PinkGirlQ8

رابط اليوم الثالث – اضغط هنـا

الصبح قعدنا مبجر وكنا مواعدين نفس المرشد (علي) علشان نطلع برحلة جديدة الى الاماكن اللي بتشوفونهم بهالبوست بالتفاصيل اللي شفتها 🙂

اول شي مرينا على مطعم الفندق علشان الريوق وكانت الاطلاله وايد حلوة

والمكان وسيع وراهي والبوفيه متنوع

والصور تعبر

وابتدت رحلتنا من بيت الحرير

وهالمحل معروف جدا ومقصد للسياح في بورصه عباره عن 3 طوابق فيها كل ما يخص سيفونيرات تركيا اضافه الى الشالات من الحرير وغيره من الاقمشة الرخيصة والغاليه والتحف والمفارش والجلديات والاواني التركية وغيره

وهالصور لبعض اللي شفته بالمحل

غرامي المغناطيس للثلاجه بس ماقدرت اخذ الا ثنتين لأنه ماعندي مكان ثلاجتي انترست

هالفناجين الكل حابهم يرهشوووون

لبسهم التقليدي لجميع الاعمار

ويم بيت الحرير بالضبط بتلقون المسجد الاخضر والضريح الاخضر

وهذي معلومات عن الضريح من موقع بورصه

تقع في جنوب الجامع الأخضر، بني الضريح من قبل محمد جلبي أبن السلطان يلدرم بيازيد سنة ١٤٢١ (٨٢٤ هجري). مهندس الضريح هو ايفاز باشا. الضريح تتكون من ثمانية زوايا، لها حافة عالية من الخارج و قبة حادة، لها شكل مميز في البناء. يقع التوابيت في الطابق السفلي و تحفظ في السراديب. القبة تملك من كل جهة نافذة صغيرة ذات قوس ( واخزة) حادة، تستند هذه النوافذ على اطارذات ثمانية سطوح. من الممكن الدخول الى القبة عن طريق طوق مثلث موشوري، في القسم الشمالي هناك المحراب الصغير، و يوجد فوق الباب الكتابات و ألوان و أشكال مختلفة من البلاط و القراميد، تعتبر هذه القراميد من النماذج الجميلة من حيث طريقة النقوش و الزخرفة.

يوجد في داخل الضريح تابوت محمد الجلبي، هذا التابوت مكسو بالاجر، و يتألف من ثمانية زوايا، يحيط به المرمر من الجوانب، ومن الفوق مغطى بالقرميد بالون مختلفة كالابيض و الأزرق و الأصفر و الأزرق الداكن. و هناك كتابات تزين أطراف التابوت.

نوافذ المحراب عالية جداً، يشبه الجامع ألاخضر من حيث شكل الزخارف و الكتابات. يقع الضريح على حائط له ستة زوايا يبلغ ارتفاعه ٣ أمتار، هذا الحائط مزينة با القرميد و عليها نقشات مثل النجمات المذهبة. هناك كتابة على القرميد يذكر فيها بأن الضريح قد انشيء من قبل محمد المجنون

وانا طالعه من الضريح شفت هالشاب الطيب يبي يبيع علي البساط السحري بس اعتذرت واكتفيت باني اخذ له صورة وطلع حتى اهم عندهم هبة الحبتين والبوز 😛

وبعدها حركنا من هالمكان بطريق جبل اولدغ و وقفنا عند مكان يشربون منه الناس ماي نازل من قمة الجبل

الماي باااااارد من كثر ما اهو بارد لما تحطون ايدكم تصرخون من برودته

شربنا منه ما شاء الله يسررررسح وغسلنا ويوهنا ومشينا

ووصلنا عند التلفريك المفتوح في جبل اولدغ وركبنا

الوضع كان عجيب والجو وايد حلو لا برد ولا حر

اول ماحرك فينا التلفريك ولا يركض واحد من تحت يصورنا !

وصلنا فوق

وهم واحد صورنا قبل لا نوصل بشوي

اثاري يطلعون الصور وقبل لاتنزلون يبيعونهم عليكم او انكم تردونهم وتقولون مانبي !!

بس مادري ليش يخسرون ويطلعونهم كلهم احنا صورونا وبس انا اللي خذيت صورة والباجي رديناهم مادري شبيسوون فيهم

هذي صورة سايقنا عطوه اياه بلاش !!!! وسايط حتى بتركيا ههههه

فوق حاطين قهوه داثرة ماقعدنا فيها صورنا بس جم صوره

المنظر من فوق

حاطين سيارات للي بيطلع سفاري

كانت جدامنا وحده كويتية سمعتها تقول انه هالنبته ميرمية عاد مادري صج ولا لأ

لما نزلنا تحت لقينا واحد يبيع الصور اللي صورونا اول ماركبنا على صحون تذكارية .. انا خذيت صورتي هههه احب هالسوالف

وخلصنا من التلفريك وركبنا سيارتنا ورحنا للشجرة التاريخية الكبيرة

وهي شجرة معمره تاريخية عمرها مايقارب 600 سنة وتقع ببداية طريق جبل اولدغ عرضها ثلاث الى اربع امتار واغصانها عريضه وتظلل المكان كله

دار مدارها قعدات حق مقهى ومطعم تقدرون تطلبون عدة الشوي وتستمتعون بالشوي بروحكم واطلالتها على المدينه بموقع جميل

الفاكهه شوقتنا فطلبنا صحن وقعدنا كلينا فاكهتنا ومشينا

الطعم خياال

وصار وقت الغدا وكنت قارية كومنت عندي بالانستغرام يمدحون بمطعم اسمه حجي دايخ !

اهو اسمه Haci Dayi

بس عاد العرب لازم يحرفون بالاسم و سموه حجي دايخ ويقولون انشهر اكثر بسبة هالاسم

المطعم قعدته وايد حلوة والاكل لذيذ والخدمة سريعه وممتازة ويعتبر الذ مطعم جربت اكله في تركيا

اللي يروح بورصة لازم يمره

اول شي يابولنا هالخبز وايد طيب

وطبعا انا ادمان لبن فطلبت لبنهم لذيذذذذ

متبل ناطع

هالكبه شي ماصاااار لذيذة

وصحن مشويات مشكله عجيبة وحااااره

ولازم عقب الغدوة جويهه تقعد الراس

واحنا هناك حطيت صورة بالانستغرام وانصحوني اطلب الكنافه ومع ان ما كان فينا مكان لكن قلنا عن الحسافه نطلب وحده واحنا ماشاء الله ست اشخاص تخيلوا عقب ماذقناها مادري شلون صار في مكان ووحده تجر الثانية فطلبنا ثلاث ههههههه

عجيييييييييبة موووو صج