مطعم يديد وهادي جداً بديكور جميل غير تقليدي
لوكاندا فتح هالاسبوع ويستقبل الزباين فترة بعد المغرب الساعه 6 وبيكون مفتوح لفترة الريوق والغدا قريباً
زرت المطعم اليوم بدعوة من الاخت الغاليه سناء الخرجي احد صاحبات المطعم وسررت بالتعرف ايضاً على شريكتها الاخت ساره الحاتم واهي اللي مصممه ديكور المطعم بالكامل
هذا الممر المؤدي الى المطعم
المطعم صغير وملموم والاضاءة هادية وبالضبط حسيت نفسي زايره ناس في بيت واااايد اسري المكان
حبيت العبارات اللي مكتوبة على الجدار بكل مكان 🙂
تكرمون حتى التواليت ديكوره يوَنس
اول ما وصلنا ضيفونا بالمكسرات
وبما ان الصيف دخل علينا احسن شي نبدي بالعصاير
طلبت ليمون بنعناع وابلة نوره اختارت عصير البرتقال بالاناناس والزنجبيل
هذي كبـه بس عندهم حتى شكل الكبه غير مربعه وداخلها خضرا وفوقها صوص صبار وااايد عجيبة
مشروم محشي بجبن .. احلى مشروم ذقته بصراحة وايد حبيته لذيذذذذ
فرايز
موزريلا ستيكس
جــاي
والحلو كان مع الفستقيه بالقشطه والمحلبية .. انصح فيها وبشدة المحلبية خفيفــــــه تينن والفستقيه لذيذة
وكان الختام مع باسمه حدها طيبه هالمره زوغه يابت صينية القهوه وسوت القهوه التركية جدامنا
انا مو من محبي القهوة التركية بس قهوتها كانت عجيبة وتستاهل العنوه علشان نشربها من ايدها
وضيفونا بيتي فور مع القهوه واايد ترف عجيب واللي عرفته انه مسوينه بالبيت مثل اغلب الاشياء اللي تتقدم في المطعم
عند المدخل مخصصين طوفه تكتبون عليها ذكرى وكلمة لأصحاب المكان 🙂
كان بخاطري اعرف سبب اختيار اسم المطعم وقالت لي الاخت ساره انهم كانوا مختارين اسم ثاني لكن كان مأخوذ وتم اختيار هالاسم لأنه اللوكاندا معروفة في بعض البلدان انها تكون في ممرات وبين ازقة على قولتهم ومكانهم الحالي فيه ممر طويل او زقاق علشان جذي يركب عليه اسم لوكاندا 🙂 خوووش لوكاندا كويتية والله
كل الشكر لسناء الخرجي وساره الحاتم على الضيافه الجميله والمكان الرائع استمتعنا بوجودنا عندكم اليوم وعسى الله يوفقكم
Locanda Restaurant Located in Shuwaikh, behind Tilal
Tel : 60666711 – 24929202
وين مكانهمم بالضبط الشويخ مجمع التلال ولا صوبهم
لان حيل قريب يم دوامي
اذا صار هوم سنتر يمينج والتلال شمالج كملي سيدة بعد التقاطع المبنى اللي على يمينج وجدامه مكتبة
يسلموووووووووووو
مطعم جمييييييل
شكله يشوق يبيلنا روحه روعه
مو صغير وايد من داخل ؟ جنه حسيت الطاولات واي يم بعض
جايز بالطبيعه غير
بس كل شي يشوق الله يوفقهم ومشكووورة
الله يوفقهم دزاين جميل ورائع
يحتاج الى زيارة لان الى الان مانقدر نحكم على جودة الأكل
بالعافية مقدما
اهو صغير بس مرتبينه عدل .. لا الطاولات مو وايد لازقين في مطاعم طاولة في بطن الثانية
Wow very nice shaklah eyshaweq
اي المكان حلو وهادي
ياسلاااااااااااام بكرا بروحله وحياكم معزومين
بالعافية اخوي
أهــديكم ثمـانية حكــم أعجبتني:
1■إن كنت في الصلاة فاحفظ قلبك
(أي لاتنشغل في شئ آخر )
2■وإن كنت في مجالس الناس فاحفظ لسانك
3■وإن كنت في بيوت الناس فاحفظ بصرك
4■وإن كنت على طعام فاحفظ معدتك
♣واثنـان لاتذكرهما أبدآ :
5■إساءة الناس إليك
6■وإحسانك إلى الناس
♣واثنتان لا تنساهما أبدآ :
7■الله جل شأنه …
8■الدار الآخرة…
ومما راق لي
Comments are closed.