My Trip to Turkey – Bursa Day 4 رحلتي الى تركيا – بورصة اليوم الرابع

4daybursa1

رابط اليوم الثالث – اضغط هنـا

الصبح قعدنا مبجر وكنا مواعدين نفس المرشد (علي) علشان نطلع برحلة جديدة الى الاماكن اللي بتشوفونهم بهالبوست بالتفاصيل اللي شفتها 🙂

اول شي مرينا على مطعم الفندق علشان الريوق وكانت الاطلاله وايد حلوة

والمكان وسيع وراهي والبوفيه متنوع

والصور تعبر

4daybursa24daybursa34daybursa44daybursa5

وابتدت رحلتنا من بيت الحرير

وهالمحل معروف جدا ومقصد للسياح في بورصه عباره عن 3 طوابق فيها كل ما يخص سيفونيرات تركيا اضافه الى الشالات من الحرير وغيره من الاقمشة الرخيصة والغاليه والتحف والمفارش والجلديات والاواني التركية وغيره

وهالصور لبعض اللي شفته بالمحل

4daybursa64daybursa74daybursa8

غرامي المغناطيس للثلاجه بس ماقدرت اخذ الا ثنتين لأنه ماعندي مكان ثلاجتي انترست

4daybursa94daybursa104daybursa11

هالفناجين الكل حابهم يرهشوووون

4daybursa124daybursa134daybursa14

لبسهم التقليدي لجميع الاعمار

4daybursa15

ويم بيت الحرير بالضبط بتلقون المسجد الاخضر والضريح الاخضر

 

وهذي معلومات عن الضريح من موقع بورصه

تقع في جنوب الجامع الأخضر، بني الضريح من قبل   محمد جلبي أبن السلطان  يلدرم بيازيد سنة ١٤٢١  (٨٢٤ هجري). مهندس الضريح هو ايفاز باشا. الضريح تتكون من ثمانية زوايا، لها حافة عالية من الخارج و قبة حادة، لها شكل مميز في البناء.  يقع التوابيت في الطابق السفلي  و تحفظ في السراديب. القبة تملك من كل جهة نافذة صغيرة ذات  قوس ( واخزة)  حادة، تستند هذه النوافذ على اطارذات ثمانية سطوح. من الممكن الدخول الى القبة عن طريق طوق مثلث موشوري، في القسم الشمالي هناك المحراب الصغير، و يوجد فوق الباب الكتابات و ألوان و أشكال مختلفة من البلاط و القراميد، تعتبر هذه القراميد من النماذج الجميلة من حيث طريقة النقوش و الزخرفة.

 يوجد في داخل الضريح تابوت محمد الجلبي، هذا التابوت مكسو بالاجر، و يتألف من ثمانية زوايا، يحيط به المرمر من الجوانب، ومن الفوق مغطى بالقرميد بالون مختلفة كالابيض و الأزرق و الأصفر و الأزرق الداكن. و هناك كتابات تزين أطراف التابوت.

 

نوافذ المحراب عالية جداً، يشبه الجامع ألاخضر من حيث شكل الزخارف و الكتابات. يقع الضريح على حائط    له ستة زوايا يبلغ  ارتفاعه  ٣ أمتار، هذا الحائط  مزينة با القرميد و عليها نقشات مثل النجمات المذهبة. هناك كتابة على القرميد يذكر فيها بأن الضريح قد انشيء من قبل محمد المجنون

4daybursa164daybursa174daybursa18

وانا طالعه من الضريح شفت هالشاب الطيب يبي يبيع علي البساط السحري بس اعتذرت واكتفيت باني اخذ له صورة وطلع حتى اهم عندهم هبة الحبتين والبوز  😛

4daybursa19

وبعدها حركنا من هالمكان بطريق جبل اولدغ و وقفنا عند مكان يشربون منه الناس ماي نازل من قمة الجبل

الماي باااااارد من كثر ما اهو بارد لما تحطون ايدكم تصرخون من برودته

شربنا منه ما شاء الله يسررررسح وغسلنا ويوهنا ومشينا

4daybursa20

ووصلنا عند التلفريك المفتوح في جبل اولدغ وركبنا

الوضع كان عجيب والجو وايد حلو لا برد ولا حر

اول ماحرك فينا التلفريك ولا يركض واحد من تحت يصورنا !

4daybursa214daybursa224daybursa234daybursa22

وصلنا فوق

وهم واحد صورنا قبل لا نوصل بشوي

4daybursa24

اثاري يطلعون الصور وقبل لاتنزلون يبيعونهم عليكم او انكم تردونهم وتقولون مانبي !!

 

بس مادري ليش يخسرون ويطلعونهم كلهم احنا صورونا وبس انا اللي خذيت صورة والباجي رديناهم مادري شبيسوون فيهم

هذي صورة سايقنا عطوه اياه بلاش !!!! وسايط حتى بتركيا ههههه

4daybursa24-

فوق حاطين قهوه داثرة ماقعدنا فيها صورنا بس جم صوره

4daybursa25

المنظر من فوق

4daybursa26

حاطين سيارات للي بيطلع سفاري

4daybursa27

كانت جدامنا وحده كويتية سمعتها تقول انه هالنبته ميرمية عاد مادري صج ولا لأ

4daybursa284daybursa29

لما نزلنا تحت لقينا واحد يبيع الصور اللي صورونا اول ماركبنا على صحون تذكارية .. انا خذيت صورتي هههه احب هالسوالف

4daybursa30

وخلصنا من التلفريك وركبنا سيارتنا ورحنا للشجرة التاريخية الكبيرة

وهي شجرة معمره تاريخية عمرها مايقارب 600 سنة وتقع ببداية طريق جبل اولدغ عرضها ثلاث الى اربع امتار واغصانها عريضه وتظلل المكان كله

دار مدارها قعدات حق مقهى ومطعم تقدرون تطلبون عدة الشوي وتستمتعون بالشوي بروحكم  واطلالتها على المدينه بموقع جميل

4daybursa314daybursa32

الفاكهه شوقتنا فطلبنا صحن وقعدنا كلينا فاكهتنا ومشينا

الطعم خياال

4daybursa33

وصار وقت الغدا وكنت قارية كومنت عندي بالانستغرام يمدحون بمطعم اسمه حجي دايخ !

اهو اسمه Haci Dayi

بس عاد العرب لازم يحرفون بالاسم و سموه حجي دايخ ويقولون انشهر اكثر بسبة هالاسم

4daybursa34

المطعم قعدته وايد حلوة والاكل لذيذ والخدمة سريعه وممتازة ويعتبر الذ مطعم جربت اكله في تركيا

اللي يروح بورصة لازم يمره

4daybursa35

اول شي يابولنا هالخبز وايد طيب

4daybursa36

وطبعا انا ادمان لبن فطلبت لبنهم لذيذذذذ

4daybursa37

متبل ناطع

4daybursa38

هالكبه شي ماصاااار لذيذة

4daybursa39

وصحن مشويات مشكله عجيبة وحااااره

4daybursa40

ولازم عقب الغدوة جويهه تقعد الراس

4daybursa41

واحنا هناك حطيت صورة بالانستغرام وانصحوني اطلب الكنافه ومع ان ما كان فينا مكان لكن قلنا عن الحسافه نطلب وحده واحنا ماشاء الله ست اشخاص تخيلوا عقب ماذقناها مادري شلون صار في مكان ووحده تجر الثانية فطلبنا ثلاث ههههههه

عجيييييييييبة موووو صج

4daybursa42

واحنا قاعدين مروا علينا هالمجموعه مادري عندهم سباق ولا تمرين بس ماشاء الله شكثرهم

4daybursa43

مجابل المطعم اكو حديقة فيها مدافع قديمة وكافيهات وبسطات وتطل على المدينه

4daybursa444daybursa454daybursa46

وختامها مع السوق الى مول Korupark

يقول المرشد انه من اكبر واشهر مولات بورصه

4daybursa47

المجمع مو واو بس زوين فيه بعض المحلات المشهوره مثل مارك سبنسر وغيره

وقهاوي ومطاعم وسينما

4daybursa48
وخلص اليوم الرابع ونلقاكم ان شاء الله ببوست عن اليوم الخامس في تركيا قريباً 🙂

3 comments

  1. Elji3da says:

    ماعليج امر التكاسي فبورصه سهل نحصلهم؟

    والمسافه بين التلفريك و مطعم حجي دايخ قصيرة بحيث نقدر نمشي لها والا لازم سياره؟
    ومشكورة 🙂

    • PinkGirl
      PinkGirl says:

      اي في تركيا كل مكان تكاسي لأنه مكان سياح بس تأجير السياره وايد ارخص

      لا كلش مو مال مشي المسافة لازم سياره

Comments are closed.