزرقاء ٧ دقايق تقريباً

اهي محمية خاصه بالطيور والحيوانات الاليفه

ومفتوحه يوم الجمعه من الساعه ١٢ الى الساعه ٩ م

والسبت من ١١ ص الى ٧ م

والدخول مجاني

المكان مرتب فيه قعدات مظلله وقعدات عاديه ومطاعم وقهاوي

حاطين العاب للاطفال وقسم حنه ومحمية الطيور فيها انواع مختلفه

وتلقون مكان يبيعون فيه خضرا تشترونها علشان اليهال يوكلون الحيوانات

ماشاء الله بالاكل ما تحاتون كل شي متوفر

شاورما وعيوش ومشاوي وحلويات عربيه وعاديه وانواع المشاريب وذره وكستنه وكل خير

وحاطين بوثات يبيعون فيها ورد ومنتجات العبدلي وغيرها

Instagram @bab_dokalh

مزرعة البحيرة الزرقاء

يوم الجمعه اللي فات اجرنا باص ورحنا العبدلي برحلة جميلة

الى مزرعة البحيرة الزرقاء

المكان وايد حلو وعائلي وكبير وتبعد عن الكويت ساعه وشوي

عندهم منتجات مختلفه وتقدرون تدخلون المحميات تقطفون فراوله بس اعتقد وقت معين لانه حسافه ما لحقنا على هالوقت

اول ماتدخلون راح تلقون سيايير مفتوحه تأجرونهم مع السايق وياخذ فيكم جوله بالمزرعه ربع ساعه بقيمة ١٠ دك للعايله

تشوفون الخضرااا وتكرمون الحيوانات النعام والصخول وغيرهم

وبعدين تحصلون محمية وكلني

تشترون شدة خضرا بقيمة دينار وتوكلون ال لاما والنعام والغزلان والصخول

قصب سكر

العاب الاطفال

بالنسبه للاكل موفرين لكم مطاعم وقهاوي منها ديب اند ديب وموخا وعصير الضاحية ومحمش وغيرهم

ماشاء الله زحمه ماقدرت اصورلكم عدل

ولاتنسون تذوقون برد الفراوله الفريش من المزرعه عند سكوب اكون

محمية الورد

ويبيعون لكم الورد بعد

ومسوين لكم سوق يبيعون فيه منتجاتهم وبعض المنتجات الاخرى

انصحكم تروحون يوم تستمتعون مع اهلكم خصوصاً بهالجو قبل الصيف

Instagram @albohayra

Fendi Mania Collection in Kuwait

حضرت امس حفل اطلاق المجموعه الجديده

Fendi Mania

في بوتيك فندي الكويت اللي تم افتتاحه امس بعد التعديلات تزامناً مع اطلاق المجموعه

المجموعه كامله مستوحاه من روح ماركة Fila الرياضيه وموقعه بالبرنت المعروف لفندي

حبيت الباوتج ناعمه وحجمها حلو

بيبي العبدالمحسن ب لوك كامل من الكولكشن

شكراً فندي 💙

Little MAC !

واخيراً نزلوا في ماك الكويت الحُمر والماسكرا والفيكس بلس وباقي الاغراض الميني

في امريكا وبعض الدول الثانيه نازلين من زمان بس عندنا توهم ينزلون

حجمهم يهبل نتيفه وسعرهم ٣،٧٥٠ دك

خذيت ٣ الوان من الحُمر

انا اموت على هالدرجات من الورديات

شوفوا الفرق بين حجم الحمره العادية والميني

Palazzo Matteotti Hotel .. Milano

كنت منزله من فتره تغطيات سابقه عن سويسرا وبعض المتابعات طلبوا مني توثيقها فحطيت هايلايت بالانستغرام لبعض الصور وان شاء الله انزلهم قريباً في البلوق علشان تكون مرجع لي ولكم

اهل ايطاليا يبون اماكن وبصراحه انا زرت ايطاليا مرتين فكلش مو خبرة فيها لكن بحط الاماكن اللي رحت لها وممكن تفيدكم وابرزها الفندق طبعا 🙂

الفندق اللي قعدنا فيه في السنتر وايد حلو وملموم وغرفه غريبه موديرن تشوق

اسمه Palazzo Matteotti Milan

قريب جداً من الدومو

احنا خذينا الغرفه بدون ريوق فما ادري عن الاكل نهائياً وعموماً المطاعم قريبه والتجارب حلوه

وهذي صور للغرفه

ولتفاصيل اكثر ضغطوا اللنك

Palazzo Matteotti Milan

This entry was posted in General.
Page 1 of 69912345...102030...Last »