العيد هل هلاله كل الطرب يحلاله يا ربنا زيد النعم .. لو قايله اغنية محمود الكويتي الله يرحمه بيوم غير العيد بتقولون هذي شفيها صح ؟ لأن هالاغنيه بالذات مرتبطة بأول يوم العيد من يوم احنا زبابيط (صغار) ولما تخلص هالاغنية بالتلفزيون وراها على طول يصدح صوت عوض الدوخي الله يرحمه باركوا يا أحباب الفرح لذ وطاب اليوم يوم العيد والعيد نغني نشيد ردوا علي يا احباب ردوا علي يا احباب واحنا شاقين الضحكه من هني لي هني
ادري بتقولين نسيتي بعد اغنيه العيد العيد الله عالعيد وليالي العيد لوول ترى الموضوع مو عن اغاني العيد بس هالاغاني ملزوم ابديها بالبوست لأنها اول شي نسمعه بآخر يوم رمضان علشان نعرف انه باجر العيد بعد مايقررون لجمة الرؤية الشرعيه 🙂
اقولكم شي من سمعت العيد باجر وانا مادري شفيني مادري ليش رديت اممم ماني قايلة جم سنه ورا لول بس تذكرت عيد الثمانينات لأنها جيلي وفرحته وبساطته وحلاوته لما اشوف عيال هالوقت اقول وعليه ماشافوا الوناسة اللي شفناها رغم انهم جيل التكنولوجيا
بذكركم بأشياء اليوم كنت طرت علي لي قالوا العيد باجر
تذكرون قبل امهاتنا مساكين قبل العيد بفتره يطيرون يا كيدستور او ليتل هاوس او بيبلوس بمجمع مريم اعتقد بالسالمية او لحظة من فضلك بالاوقاف هذي اكشخ المحلات لملابس العيد ولازم 3 بدلات على ايام العيد
وتبدى لوية تكرمون الجواتي والدلاقات ام كشكش والتيجان والشبابيص والاهم جنطة العيد اللي فيها العيادي
ليلة العيد طوابيييير الزحمه عند الصالوناااات ولوية اليهال كل ام يايبه بنياتها وهات يا سشوار وعليه الصالونات الى فوق 12 بالليل من الزحمه خبركم صالونات اول مو وايد مثل الحين
عاد عقب ردة الصالووون يبدى الرعب تكون الوالدة عاينة الحنه ومزهبتها ويالله مدي ايدج حطت القصعه والصبع الكبير امي الله يرحمها كانت تقولنا يالله احط لكم عليه كبوس لوول لأن بروحه وتالي يربطونه بالغتر مالت الوالد القديمة ويخلونه جنه ملاكمين :/ نكسر الخاطر مانقدر نحرك شي بس عاد يبدى الدلع يوكلونه ويشربونه وينومونه والصبح من ال 5 فزعه وااااي و لما يفتحون لنا ايدنا بالحمام نغسلها من الحنه تكون الحنه يبست وتعور الايد وتحر والبجي شغال والفزلين شغال من الصوب الثاني
بس والله كان العيد بدون حنه مو عيد واليهال بدون حنه العيد مو يهال ماكنت احب ريحتها كلش بس الحين وبهاللحظة ودي ارد صغيرة ونايمة وباجر اقوم وارد ابجي وامي تغسل ايدي 
هدوم العيد من بالليل مفروشين ومكويين ومزهبين بعد غسال الحنه نتريق ونغسل ونبدي نبدل
وهني التجوري ينفتح ومايبقى تاج ولا محزم ولا حيول ولا جف ولا خاتم ولامضاعد الا لبسناها اللي تتذكر هالمنظر الحين واهي تقرى البوست اقولج ادري نص العيد انفصخوا لووول ومردهم جنطة الوالدة خلصت الكشخه كككككك
احنا لازم بعد مانكمل على سنقة عشرة ننطر الحمره حلم كل عيد وبعدها لازم لازم صورة مع الوالد عسى الله يحفظة كل عيد هاللقطة تتكرر اقصد ايام الطفولة الحين وينا وين الصور الصبح اذا ماقمنا نعَيد الظهر بعد
بعد مانعيد على يدتي معانا بالبيت الله يطول بعمرها والاهل ونقعد شوي ننتقل ل اليمعه الثانيه ببيت يدتي الثانيه عسى الله يرحمج يا يدتي كانت خيمة مظلله الكل ياحلو يمعتنا عندها والسفره اللي تخرع من كبرها وياحلوو كبة بولين لي الحين اذكر طعمها وخاطري فيها
بولين خدامة يدتي وتعتبر وحده من العايلة تقريباً لأنها عاشت عند اهلي فوق ال 35 سنة وايد احبها اهي ليلحين عايشة بس وايد كبيرة وسافرت الهند من زمان بس هم بولين ركن هام بالعيد بدون اكلها وبالخصوص كبة البطاط مانحس بالعيد 😀
بعد الغدا تبدا عاد الفرارة على البيوت مايبقى احد مانروح له صج صلة رحم عمة خاله يدة ابوي نروح لها هههههه الحين لي اليدة وخلاص والباجي مجرد مسج تهقون هذي صله رحم ؟ الله يعينا
على فكرة انا اول وحده بالصورة من اليسار احب نفنوفي هذا كديته كد لما البسه اتخيل نفسي هدى حسين بمسرحية سندريلا ههههههه ايااام
لا تقولون لي بالليل ماتروحون مسرحيات ؟؟ اصلا مسرح كيفان ومسرح سينما السالمية كان يشكي من كثر مانروح له لوول ولازم لازم نمر محل الورد اللي بظهر سينما السالمية نشتري ورود للفنانين
تبون الصج فنانين اول يستاهلون نفسية حلوة وعلى كل اليهال اللي دار مدارهم الضحكه ماتفارق حلوجهم عكس فنانين هالايام ماني معممه
عبدالرحمن العقل وهدى حسين ومحمد جابر وولد الديرة عسى الله يشافيه ويرده بالسلامه والعجيمي وسحر حسين واستقلال احمد وداوود حسين وانتصار الشراح ودرويش وكاظم القلاف وجاسم الصالح الله يرحمهم نشوفهم كل عيد ونصور معاهم كل عيد
المصورين في المسرح يحوسوووون ياخذون دينار ويعطونا ورقة علشان نصور اخر المسرحية واحنا اخر وناسه بنشوف الممثلين واخرتها نحوس بحولي والسالمية ندور ستوديوهاتهم وتطلع صغيره وداااثرة لوول
تذكرون عاد عقب المسرحيه زاخيين مذكراتنا وكنا نسميها مفكرات لوول علشان يكتبون لنا ذكرى .. وايد فنانين كاتبين لي ومحتفظة فيهم خوش ذكرى 😀
غير المسرحيات اول كانت حتى الفنادق تسوي حفلات للاطفال وشخصيات ومسابقات ووناسة ويستضيفون فنانين وفرق حتى اذكر مره رحت حفلة كان فيها فرقة ميامي والمقدم جاسم عباس
الحين فقدنا هالشي من زمان ماسمعت حفلة اطفال في فندق 
نهاية اليوم الاول لازم نقعد نعد الفلوس وليش اختي اكثر مني ولا انا اكثر منها لوول وامي الله يرحمها نزيد اختي الصغيرة علشان نتعادل وماتزعل ههههه غيوره بس اخر شي مرد الفلوس امي بتدخلهم البنك وبتعطينا 20 حق اليوم الثاني اقولكم الحين ليش 😛
ثاني يوم العيد مقرر لازم نحن والاطفال شلون عيد ومانشتري العاب وااي يا وناستنا لي رحنا الفروانية اكبر فرع لنحن والاطفال نغوووووص بين الرفوف وعقب مانمجل من الالعاب نلقى راعي البنك عند الباب واهوو المشهور اللي يبيع بنك تركي كبااار
ثالث يوم عاد يا مسرحية ثانيه او نقزرها ببيت يدتي ولاصار العصر قوارينا وسيده على الفرع نحوووس ونرجع
بذمتكم مووو عيدنا احلى من عيدهم الحين ؟؟؟ قلت كل اللي بقلبي وبحط راسي وانام وكالعاده من 5 سنين بقوم الظهر ان شاء الله
فمن الحين اقولكم عيدكم مبارك 😀
waaaaaaaaay 3awartay galbi yatny ilbachyaa :”””(
7bebty yslmli galbech :*
كل عام وانتي بالف خير وعساك من عواده صراحة ايامنا قبل كانت احلى واعيادنا كلها في فرحة وبساطة وتجمع الاهل من دون تكنلوجيا ولا شي
وانتي بخير وصحه وسلامة يارب
هالبوست اعتبره بوست مميز جدا في البلوق و فعلا رديتيني للزمن الجميل ايام حلوه عشناها مااعتقد راح يعيشها جيل هالوقت بالرغم من توفر كافه وسائل الترفيه و وبالرغم من ارتفاع قيمة عيديه هالوقت عن عيدية اول ، زمان كل شي فيه بركه و كل شي كان زين و فعلا جدول العيد مايخلى من المسرحيات و حفلات الفنادق و نسيتي ديارف العيد او دوارف العيد اللي بالساحات و منها الصندوق و القليلبه و الخ
ايام تعيش بالذاكره و تبقي ايام حلوه و ربي يبارك لنا بالايام اليايه من اعمارنا و يعود علينا هالاعياد سنين و سنين و احنا وياكم ياتم الصحه و العافيه
عيدج مبارك يالغاليه و عساج من عواده
ايامج سعيدة يالغاليه .. حبيبتي من ذوقج
اي والله صاجه زمن فيه بركة .. الدوارف ماكنت اروح ايام العيد اتذكر كنا نروح لهم الايام العادية في يوم البحار 🙂
امين يارب يعوده علينا كل سنه بالصحه والعافية وياكم وكل المسلمين
فعلا كلامج صحيح كانت ايام حلوة
اي والله حلوة
عيدج مبارك وعساج من عواده
يعني الا ولاااازم اتقلبين المواجع بذكريات زماان
نحن والاطفال هذا لازم نعاايد عليه ويا محلات شرق ملوت الالعاب والعاب وليد
ولاتنسين الارنب الجائع والا ومبي قبل لااازم نتغشى فيه
ايااام مستحيل تتكرر او حتى عيالنا يذوقون لذتها
سنوية حياتي ايامج سعيده اي والله الارنب الجائع اللي بكيفان ياحلوه
إي والله قلبتي المواجع !!
خاصة سالفة الحنة والفازلين على قولتج صج مانحب ريحتها بس العيد ماهو عيد بدون هالحنة !!
وإلا الحمرة ليه حطيناها تحنطنا !! ما نرضى نأكل ولا نشرب عشان لا تروح وإذا اضطرينا لازم نتأكد إنها موجودة بجنطة الوالدة عشان تحطلنا منها عقب ..
حتى الألعاب غير !! يا حلو حديقة الشعب أيام أول وإلا شوبيز !! حتى حديقة الحيوان مكرم السامع كانت بالنسبة لنا وااااو !!
عيال الحين لو تودينهم المريخ ما يعجبهم !!
إيييييه !! والله أيام !! حسيت إني عيووز :p
مشكوورة رديتينا حق هالأيام الحلوة !!
وعساج من عواده إن شالله حبيبتي وعيدج مبارك
لووول اي والله نتحنط حق الحمره صج بنات صح صح شوبيز وحديقة الحيوان تكرمين نسيتهم ههههه ياحلوهم
ايامج سعيده ياعمري
أي و اْللَّـــہٌَ كانت أحلى أيااااااام وما أتوقع ترد يا حلو المنفوش و هالذهبان
و الريوق من الفير. صاجه الحين ما نقعد إلا الصحى العود وبالغصب بعـْْ♡ـْْد
وننطر العيد عشان نطلب من الأرنب الجائع ههههههههههههه
يا حلوها من أيام
ذكرتينا باللي مضى. وأنا قاعده اكتب الابتسامه ساقه حلجي من الوناسه صج عشت جو عيد الثمانينات
يعلها دوم هالابتسامة ودام جذي جني بسوي يوميات من الثمانينات مو جنه خوش عنوان لوول
احلي بوست لاحلي و اروع ايامنا ايام ما كان العيد عيد و ايام ما كان زاهي باهله
الله يخليلنا من وجودهم عيد بحياتنا و يرحم من اللي ظلو في قلوبنا
عساج من العايدين الفايزين حبيبتي
امين يارب حبيبتي وعساج من عواده يارب
يعطيك العافية على هالبوست الحلو صج رديتينا ايام قبل اللله يا حلوها من ايام
و عيدج مبارك و تقبل الله طاعتج
الله يعافيك اخوي سليمان وايامك سعيده يارب
يا حلوها من ايام كنا صج ننطر العيد نطره وكان العيد بالنسبه لي بس الصبح ولا بالليل ما اعتبره عيد وكله استغرب من الناس اللي يقولون بنروح نعايد وحزتها يكون مغرب ولا العشااقول هذولي شفيهم لووووووووول
الحين العيد ما احسه عيد …النفوس تغيرت .. بس ملزومين نفرح
تسلم ايدج عالبوست الحلو :***
الله يسلمج حياتي صاجه حتى احنا العيد والمباركات الصبح بالليل حق المسرحيات والارنب الجائع لول
اي والله فرحة العيد صارت غير بس الحمدلله على كل حال
عيدك مبارك حبيبتي وكلامك فعلا ضرب علي الوتر الحساس واللي يعور .. وين أيامنا وانا طبعا اكبر منك بكثير ،، بعد أيامنا كان للعيد طعم احلى وألذ وكانت العيادي رمزية مو مثل الحين تعطي اليهال عشر دنانير يطالعك بعين ونص ويقول عنك بخيل ،، وكنا ناخذ العيادي ونروح الدكان اللي بالفريج واللي معلق الألعاب ولاّ مسطرهم علي الرض يم الدكان ،، وطبعا أيامنا كنا نروح السينما بدل المسرحيات وخصوصا سينما الاندلس اللي الحين المهلب او سينما الحمرا … المهم أيامنا كان العيد فعلا مميز وشي ينطره اليهال بالتفق .. ومشكورة يا وردة علي هالبوست المميز واللي ردنا لأيام حيل مميزة ولها طعم خاص ماله مثيل هالايام وعيالها ما يعرفون شنو العيد الا حق العيادي وما يقومون الا الظهر وبعد زف وصراخ واذا قلنا لهم خل تتغدي بره يضيق خلقهم ويقولون نبي نطلب ديلفري وتشتري دي في ديز ونقعد بالبيت .. الله يهديهم ان شاء الله ويعرفون قيمة يمعة العيد وفرحتها اللي ما تتعوض باي شي
عساچ من العايدين والفايزين وتقبل الله أعمالة وصيامچ ونتمني ونتفاءل خير بهالجيل
شكرًا يا وردة علي هالبوست العجيب
ايامج سعيده حياتي مس يوووو وايد, ايامكم اكيد بعد حلوة ويمكن احلى من ايامنا بعد عسى الله يحفظ عيالج ويطرح فيهم البركة ويخليهم لج :*
عيدكم مبارك و تقبل الله طاعاتكم…. اشطرا عليج هالذكريات الحين… صج صج رديتينا الى عصر مضى… هههههه ذكرتيني بالعيد و الصالون لما يستشورون شعرنا كنت احاتي شلون انام علشان ما يخترب شعري هههه و تذكرين لازم جنطه حق العيادي ولازم لفلوس يديييييده و ضحكتيني على الحمره هههههه حتى ريجنا ما نبلعه كلا نخاف لا تروح و المشكله تروح و احنا ليما الحين متحنطين هههههههه صج ذكريات
مادري لا وابشرج ثاني يوم لما رحت اعيد قعدت ابجي على خالتي اقولها ولهانه على بيت يدتي القديم هههههه ابتلشت فيني
Loved everything about the post
3idich mbarak ;*
thanks 😀 ayamch sa3eda
موضوع رائع و ذكريات جميلة مع اني اشوف التسعينات ما كأنها قديمه وايد
ولكن تتم الذكريات الجميله و الزمن الاجمل اللي كانت الناس على قلب واحد
بدون فتن و طائفيه و قبليه و حقد وحسد اللهم تمم علينا الامن و الامان
و اجمع و الف بين قلوبنا كما كنا في سابق عهدنا واطرح الخير و البركه
في ابناءنا من الاجيال الحاليه و القادمة بإذن الله
الف شكر وكل عام و الجميع بخير
آمين يارب
ambeeeeeeh hatha elba6ooo6 3ndy 9ora weyah hehe o knt ga3da abchi met9arwe3a menna lol 😛
nesetay ma7al Oilily 😉 9ij wallah 3eedna gabel gher!
loool eeeh oilily almothanaah ya7elwaah 🙂
الله ذكرتيني بنكليا بذيج الايام والوناسة واليمعة الحلوة تصدقين اعيالنا الحين ما يحسون بالعيد وبوناسته كثر ما حسيناه احنه الحين العيد حق اليهال عيدية وبس
كان العيد بالنسبة لنا ينشوف فلانه شلابسة بدلتنا احلى والا بدلتها عاد ياحلونا لي تيمعنا دار مدار يدي الله يرحمه اول العيد الصبح بس عشان انشم العطر المخصوص الي يحطه بالعيد والله ان العيد ما احس فيه الا بريحه الورد والبخور الي يحطها يدي الله يرحمه .
بكل بساطة حلاوة العيد اول غير الحين
الله يرحمه وجميع اموات المسلمين صاجة حتى عطورهم وبخورهم غير من قبل لا ندخل البيت البخور ريحته تعط بالحوش مشاء الله
bchaiteena ya pink ! 5osh ayam wallah !
3eedej embarak o 3saj men 3wadah :*
7bebty wallaa y3l dme3atch ma tanzel ela bel fara7 ya rab, ayamch sa3edaa :*
غورقت عيني وخنقتني العبرة
واحنا لازم انمر نحن والاطفال
كل عيد وانتي بخير
حياتي تسلملي دميعاتج وانتي بخير وصحه وسلامة
عيدج مبارك بنوكه
واي مو صج ذكرتينا بايام راحت ولا راح ترد
ولا بارت المسرحيات كان احلى جزء بالعيد ننطر المسرحيات منااااااااااااطر
مشكورة وعساج من عواده
ايامج سعيده ابلتنا, اي المسرحيات اهم جزء بالعيد
وااااي صج رديتينا لايام الزمن الجميل و يا حلوها من طفوله
و ذكريات و صح عيدنا كله في نحن والاطفال يا وناستنا فيه و لعبنا برائتنا
احلى جيل الثمانينات
بس انا ما كنت احط الحنه ما احبها 🙂
عيدج مبارك و تقبل الله طاعتج
ايامج سعيدة حياتي, لوول انا ما احبها بس انغصب عليها هههه
Awesome post Pink u made me remember those golden days, ur totally right kids now didn’t have much fun as we did.
One of my favorites memory was teasing all the girls in my family but one thing I hated was the ‘3etra in eid :p
thanks mohd, al’3traa ahwan men al7enna 😛
الصراحه عورتي قلبي .. قريت البوست اكثر من مره .. يا حلات ذيج الايام .. صج كانت اناسه .. حتى اهلنا كانو غير .. كنا نكشخ بحزام الذهب ونروح نصرف عيادينا بنحن والاطفال .. واهم شي وجبة الارنب الجائع واحنا زايرين بيت يدتنا .. مو هالوقت اليهال يقعدون حق العيد الظهر !! مشكووره على هالبوست يعور القلب بس وااايد حلو .. يا ليت زمان اول يرد لو خمس دقايق واقعد ويا المرحوم اخوي واهو ينقيلي لعبه بنحن والاطفال
سلامة قلبج يالغالية, لو بيدي ارده وما اخلي الزمن يمشي اسويله Pause lool
Allaah wallah kanat a7la ayam
yes chan zen tred
Love those days we really enjoyed Eid it was different khsosan Na7no wal a6fal it was ajoy 🙂
e walla ma adre why they close it 🙁
walla yetay 3al jar7 a7la yaam lima arke’9 bel 7osh wel walda tarke’9 waray bt7aneni loooooool walla ayaaam !
3eedch mbarak o 3sach mn 3wadah ya rab ;*
Ayamch sa3eeda 7bebty loool la ana ma knt an7ash bs at7l6am o agolaha laaa plz o ahya et39b o et7nini ‘3a9ob allah yr7mha
اشسويتي فيني !! ايااااااام حلوه ماحسيت فيها الا عقب مافقدتها
والاحلى ان كلنا نفس الروتين سبحان الله :/ والكل مستانس
هالبوست احلى بوست قريته .. يعطيج العافيه :*
الله يعافيج حبيبتي تحلى ايامج ان شاء الله
صاجه روتين موحد للكل بس وناسة 🙂
Comments are closed.