وصلتني منتجات جميلة من Down to Earth

عندهم اشياء مختلفة اهم ما يميزها انها طبيعية عضوية وصديقة للبيئة

قدمولي الجنطة الشخصية الحافظة للبرودة وايد عجبتني اول ما فتحت الجيس لقيتها مصفطة وقبل الاستخدام لازم تحطونها بالفريزر من 12 الى 14 ساعه وتستمر البروده داخلها لمدة 10 ساعات خووش شي حق الصيف

وهم تقدرون تستخدمونها لحفظ الحرارة بس بدون لا تحطونها بالفريزر وفي منها الوان واحجام مختلفه

وعندهم بعد Lunch box

من الستيل للمدرسة او الدوام بأحجام وتقسيمات مختلفة

For Order : 50001298
Instagram @d2e_q8

يوم الثلاثا ٢٨ رمضان كنا معزومين على مسرحية زين والوحش وبعد ماطلعنا كل ناس ركبوا سياره وركبت معاي بنت اختي الله يحفظها هالشي قبل الفطور باقل من نص ساعه 🙂
وصلت الاشاره اللي بعد صالة التزلج جان يطري على بالي قصر نايف ليش ما اروح دام اني قريبه و اودي هاللي وياي كلا تقول ودي اروح جاهز ارمي 🙂
والله واچيور ومن قلت لها واهي مستهله يالله ويالله
المهم وصلنا ولا الناس قاطه سياييرهم اخر الدنيا والغالبيه عوايل ويهال صغار من جنسيات مختلفه
الله سهلها ولقيت مكان قريب ونزلنا نركض علشان نلحق
طبعا منمن لااا تشوفونها من الفرحه تناقز خنت حيلي صج ياهل وتبي تشوف الشي اللي يطلع بالتلفزيون لوول مابي اجذب ترى حتى انا كان فيني فضول اروح اشوف شنو اللي يخلي هالامه تترك بيوتها وترتز مووو معقوله بس علشان يسوون باي باي للكاميرا !!!!
كنت سامعه انه يقدمون بوفيهات وشغل عدل !! الحين اقولكم شنو اللي شفته :/
وصلنا على اخر لحظه لله الحمد

الفيوو اينن من وسط القصر عجييييب
اللي مايدله اهو خلف وزارة الاعلام وجدام مبنى البلديه

يازين علمنا وسط القصر

وهذا المدفع

حسافه ماقدرت اصيد اللقطه اول ماضربوا .. جااااهز ارمي 🙂
بس كان الصوت قوي ماشاء الله والدخنه عجيبه

صوت الاذان تبارك الرحمن اينن مادري ياني شعور عجييييب
ماينلامون الاوادم لي راحوا ترى التجربه حلوة

هذا فريق تلفزيون الكويت اللي يغطي يوميا هالحدث الرمضاني الجميل

الجمهور

وقاموا يصورون مع الحرس اللي عند مدفع الافطار ويعطيهم العافيه على نفسهم الحلوة رغم الجو الحار

لي حد هني كل شي تمام 🙂
انزين بفطر ابي بس تميره وبطل ماي !!! ياحافظ وين البوفيهات اللي قالوا عنها ! اتلفت ماكو شي الا هالناس المساكين اللي كل واحد يايب معاه شغله من بيتهم وشي موزعين عليهم بوكسات صغيره مادري شنو فيها لكن اللي يايين مبجر لحقوا واللي عقب ماكو شي ! :/
رحت مني مناك ماكوووو قلت يمكن هاللي يايين يدرون انا اول مره ايي مادري شالسالفه ! لقيت اسره مصريه جان اسألهم من وين لقوا تمر ؟ قالولي والله هما بيوزعوو هناك بس اكيد دلوأتي مش حتحصلي ياحافظ ليش !!! مكان فيه تغطيه اعلاميه ماكو اكل للناس !!!!! وزارة الاعلام ياحافظ افطار صائم كملوا اجركم نص ياكلون ونص بهالحر ماكو احد يفطرهم !!
والله جزاه الله خير الريال المصري فتح جيسهم وعطاني جيس مغلف فيه ٣ حبات تمر وكسب اجر فيني وفطرني ماتدرون شكثر دعيت له الله يسهل له ويرزقه من خيره
وهذي التميره

الخير وايد لله الحمد وبيوت الله ماتخلى من الاكل لكن هالفقاره المساكين اللي يتعنون وهالسنه الوزاره مسويه مسابقات وتوزع هدايا وفلوس يعني حسبوا حساب الاوادم بتييكم وكملوا جميلكم واجركم وكثروا الوجبات انا رديت بيتنا وتفطرت ياربي تديمها نعمه لكن هالمساكين اللي يتعنون يستاهلون لقمة سنعه
اللي بقلبي طلعته واذا كنت من الحيين السنه اليايه بروح وبشوف في تغيير ؟ لكن بحسب حساب ماجلتي وياي 🙂