اضغط هنـا ProjectX سبق واني كتبت بوست عن مسابقة

المسابقة بدت امس وتنافست فيها 6 فرق من البلوقرز وفازوا 3 فرق

واليوم نفس الشي 6 فرق اخرى من ضمنهم انا ودندرمة في فريق

وصلنا شيف بوتيك وكان كل شي مرتب وجاهز وبالانتظار وصول المشتركين والحكام

مزهبين لنا الابرون او الصداري وعليها التاق باسم البلوقات وكشخنا 🙂

البلوقرز المشاركي كانوا

Pink GirL + Danderma

Q8Rain + Dudette

Alderwaza

Triple F + UrbanQ8

HisHersQ8

Our Family Nest

والحكام وصلوا وجاهزين

شيف مونقكون + زياد العبيد + جمانه العثمان + باسل السالم + فهد اليحيي

المرحلة الاولى : صحن ماندري شنو داخلة والمفروض يكون اللي داخله شي نبني عليه فكرة الطبق ويكون الاساسي فيها

والخيار متروك لنا سواء نسوي طبق مقبلات او سلطة او رئيسي او حتى حلو

اوفوكادوووو

وبما اني عليمية طبخ كنت مساعدة الشيف دندرمة واهي الراس المدبر للطبخه وقامت تكتب المكونات اللي نبيها حق طبقنا

وبما ان الوقت محدد ب 45 دقيقة طبخ و15 تزيين فالافضل ندور شي سهل وكنا امام اكثر من خيار لكن رسينا على القواكامولي واهي اكله مكسيكية يدخل من ضمن مكوناتها الاوفوكادو

شلنا سلتنا ورحنا ندور مكونات طبقنا

وبدا الشغل بين تقصص الطماط والاوفوكادو والخس والبينز وغيرها

ما كان اكو ناتشوز فقلنا ماكو الا نخترع ناتشوز محلي كويتي من خبز المطاحن 😉

ومع اضافه البابريكا وشوي من زيت الزيتون والغلي صار عندنا ناتشوز كويتي

دندرمة تسوي القواكامولي

وهذا طبقنا جاهز

وانعرض على الحكام وتذوقوه وكانت النتيجة زينه محد علق بشي مو زين 🙂

وماقصرت دندرمة فكيتني من المقابلة وقابلوها بريحاتها وتكلمت عن مشاركتنا وطبقنا 🙂

الغدا كان خوش برياني دياي من لو فات والروكي رود مالتهم حدها عجيبة وخفيفة

بعد الاستراحه الصغيره صار وقت المرحلة الثانية وتفاجأنه ان المحتوى الثاني اهو البيكن او اللحم المقدد

لا تشوفون ويهه دندرمة لأنها نباتية وماتجيس اللحوم فتكلفت انا بالطبخ تحت اشرافها

بعد ما عرفنا شنو بنسوي بالبيكن قالولنا ان بعد 20 دقيقة راح يكون فيه جوكر شي واهو شي لازم تدخلونه ضمن مكونات طبقكم !! شنووو ؟؟؟ نوتيــــــــــــــــــلا .. ليش؟؟؟ مع بيكن ؟؟؟ 🙁

السالفة قلبت خلطبيطة وحطينا السبال على السمسم وقصينا البيكن شرايح مع قفشة من النوتيلا وحمسناهم

وطماط مع الفلفل وصوص نسيت شسمة خلطتهم دندرمة للباجيت ساندويتش

وحطينا خلطة البيكن وخلطة الخضرا مع الروب بالباجيت

وسوينا سلطة بسيطة من الجرجير والنعناع والطماط وعلب صغيرررر فلفل احمر ! وهذا الشكل النهائي

التصوير شغال

والحكام الظاهر تشوقوا وقاموا يطبخون

سوولهم طبق حلوو ايس كريم على تمر او شي جذي

والحين وقتنا نشرح طبقنا الثاني ودندرمة مندمجه

مساكين والله الفلفل لعب فيهم لعب ما كنا ندري انه علب الفلفل الصغير يسوي بلاوي .. اسفين بدعنا فيكم 🙂

وعلى ما يخلص تحكيم باقي الاطباق خذينالنا جويهه وقهيوة وحلينا من براون دايموند يم يم

وكنا بانتظار النتيجة .. ومــا فزنا 🙁 اكيد مفلفلين الحكام وين بنفوز هههههه خيرها بغيرها

ومبروك للفايزين تستاهلوووون والله

كل الشكر لشيف بوتيك والمنظمين والرعاة والحكام على المسابقة الحلوة اللي استمتعنا فيها وماحسينا بالوقت معاكم 🙂

والشكر ايضاً لأخوي الصغير حبتين اللي صوَر اغلب صور البوست 🙂