يوم الثلاثا ٢٨ رمضان كنا معزومين على مسرحية زين والوحش وبعد ماطلعنا كل ناس ركبوا سياره وركبت معاي بنت اختي الله يحفظها هالشي قبل الفطور باقل من نص ساعه 🙂
وصلت الاشاره اللي بعد صالة التزلج جان يطري على بالي قصر نايف ليش ما اروح دام اني قريبه و اودي هاللي وياي كلا تقول ودي اروح جاهز ارمي 🙂
والله واچيور ومن قلت لها واهي مستهله يالله ويالله
المهم وصلنا ولا الناس قاطه سياييرهم اخر الدنيا والغالبيه عوايل ويهال صغار من جنسيات مختلفه
الله سهلها ولقيت مكان قريب ونزلنا نركض علشان نلحق
طبعا منمن لااا تشوفونها من الفرحه تناقز خنت حيلي صج ياهل وتبي تشوف الشي اللي يطلع بالتلفزيون لوول مابي اجذب ترى حتى انا كان فيني فضول اروح اشوف شنو اللي يخلي هالامه تترك بيوتها وترتز مووو معقوله بس علشان يسوون باي باي للكاميرا !!!!
كنت سامعه انه يقدمون بوفيهات وشغل عدل !! الحين اقولكم شنو اللي شفته :/
وصلنا على اخر لحظه لله الحمد
الفيوو اينن من وسط القصر عجييييب
اللي مايدله اهو خلف وزارة الاعلام وجدام مبنى البلديه
يازين علمنا وسط القصر
وهذا المدفع
حسافه ماقدرت اصيد اللقطه اول ماضربوا .. جااااهز ارمي 🙂
بس كان الصوت قوي ماشاء الله والدخنه عجيبه
صوت الاذان تبارك الرحمن اينن مادري ياني شعور عجييييب
ماينلامون الاوادم لي راحوا ترى التجربه حلوة
هذا فريق تلفزيون الكويت اللي يغطي يوميا هالحدث الرمضاني الجميل
الجمهور
وقاموا يصورون مع الحرس اللي عند مدفع الافطار ويعطيهم العافيه على نفسهم الحلوة رغم الجو الحار
لي حد هني كل شي تمام 🙂
انزين بفطر ابي بس تميره وبطل ماي !!! ياحافظ وين البوفيهات اللي قالوا عنها ! اتلفت ماكو شي الا هالناس المساكين اللي كل واحد يايب معاه شغله من بيتهم وشي موزعين عليهم بوكسات صغيره مادري شنو فيها لكن اللي يايين مبجر لحقوا واللي عقب ماكو شي ! :/
رحت مني مناك ماكوووو قلت يمكن هاللي يايين يدرون انا اول مره ايي مادري شالسالفه ! لقيت اسره مصريه جان اسألهم من وين لقوا تمر ؟ قالولي والله هما بيوزعوو هناك بس اكيد دلوأتي مش حتحصلي ياحافظ ليش !!! مكان فيه تغطيه اعلاميه ماكو اكل للناس !!!!! وزارة الاعلام ياحافظ افطار صائم كملوا اجركم نص ياكلون ونص بهالحر ماكو احد يفطرهم !!
والله جزاه الله خير الريال المصري فتح جيسهم وعطاني جيس مغلف فيه ٣ حبات تمر وكسب اجر فيني وفطرني ماتدرون شكثر دعيت له الله يسهل له ويرزقه من خيره
وهذي التميره
الخير وايد لله الحمد وبيوت الله ماتخلى من الاكل لكن هالفقاره المساكين اللي يتعنون وهالسنه الوزاره مسويه مسابقات وتوزع هدايا وفلوس يعني حسبوا حساب الاوادم بتييكم وكملوا جميلكم واجركم وكثروا الوجبات انا رديت بيتنا وتفطرت ياربي تديمها نعمه لكن هالمساكين اللي يتعنون يستاهلون لقمة سنعه
اللي بقلبي طلعته واذا كنت من الحيين السنه اليايه بروح وبشوف في تغيير ؟ لكن بحسب حساب ماجلتي وياي 🙂
يعطيج العافيه وانشالله السنه اليايه تاخذين فطورج معاج بس عملي حسابي 🙂
الله يعافيك وحياك الله 🙂
شكو يفطرونهم
محد قالهم تعالوا
بس المفروض يوزعون تمر و ماي او لبن
الوزارة تسوي مسابقات وتوزع فلوس وتدعوا الناس للحضور شلون محد قالهم تعالوا !!!!؟؟؟؟
يوزعون ما قلنا لا بس الكميات قليلة ما تكفي جميع الحضور
واحنا بديرة خير شنو يضرهم لو يكثرون التمر والماي واللبن على قولتج والقواطي اللي يوزعونها !
aham shay gelti bye 7ag il camera?:p
nooo enkhashet waraha 😛
Comments are closed.