هالعيد كانت لي جولة على بعض مسرحيات الاطفال مع حبايبي اللي ماحلت الروحه الا معاهم
مسرحية زين والوحش سبق اني نزلت موضوع كامل عنها مع رايي فيها
اما المسرحية الثانيه كانت مسرحية مدينة الزنوج اللي كان خاطري اشوف الشغل اللي مسوينه خصوصا بعد تغطيتي لاعلان المسرحية
ورايي بدون اي مجامله الاضاءة روعه و الديكور و الملابس الافضل على مستوى كل المسرحيات طاقه جباره بصراحه من فاطمه القامس اللي انا متأكده هالمسرحيه بالذات بتفتح لها ابواب كثيره لاعمال قادمه وتستاهل شي بصراحه راقي و مو عادي
المكياج نفس الطريقه للشاب عبدالعزيز الجريب انسان متمكن وخلانا مانعرف الممثلين .. انا لما حضرت تصوير الاعلان وايد فنانين ماعرفتهم
الفنانين كلهم يعطيهم العافيه استعراض جميل و حركات حلوة احلام و محسن و زهره والمسلم ودشتي ومال الله وفيصل واحمد
يمكن الشي اللي شفته ان دور زهره و احلام شويه لكن سألت زهرة و قالت صح قليل لكن حبيته
ميامي اسمهم كان ثقل للمسرحيه بس كان ودي تكون دخلتهم بشكل غير وكان ودي يكون لهم كاستم خاص يشبه ملابس الممثلين
القصه حلوة لكن الصوت خرب على العمل مو واضح 🙁
للامانه حضرت المسرحيه مرتين وهالشي اكيد لاني حبيتها
برافوو كاست مدينة الزنوج
مسرحية سوبر آر
الحملي دايما مبدع بشغله و مطلوب كممثل و مخرج و استعراضي طاقه رهيبه ماشاء الله رغم صغر سنه الله يعطيه الصحه
رايي بالمسرحيه الموسيقى حلوة مع ان كان ودي تكون تفرفش و نقازيه اكثر .. الاضاءه ممتازه .. الصوت زين .. القصه هدفها جميل وهي كيف تصنع السعاده لكني ضعت في بعض الاحداث
المسرحية وايد طويله وهالشي سبب شوية ملل
اللي فاجئتني بصراحه مروى بن صغير صج صديقه عزيزه و احبها لكن لما رحت كنت اتوقع بشوف شي عادي منها خصوصا ان الحملي معروف بالاستعراض واحس مروى ماعندها ليونة لي درجه استعراض لكن بهرتني والله تناطط وخفيفه برافو الحملي الظاهر بدعت فيها بالبروفات هههههه
المسرحية غنائيه بلاي باك احس بثينه الرئيسي و مبارك المانع يطلع منهم اكثر لو كانت المسرحيه عاديه مو كلها بلاي باك
مسرحية مصنع الككاو
الديكور بسيط و الاغاني بسيطه بس لها رنه بالاذن وتلزق باللسان
القصه فيها ملامح من فيلم ويلي وونكا
تميزت المسرحية كونها لايف مو بس بلاي باك غنائي وهالنوع احبه شخصيا اكثر من المسرحيات اللي تكون كلها غنائية
النجوم جميعاً كان حضورهم حلو الهام ويعقوب وحمد وصمود وليلى واللي لفت نظري الفنان ابراهيم الشيخلي كان رائع
هدف المسرحية كان واضح للاطفال وهو المثابرة والعمل باخلاص وجهد
مسرحية القراصنة
المسرحيه حلوةومجهود جميل من شباب صغار يخوضون الانتاج الفني
الشعيبي ما شاء الله عليهم شطار من صغرهم
القصه بسيطة والاغاني جميلة
وايد حبيت مشهد المطر في المسرحية
يعيب المسرحية ان الصالة حارة وايد والاضاءه ما كانت موفقه حسافة
هذا كان رايي الشخصي بالاعمال المسرحية اللي حضرتها بكل صراحه بسلبياتها وايجابياتها
وفي شي ودي اذكرة عن منع التصوير في صالات العرض ! من حقكم تمنعون الفيديو صح بس تصوير التلفون الفوتوغرافي تراوالي عادي ياهل ياي مسرحية بيستانس يصور النجوم اللي يحبهم طول عمرنا نحضر مسرحيات ونصور محد منعنا الا بالفترة الاخيره
اللي حضر هالمسرحيات او مسرحيات ثانية شاركونا برايكم 🙂
الله يعطيج العافيه
انا عن نفسي حضرت زين والوحش .. الصراحه وايد حلوة تتظيم وديكور وهدوم ومتعوب عليها بس يمكن شوي تنفع للكبار من طقه اواخر الابتدائي اكثر من اللي اصغر بس وايد انصح فيها
وحضرت ارض الاحلام .. تعتبر مسرحيه استعراضيه غنائيه .. عجيبه والله احنا الكبار استانسنا فيها وايد فشلون الصغار .. و هيا عبدالسلام و ناصر وعبدالله عباس واسيل عمران عندهم طاقه وخفه عالمسرح ماشاالله كانت واضحه
الله يعافيج حبيبتي
ومشكورة على مشاركتنا الموضوع 🙂
ودي تمرين تشوفين مسرحية قروب كويت سين واهمه قروب شبابي يديد لهم هدف ورساله واضحه ويسلطون الضوء على قضايا المعاقين .. مسرحياتهم ماشالله متميزه من اكشن اضاءة اغاني .. يعرضون مسرحياتهم بمركز التوحد بغرب مشرف راح تنبهرين بأداءهم وشلون اهمه مجموعة شباب صغار بنو نفسهم بنفسهم
Comments are closed.