Little MAC !

واخيراً نزلوا في ماك الكويت الحُمر والماسكرا والفيكس بلس وباقي الاغراض الميني

في امريكا وبعض الدول الثانيه نازلين من زمان بس عندنا توهم ينزلون

حجمهم يهبل نتيفه وسعرهم ٣،٧٥٠ دك

خذيت ٣ الوان من الحُمر

انا اموت على هالدرجات من الورديات

شوفوا الفرق بين حجم الحمره العادية والميني

Palazzo Matteotti Hotel .. Milano

كنت منزله من فتره تغطيات سابقه عن سويسرا وبعض المتابعات طلبوا مني توثيقها فحطيت هايلايت بالانستغرام لبعض الصور وان شاء الله انزلهم قريباً في البلوق علشان تكون مرجع لي ولكم

اهل ايطاليا يبون اماكن وبصراحه انا زرت ايطاليا مرتين فكلش مو خبرة فيها لكن بحط الاماكن اللي رحت لها وممكن تفيدكم وابرزها الفندق طبعا 🙂

الفندق اللي قعدنا فيه في السنتر وايد حلو وملموم وغرفه غريبه موديرن تشوق

اسمه Palazzo Matteotti Milan

قريب جداً من الدومو

احنا خذينا الغرفه بدون ريوق فما ادري عن الاكل نهائياً وعموماً المطاعم قريبه والتجارب حلوه

وهذي صور للغرفه

ولتفاصيل اكثر ضغطوا اللنك

Palazzo Matteotti Milan

This entry was posted in General.

Review : Dampa Feast Seafood Restaurant

هالايام الهبه صايره الاكل البحري قباقب وربيان ومحار وغيره

ومن المطاعم اللي انشهرت بهالفتره دامبا فيست في سوق السالميه (الاحمر)

كانوا زباينه اغلبهم من الجاليه الفلبينيه ههههه والبلوقر جون كويت اهي اللي طاحت عليه وعلمت الكويتيين وداحرناهم فيه هههههه

صار ماشاء الله كله زحمه وويتنق ليست

المكان مو كبير بس مرتب وكل طاوله عليها علبه كلينكس وعلبه للدسوس البلاستيك (قفازات)

المنيو

انصحكم بلبس قفازين فوق بعض لانه احس يسرب

الموهيتو والمشروبات الغازيه تتقدم بهالشكل فبلغوهم انكم تبون كوب ورق في حال تبون كميه اقل

يفرشون لكم ورق ويكبون عليه الاكل

جربنا خلطة الكاجون والثوم الحاره

طبعاً كلهم فيهم فلفل بس خلطة الثوم واااايد الذ

للعلم ترى الربيان مو منظف لانه فيه ناس وايد علقوا على هالشي بس بصراحه الخلطه مع الاكل البحري لذيذذذذه وانا شخصياً رحت له مرتين وعاجبني

الاسعار وايد مناسبه والكميه راهيه

Instagram @Dampafeast

 

مطعم ام شريف – الكويت 

من فترة قريبه تم افتتاح المطعم اللبناني المشهور ام شريف
في الكويت

وايد ناس يتعنون له في دبي بعد

معروف المطعم يقدم سيت منيو مقبلات واطباق رئيسيه اضافه للحلويات
اما المشروبات فيكون عليها مبلغ اضافي

الاسعار في الايام العاديه غير عن الويك اند وسعر الغدا غير العشا
فيفضل وقت الحجز تسألون عن الاسعار

العشا في تخت شرقي اما الغدا لا

طبعا كل شي يفتح يديد في الكويت يكون عليه ضغط وزحمه
فحجزنا قبل اسبوعين من روحتنا

المكان ماشاء الله كان فل فما قدرت اصوره عدل

وايد شرح والديكور فخم والوانه جميله متناغمه واطلالته على البحر


طبعا موحدين ستات الاكل في كل مطاعم ام شريف


بدينا بالمقبلات
واول شي وصلت التبوله الحاااامضه اللذيذه
وصفايح الزعتر واللحم


انا طلبت عصير رقي منعشششش


المقبلات كانت حمص ولبنه وصحن برغل مع الطماط وكبه نيه و زهره مقليه وبليله وحراق اصبعو


الخبز فريش حار وعليه حبة البركه

كبه صاجيه وايد طيبه


السمبوسه خطيره وخفيفه وتتقرمش



سوده (جبدة دياي) لذيذه


الربيان وايد طيب


ونزلوا كباب لحم وكباب دياي


والفته خيااال


هذا الطبق شي ماصار عيش مع دياي ذاااااايب وفيه فستق عدل وطعم الدارسين جنه هريسه
شي شي
اكثر طبق ياز لي


قهوه سوده شماليه
ما حبيتها مررررره

قهوه بيضا علشان نهضم عقب الاكل
وايد ناس دخلوا علي يقولون من صجج اكو قهوه بيضا !
هههههه قهوه بيضا يعني ماي مغلي وخالطين معاه ماي زهر مو قهوه قهوه بس يسمونها قهوه بيضا

وبدوا يقدمون لنا الحلو

بسكوت ككاو ومهلبيه ونوع حلو مادري شسمه فيه دارسين وجيلي مع رمان وايس كريم

ايس كريم مستكه مع شعر بنات
خطيرررر

احنا 4 اشخاص مع المشروبات والماي طلع الحساب 81 وربع دك

مطعم ام شريف في فندق النخيل بالبدع
للحجز : 90977997

Instagram : @emsherifkuwait

​Dose Cafe

الكويت بلد الهبات خلصنا من الكب كيك والبرجر واللوتس وفجأة صارت التجارة كلها قهاوي !

يمكن هالشهر فتح اكثر من ٨ كافيهات كمشاريع شبابيه

وبما اني من زمان عن البلوق قلت احط لكم الاماكن اليديده خصوصاً لزوار الكويت اللي يسالوني دايماً عن الاماكن بالكويت

دوز كافيه من الكافيهات اللي وايد هابين فيها

هذا منيوهم 


البيست سيلر عندهم السولتد كارميل لاتيه 

خذته رفيجتي تقول وايد وايد حالي بس ضافوا عليه قهوه اكثر وضبط تقول طعم قهوتهم وايد طيب


هالنوع ماجربناه كان طلب بنت ورانا


وعندهم مجموعة حلويات

Dose cafe locaited in Sharq, Mubarak al Kabeer St, Kuwait City​

Instagram @Dose_cafee


Bites Factory 

بدا الجو الحلو وتحلى معاه القعدات الخارجية واليمعات وحجز انواع الكاترينج 

هالويك اند كانوا عندنا بايتس فاكتوري

متخصصين بالحلويات من وافلز وبان كيك وكريب

وصلوا قبل الموعد بساعه علشان يجهزون شغلهم ويكونون زاهبين بالموعد المحدد

مرتبين وشغلهم كامل وماطلبوا ولا شي منا كل اغراضهم معاهم

عندهم بورد تقدرون تكتبون عليها اي شي اذا عندكم مناسبه او شي


بدوا يسوون الميني بان كيك 



والكريب


اييبون ٣ انواع من الككاو – نوتيلا وكندر ولوتس


واللي مايبي ككاو عندهم صلصات مثل الميبل والجوكليت والكراميل والصوص الابيض


والتوبينق عندهم بسكوت الدايجستف واللوتس والمارشميلو والموز والفراوله والمكسرات


ويوفرون لكم مكينة قهوة للاسبريسو والكابتشينو والمكياتو والاتيه اضافه الى مجموعة متنوعه من الشاي


بصراحه وايد وايد لذيذ وكميته راهيه ويستاهل تطلبونه


Tel (Whatsapp) : 51526691

Instagram @bites_factory 

Page 1 of 69912345...102030...Last »