عوار الاسنان و السوس احد الاشياء اللي المفروض ما نسكت عنها وعلى طول نراجع طبيب الاسنان علشان مانوصل مرحلة مانقدر نتحمل فيها الالم او حتى شكل السن
من 3 سنين كان عندي مشكله بالعصب وبعد علاجة تكيسلت اني احط الحشوة الدائمة فأنكسر الضرس وماكان يعورني فكل يوم اقول باجر اروح لما دخل السوس بالسالفة وصار شكل الضرس مأزمني
لكن هم لخوفي من طبيب الاسنان ما رحت سويته
لله الحمد ربي رازقني بصديقات يخافون علي ويفكرون فيني وياخذون لي مواعيد حتى لطبيب الاسنان عسى الله لا يخليني 🙂
صديقتي انسام رتبت لي موعد عند مركز دسمان لطب الاسنان وقالت لي لا تخافين دكاترتهم شطار وبيحلون سالفة ضرسج وبعد كلام انسام ماكان لي كلام بتروحين يعني بتروحين 
وصلت برج التجارية وصعدت لي الطابق ال 11 مكان مركز دسمان
وصلت الاستقبال وعطيتهم اسمي وماقصروا رحبوا فيني وبما اني يديدة عطوني ابلكيشن اعبيه 
العيادة وايد هادية والوانها مريحة تهدي الاعصاب والمنظر وايد حلوو
موفرين مكاين للنسكافيه والاسبريسو والماي والتفاح الاخضر للزوار حلوة الفكرة خصوصاً اذا احد ياي مع المريض وبينطره يستمتع بكوب قهوة على ما يخلص المريض 
وصلت السستر وحدها ويهها مريح يحلوها وخذتني لغرفة الفحص
المعدات كلها حديثة والعيادة مرتبة
وصل الدكتور نائل الهزيم (المدير العام و
أخصائى جراحة الوجة والفم والفكين) ورحب فيني مشاء الله عليه غشمرجي ودمه خفيف والله نسيت الخرعه صج صج الرجل المناسب في المكان المناسب
طبيب الاسنان لازم يعطي جو للمريض ويطلعه من الستريس او التوتر لان مجرد التفكير بادوات فحص الاسنان وصوتها تييب الرقعه اللي كانت حايشتني ذاك اليوم
وحلولي مشكلة البرد مع هالبلانكيت حد الدلع دسمان مشكورين 🙂 
بعد مافحصني دكتور نائل قالي لازم اشعه وخذتني السستر غرفة الاشعه
الاجهزة يديدة وسهالة الحمدلله مو نفس اجهزة الاشعه القديمه 
وهذي الاشعه طلعت على الشاشة
وبهالوقت وصل الدكتور عبدالله وقالي بنرجع نعيد علاج العصب خصوصاً ان الضرس صارله 3 سنوات وفعلاً بدا علاج العصب ومشاء الله ايده حدها خفيفة والعوار كان خفيف ليلتها بس ومجرد حبتين مسكن وكانت الامور تمام والصبح ماكان فيني شي لله الحمد 
بعدها بأسبوع رحت لهم علشان اكمل العلاج وكان بإنتظاري الدكتور عادل وهني تأكدت مقولة انه دكاترة دسمان شطار لأن فعلا كمل لي الدكتور عادل العلاج مشاء الله عليه بدون عوار وبدا ياخذ مقاسات للتاج اللي بيتلبس مكان الضرس 
بعد جم يوم ان شاء الله موعدي الياي لتثبيت الوتد مكان السن واكيد في البوستات الياية بقولكم شصار معاي وبراويكم النتيجة اللي ناطرتها من 3 سنين 🙂
و الحمدلله خوفي خف ومتأكدة بكون بأيد امينه بعد ما شفت الشغل العدل مع دكاترة دسمان لطب الاسنان
كل الشكر لدكتور نائل الهزيم, دكتور عادل ودكتور عبدالله عساكم على القوة ويعطيكم الف عافية
Location : Al Soor St, AlTijaria Tower – 11th Floor Al Murqab
Tel : 22968444
FB (Link) Twitter (@DasmanDental)
