Kuwait enters Guinness World Records with The Largest Handprint Painting Flag

سمعنا قبلها بيوم ان من ضمن فعاليات كويتي وافتخر بيسوون اكبر علم مصبوغ بطبعات الايد علشان يدخل موسوعة غينيس للارقام القياسيه

وبما اني اجازه قلت اقوم الصبح وامر اشوف العلم واصور واشارك

الفكره كانت من الشباب عبدالله جواد صالح و محمد الكاظمي وشاركوهم دشداشة اكسبرس بخياطة اكبر علم

وصلت قبل ال10 بشوي وشفت العلم من بعيد كبييييير مساحته 6210 متر

وما شاء الله لقيت مدرسة بنات ومدرسة صبيان يشتغلون ويطبعون بصمتهم والظاهر الشباب القائمين على المشروع مبلشين من الفجر ما شاء الله عليهم لأنه العلم من الصوب الاسود كان خالص وجزء من اللونين الاحمر والاخضر بعد

واحلى شي انهم فاصخين مكرم السامع جواتيهم ويمشون على العلم حفاي علشان ما يتوصخ

البصمات

وصور لطلبة مدرسة مشعان الخضير المتوسطة 🙂

الموجودين شادين حيلهم علشان يخلص العلم قبل الساعه 5 المغرب وقت وصول ممثل موسوعة غينيس

حسافه ان اصحاب الفكره ما بلغونا عن هالحدث وطريقة المشاركة فيه من قبل جان ساهمنا بنشر الفكره وزادوا عدد المشاركين خصوصاً ان البلوقرز ما يقصرون واي شي يرفع اسم الكويت احنا حاضرين ندعمه ونساهم بنشره

وطالما وصلنا كان لابد من المشاركة مع الحبيبات بلوق رزه وبلوق سيلفر بلينق بلاك لبسنا الدسوس وشلنا الصبغ وتكرمون فصخنا جواتينا وبصمنا ايادينا بالعدد اللي قدرنا عليه

رزه مزهبه الكبوس وشغل عدل واحلى شي مالها خلق تفصخ الجوتي مكرم السامع فقعدت على الرمل وقامت تطبع 🙂

وسلفر بلينق من جهه ثانية مشتطه

ومحسوبتكم طبت بالنص وهات يا تطبع 😀

العصر رديت علشان ولد اختي حبيبي شاف الصور واشتط وقلت اييبه يشارك الا تبارك الرحمن خالصين وشي ولا ممثل موسوعة غينيس البريطاني واصل علشان يشوف القياسات ويلقي نظره على العلم