اممم منو مريم ؟ وليش مجبوسها ؟ 

انا اقولكم منو مريم ؟ مريم العمر رفيجة خواتي 🙂 وليش مجبوسها ؟ اقروا البوست راح تعرفون قصتي معاها بس مع الاسف ما تقدرون تذوقون او تطلبون او حتى تاخذون وصفته لأنه مو للبيع هههههههه ادري انا مجرمه لكن مريوم مجرمه اكثر مني خخخخخخ

من وعيت على الدنيا والذ وانطع واحلى اكل كويتي وخاصه المجبوس ما تسويه الا بولين خدامة يدتي الله يرحمها اكلها شي خيال لكن عقب ما كبرت راحت الهند الله يذكرها بالخير

نوعي ما احب مجبوس اللحم ولا ذاك الزود مع السمج المرتبة الاولى عندي يحتلها مجبوس الدياي 

عقب مجبوس بولين يحتل مجبوس مريم المرتبة الثانية واللي يضحك انه هالبنت ما تتنقص لنا هالمجبوس الا بالمواسم 

طيبة اليوم عيد الام ترى يايبة لكم مجبوس !!! طيوب عقب باجر عيد ميلادج ترى يايبة لكم اليوم مجبوس !!! هههههه خلتنا ننطر الافراح وليالي الملاح علشان مجبوسها الناطع 

اللي يميز مجبوس مريوم انه الدياي مسدحين وفوقهم بطاط مبشور لذيذذذذذ والعيش الحبه نثريه تقول اكلوني 

صج لي قالوا مجابل جيش ولا مجابل عيش :/ اي ريجيم يصمد جدام هالمشهد 🙁 

البطيطات

كلش مو ربع الحشو ماحبووووش

اللي يكمل الجريمه المكملات من المعبوج الاخضر الحار وانصحكم فيه من البستوق لذيذذذ واجار المنجا وياحبذا لو يمهم اجار طماط وثوم جبل ولا غنى عن فلفل بو ديج ودقوس الطماط

والمخدر الاساسي بالوجبات الكويتية .. لبــــــــــــــــن  وباااااااارد ولو فيه ثلج بعد يا لهووووووي

Dig in 😛 

شكرا مريوم على المجبوس 

خخخخخخخخ .. يعني وراها نومه 😛