تعودنا تيينا هدايا من الاهل والاصدقاء بأعياد ميلادنا لكن الغريب بهالموضوع ان صديقتي جاكي اختارت تقدم لنا هدايا في عيد ميلادها الثلاثين تعبر عن حبها لنا وان صداقتنا شي مهم بالنسبه لها 🙂
جاكي او جمانه وهو اسمها الصجي 🙂 من البنات اللي تعرفت عليهم بعد مادخلت عالم التدوين وعلى فكره هالسنه يصير لها ١٠ سنين في عالم التدوين ومن اكثر البنات اللي حبيتهم وبيني وبينها شي مشترك انه اول الناس اللي يحرصون يكونون بالموعد بأي ايفنت او تجمع خاص يمكن هالشي قربنا من بعض اكثر في بدايه تعارفنا بس اللي يجذب اكثر انها من الناس اللي على طبيعتها بدون تصنع وبدون رتوش اهي جاكي لأنها جاكي الصريحه اللي تقول كلمتها بالويهه وعندها الصح صح والغلط غلط علشان جذي احبها
المهم الهديه اللي تشوق عباره عن بوكس مستطيل وفوقه ظرف مرسوم عليه شخصيه جاكي برسم الايد واللي راسمته اختها دانه ما شاء الله عليها
ومربوط عليه تاق عليه اسم البلوق وكلمة ثانكس 🙂 انتي اللي ثانكس جوجو :*
بطلت البوكس لقيت سوالف تشوق على الحب الابدي لجاكي >> الايفوووون
نووت ومحايات واشياء على ليقوو وميداليه وتعليقه للايفون والاحلى ككاووو ام اند امز على لوقو جاكي واسم بلوقها وال٣٠ اللي محتفله فيها هههههه ترى ٣٠ قمة النضوووج والعمر الحلو 🙂
يشوووووووق
انتي لذيذه جدا يا جاكي 😀
احلى شي انه جوجو تدري فيني انا طفارتي شي بالانجليزي احم احم صديقاتي ادري تكتبون انجليزي واحبكم واحاول افجج في بوستاتكم بس اناااا عربوووووو بلوقاتكم اي احد يكلمني انجليزي بليززز نوووووو انا عربووووو عربووووووو مي نو انجيليش مي ذس 😛
ياخي رحم الله امرىء عرف قدر نفسه انا طول عمري مدارس حكومه تيون تكشخون فوق راسي انكم دارسين بالانجلش سكول هههههههه تحروني يعني
المهم انا مادري شفيني هالايام احب اقرق ههههه
جاكي حبيبتي تدري فيني فكاتبه لي رساله بعد عمري بالانجليزي المعرب وفرت علي افتح قوقل هههههه يا بعددددهم كلهم والله
مشكلتي قريت الرساله بالليل والعيون قامت تغورق والدموع قامت تهل والله صج انا هالسوالف مالي قلب عليها بسرعه الدموع تنزل
بس والله استانست الواحد شيبي من هالدنيا غير ناس تعزه وتحبه وتذكره بالخير مو لغرض في نفس يعقوب لااا تحبه اهو لذاته وهالشي يوصل من القلب للقلب
اخيتي وحبيبتي وصديقتي جمانه كل عام وانتي بألف خير وانا محظوظه ان عندي اخت مثلج وعسى الله يديم هالمحبه احبببببببببج واااايد :*
