يمكن من فتحت البلوق على هالدومين ماتكلمت بموضوع شخصي مع قرائي
من فتره ودي اكتب موضوع عن الكلام اللي يوصلنا من الناس من ورانا وادري مو بروحي اكيد اخواني وخواتي المدونين مارين بهالشي مثلي تماماً
في ناس تذكر ربها وتمدح وتشكرنا على توصيل المعلومات وكل ما يدور بديرتنا الغاليه وهالشي يفرح اصحاب المدونة ماتدرون كلمة شكراً شنو تأثيرها علينا
وفي ناس علبالهم هالشي يوووصل بكل سهاله وان المدون مجرد انسان ماعنده هدف بالحياة كله هايت وماخذ الدنيا وناسه وهدايا وتجربه مطاعم بلاش
هالاشخاص احب اقولهم ترى شغلنا مو هيَن لكن نسويه لأنه نحبه مو فرض علينا ولا اهي مهنه لو ماسويناها بينخصم من راتبنا
هالشي ياخذ من وقتنا وما اجذب اذا قلت حتى من صحتنا ووقتنا مع عوايلنا لكن الحب ومايسوي وعلى فكرة حياتنا عادية مثلكم تماماً لكن الشي الوحيد انها مكشوفة جدامكم لأنكم تشوفون وين رحنا ومن وين يينا
اما اللي يقول سهاله ترى طلعة الاماكن وتصويرها يمكن هيَن لكن تصغير الصور وترتيبها وتحميلها على المدونة والكتابة تاخذ وقت وتقص ظهرنا قعدتنا على اللاب توب وتروح عيونا من الشاشة وليلنا يروح علشان انزَل بوست واحد لكن حبنا لهالشغله مو مخلينا نهتم وتوصيل المعلومات لكم وانتوا قاعدين تقرونها ب 5 دقايق ويمكن اقل نستحق عليه على الاقل كلمة شكراً موو واااي بل عليهم مايقعدون ببيوتهم ولا مصيبه كل شي اييهم بلاش ولا مابقى شي المطعم ما قدمه لهم .. اذا لكم مقاقه وقادرين ترى الشاطر يفرض نفسه وعسى الله يرزقكم ونعين ونعاون بعد 🙂
وحق كل اللي تعرفت عليهم عن طريق مدونتي العزيزة وحق كل اللي يشجع ويذكر ربه ويدعيلنا بظهر الغيب انا اقولكم شكراً لكم وعسى الله لا يخليني وربي خير حافظ 😀
الله يسامحهم
بالعكس والله والله ان مدونتج
بالشاشه حاطتها وبالنسبه لي شي كبيييييير مهم
لازم اطل عليها باليوم اكثر من ٤مرات
احب بساطتج
واحب اسلوبج
واحب اختياراتج
واحب تناسقج
واحب اهتمامج
كل الي اقوله لج ومثل كل مره الله يوفقج دنيا واخره
ويرضى عليج يارب
بعد عمري مشكورة على هالدعوه الطيبة وعسى الله لا يخليني من الناس السنعه :*
مشكورة حبيبتي على هالمدونة الحلوة :* و على الاسلوب الراقي و المواضيع الحلوة.. ما عليك من هاالناس اللي ماعندها احساس و لا شعور بالعكس عيشي حياتك!! و اخذي الكلام الزين من الناس و خلي الشين !! و اخذيها نصيحة مني هم ترى غيرانين منك !!
و بالتوفيق حبيبتي لك و لكل المدونين <3
العفو حبيبتي وتسلمين على الكلام الحلو بحق المدونة وتسعدني متابعتج يالحبيبة :*
العفو يا قلبي !! و لا تزعلين عمرك :*
allaaah ya36eekom alf 3afyaa, wallaah entaw mashala 3alaikom ta3abkom embayen oo nadre ena mo sa’hil, 9ij 9ij 7imdelaa ena 3endena nas nafskom 🙂 emwafgeeeeeen oo allaah ya36ekom il 9e7a wiil 3afya
7bebty mashkora ma ga9rtay o allah y3afech ya rabi 🙂
ma 3alech mn el 3thal o alah e7afthch o ya7mech mn 3yonhom yal ghalia :* teslm edch o thankssssss for every word u type ya galbi
allah ysalmich 7yaty entaaay :*
للأسف هاذي ناس مريضة والحساد تارسين الديرة …ربي يوفقج والى الإمام دائما صديقتي الصدوقة
حبيبتي فنوون مشكورة يالغاليه :*
يممممممممممممممه فديت المعصبييييييييييين
لووووول بنكوووو عيشي حياتج وبالطقاق يطق الي مو عاجبه
مو ذنبج انج ناجحه
في ناس تشوف المطاعم بس اكل واحنا نشوفها اكل وديكورات وخدمة و معلومات .. ما يدرون ان التواصل الاجتماعي اصبح مادة تدرس بالجامعات .. بس فديتج مو لايق عليج الزعل .. وعلي قولة القايل دائما الشجرة المثمرة تقذف بحجاره ….
واذا احنا هايتين شنو مشكلتهم متزوجين اخوهم ولا عمهم ولا ابوهم .. كيفنا نطلع ونروح ونرد على الاقل لو طلعنا لمطعم عندنا هدف نصور ونكتب مو نقعد بالمطاعم نحش ونغازل …
مولايق عليج الاعصاب كلش (قراءها ترى اطيب من قلب هالبنت ماكو فا عرفوا ان بس مترفزه بس ماتعرف تعصب كلش)
لووول يختج يحرووون كلمه من هني وكلمه من هني يخلون الواحد غصب يعصب وانا من زمان ما عصبت صراحه فيني كبت لوول
حبيبتي رينووو مشكورة على الكلام وعسى الله يحفظنا من هالناس
ماعليج من احد.. القافلة تسير وال….. تنبح!
انتي من سنين ما شاء الله مو توج بالمجال.. انا اللي توني مبلشة بسم الله بالألف والباء وينظلون! على شنو؟ كل اللي نسويه من الناس وللناس! محد بياخذ رزق أحد ولا احد قاعد يمشي لنا كروة على هالمجهود الشخصي!
بس دايما اقول الشجرة المثمرة تقذف بالصخر.. ما عليج بنوكة انتي بالمقدمة وغيرج ورى..
Keep going and posting more things :**
حبيبتي مراوي عسى الله يوفقج ويكفيج شر اللي ينظلون ويبعدهم عنا
ومشكورة حياتي :*
الصراحه اتفق معاج بكل كلمه قلتيها ما ادري شنو يضر اذا احد قال ماشاء الله او عليهم بالعافيه وما في احد بالدنيا ياخذ الشي زاهب امزهب كل شي بحسابه
والصراحه تستاهلين كل شي طيب يصيرلج وعليج بالف عافيه وارد اقولها مره ثانيه احبج واحب مدونتج
بعد قلبي انتي حبتج العافيه وصاجه ربي كاتب كل شي بحساب وتستاهلين الطيب يالغاليه
يا جبل لا يهزك ريح هذيلة اللي يسمونهم أعداء النجاح بالعكس احنا نقدر جهودكم وتعبكم ومستانسين على شغلكم الله يعطيكم الصحة والعافية والله يوفقكم
حياتي الله يعافيج ياربي ويوفق الجميع ان شاء الله ومشكورة حبيبتي :*
Wayhh m3alaich minhum! La t7ireen nafsich ohma ystansoun a9lan itha 3rfo ina kalamhum thayigich..hatha ily yabouna! Mn 9ijich 6awfay .. Wala mashala your blog imbayin t3bana 3laih o kilshay 7lu mashala!.. O yfeedna wayiid itha nabi n3arf 3an ilm6a3im gabil la nrou7 o ntwahag.. Oo Alah ywafgich ;*
Itha ma 3rafteeni ana bnt i5t ilmoqadad;p (ilnisra)
loool b3d chabdi alnisra o omha 😛 thank u badoraah bs shasawe 6ala3t eli fe galbiiii hal nas emoton 3la al lok lok 😛
dears in PinkGirl
عادة احب اكتب بالعربي بس صعب علي. الانجليزي للاسف لغتي الام بالكتابة .. بس كلمة حق و راح اقولها باسم فريق ليتس بوبكورن:
احنا كان لنا اكبر شرف و فخر ان مدونتكم اول من زار مشروعنا في بداياته
و كنا محظوظين بمتابعة كتاباتكم ، ما اريد ان اقوله انكم بهذه الشبكة عن مشروع متكامل قائم في ذاته . و موسوعة (وصلة ربط) بين اصحاب المشاريع الصغيرة في دولة الكويت الحبيبة.
نحن تعرضنا و لازلنا نتعرض للضرب تحت الحزام … ردنا الوحيد : حسبنا الله و نعم الوكيل
و كلمة تقال لنا دائما : يا جبل ما يهزك ريح
لا تدعوا اعداء النجــــاح يأثروا فيكم .. سيروا طوروا و تطوروا .. ابدعوا … و كما انتم مع الكثير .. ف ان شاء الله نحن معكم
REAL Blog is a true mirror of the society and surrounding updates.. never ever … SLOW DOWN
Let’s Popcorn TEAM
مشكورين واااايد هالكلام فعلا يخلي الواحد عنده باور ويبي يقدم اكثر 🙂
عسى الله يوفقنا وياكم ويكافينا شر الناس المريضة
امين يا رب العالمين … و احنا تعلمنا في هالكم شهر : الشجرة المثمرة فقط تلقى بالحجارة !!! و لانكم اثمرتم بدوأ بالحصى.
و اكرر : انتم مشروع قائم و بيدكم تطويره وجعله اكثر من مجرد مادة قراءة … انتظروا منا مكالمة قربيا :)))
قبل كل شي الله يوفقج ان شاء الله بحياتج الخاصة والبلووق وماعليج منهم ناس فاضية عبالهم هالشي سهل والله يكون بعونج وانا حسيت بهالشي من بطلت البلوق وانا صارلي بس ٤ شهور ما اقول الا الله يحفظج من عيون الناس وموفقه يااااااااارب
بعد قلبي مشكورة على الكلام الطيب والدعوه الحلوة وعسى ربي يوفقج :*
(الشجرة المثمرة دائما ترمى بالحجر)
حبيبتي والله الله يعطيج العافية انتي و كل البلوجرز بالعكس احنا نقدر جهودكم المبذولة بالبلوقز و المعلومات الحلوة والمهمة الي توصلونهالنا بطريقة حلوة والناس الي تتحجى عنكم هذوله ناس فاضيةو مو امحصلة شي بحياتهاو محترة من الشعبية و المكانة الي وصلتولهافي الكويت. لا تحطون في بالكم والحقران يقطع المصران 🙂
بعد قلبي ام فواز الله يعافيج ولا يحرمنا من الناس السنعه اللي مثلج وشرواج :*
لا ترمى الا الشجرة المثمره
و انتي ما شاء الله عليج قديمه بالمجال من قبل لا يصير هبة الناس بالكويت و الشهره صعبه و حسابها على نفسج الله يكافيج شر هالناس و يقويج ربي و يعينج و انتي الحمدلله نيتج صافيه و كل ما تكتبينه بالبلوق يعبر عن مبدأ احب لاخيك ما تحبه لنفسك و تشاركيننا بتجاربج و خبراتج في الحياه
ارجع و اقول لا يهمونج و استمري بالعطاء و شكرا من القلب بنكي
الله يشهد انج عزيزه و اخت دنيا
مع تمنياتي لج بالتوفيق دوما 🙂
حبيبتي والله منورة ربي يعز شانج والقلوب شواهد يالغاليه
وصاجة انا مو من النوع اللي يحب يغبي حتى بحياتي الخاصه
ربي يوفق الجميع ومشكورة يالغاليه :*
الله يعطيج الصحه والعافيه أولا … وثانيا : ارضاء الناس غاية لاتدرك .. اذا رحتي يمين قالوا ليش ؟؟ واذا رحتي شمال قالوا اشمعنى !!! واذا كملتي سيييده قالو: شكووووو؟؟ ههههههه للأسف مجتمعنا صار بهالعقليه ، مايبون احد ينتقدهم أو يتدخل بشؤونهم بس طبعا اهم لهم عيون يبققونها على غيرهم وينتقدونهم بعد …………….. قطوتنا الحلوه الي دايما نستمتع بصورها وتعليقاتها ونتابع مدونتها عشان انتابع كل يديد سواء عجبنا ولا لأ … عسى الله يعطيج الصحه والعافيه وتعودي أي شي يضايقج خليه ورا ظهرج وكملي .. وكلمه حق الي ينتقدون كل شي و أي شي … عيشو حياتكم وشوفوا الحياة بنظره حلوه وايجابيه وتأكدو انكم انتوا الي بترتاحون 🙂
بعد قلبي انتي مشكوووورة وايد على الكلام الطيب بصراحه عقب كلامج يعجز لساني عن التعبير ربي لا يخليني من امثالج وتسلمين على الدعاء :*
على فكره نسيت أقول حق شي عن *بينك *محد يدري عنه حتى اهي نفسها … بينك ساعدت ناس وايد وبأسلوب غير مباشر .. بتسويق منتجاتهم وكانت خير قدوه لدعم المنتجات خاصة شغل البيوت الي بمساعدتها قامت مشاريع وايد . وماتطلب من أي أحد مقابل نشر شي في مدونتها .. عسى الله يعطيج الصحه والعافيه ويسر أمورج مثل مايسرتيها على غيرج
يعطيكم الف عافيه ومنها للاعلى انشالله
على هالشغل الراقي والممتع وانا عن نفسي كل يوم اتابعكم واستمتع معاكم وحتى وانا مشغوله احس لا زم افتح السايت عشان مايطوفني شي 🙂
صالون وسبا فلولس للسيدات
الله يعافيج حبيبتي وتسعدنا متابعتج يالغاليه عسى ربي يوفقج :*
ياحبيبتي اللي مايطول العنب شيقوووول؟حااامض مايهمج كلام الحساد ولوما الحسد مامات احد كملي درب اللي انشاله دايم منور وخضر وموفقه انتي واللي معاج ربي يبعد عنكم شر الحاسدين
حبيبتي برور يسلم لي قليبج الخضر عسى الله لا يخليني :*
صراحه اقولج يعطيج العافيه
انا من المتابعين لمدونتج مع اني بحرينية لكن تعودت اني كل يوم ادش مدونتج واقرى شنو اليديد اللي كاتبه
وماعليج من كلام الناس لان يبين ان انتي وباقي المدونين وايد تتعبون فاللي تسوونه
الله يبعد عنكم الحساد ان شاء الله
حيا الله اهل البحرين نور العين .. الله يعافيج يالشيخه ومشكورة على المتابعه عساني ما انحرم منكم :*
Whoever thinks blogging is easy have no idea what kind of effort and hard work is put behind this screen! Having to go to events, having to be there when invited, reviewing, taking pictures, uploading, and writing!
Having to be updated at all times isn’t easy at all, and it’s time and effort consuming to the least! It’s hard work and success does not come easy!
that why i am shocked from some people who want just to talk and they didnt know what is the hard work we do to get them the subjects
قواچ الله وما عليچ منهم خليهم يقولون اللي يقولونه محترين/ الله يعطيكم العافيه ومالنا غنات عنكم انتو اللي تنورونا وتساعدونا وتسهلون علينا أصلاً… الله يكافيكم الشر ويحفظكم ويوفقكم
الله يقويج حبيبتي ومشكوووورة على الدعوه الطيبة عساني ما انحرم ياربي :*
you are my NUMBER 1 BLOGGER
منزماااان وانا اتابعج
والحين خليت اختي تتابعج 🙂
ماشاءالله مواضيعج وبوستاتج جدا احبها واستفيد منها وتخلينا دايما اب ديت مع اللي قاعد
يصير حوالينا
رووحج المرحة واصلة لنا
بلوقج اول بلوق افتحه كل يوم
خلي اللي يتحلطمون على كتر،،محترين وموحاصلهم
عسى الله يوفقج ومنها للاعلى واحنا معاج على طول 🙂
فديتج انتي واخيتج وعساني ما انحرم منكم يالغاليه ومشكورة على الدعوه اجمعين يارب
بعد عمري بنكش ولا تضيقين خلقج
الله يشهد ان مدونتج مبين فيها الجهد والتعب وما تقصرين اللي قاعده تعطينا الزبده من غير ما نتعب فيها
واهم شي المصداقيه اللي تتميزين فيها
الناس على كل شي تتكلم وبكل شي تنتقد .. طوفي حبيبتي والكلمه اللي ما تبرد قلبج قطيها وره ظهرج
وانتي تستاهلين الشكر واحنا مقصرين فيه قاعد ناخذ المعلومه زاهبه مزهبه
مشكوره مشكوره مشكوره
فديتج :*
يا بعد قلبي انتي والله مادري شقولج عقب كلامج وصاجه من يوم ورايح بقط كل شي ورا ظهري واهم ما علي الناس السنعه امثالكم :*
وي وي وي من اللي مكدر خاطرك و مضيق خليقج آفا والله ماتستاهلين بالعكس بيض الله ويهج وبارك الله فيج على هالعمل الرااااااائع
بعد قلبي مشكورة على الكلام الحلو والدعاء الطيب تسلمين على المتابعه يالغاليه :*
والله ان صار لي فترة طويلة متابعتك بشكل يومي و مستفيدة منج بشكل ماتتخيلينه وادعيلك ان الله يوفقج ويبارك لج كل شغلج ، والله شغلج موووووو سهل أبدا
تسلمين على البوست
الصراحه هذا اللي بخاطري
والكثير من الناس ما يكملون دقيقة بالموضوع
طبعاً انا ما انطر التعليقات
كثر ما اني اشوف ان الموضوع اخذ حقه من القرايه
مرات نتعب على موضوع وياخذ 4 الى 5 ساعات من الشغل المتواصل
” خصوصاً التقارير الدسمة ”
وبالاخير .. تنصدمين ان معدل مشاهدة الموضوع ما تكمل دقيقة
بس الحمدلله ان في احد شاف الموضوع 😛
الله يسلمك اخوي عبدالله
اغلب القراء صامتين يقرون بس مايعلقون انا ما عندي مشكله بهالشي
لكن انك تتعب واييك كلام يغثك يحروون
وعلى فكرة التقارير الدسمة ترى يرجعون لها اكثر وقت اللي يحتاجونها لا تشيل هم 🙂
انطلقي يا وخيتي ولا تهتمين حق كلام الناس اللي يغث
والكلام السنع اللي اهتميله واكيد اللي ينتقدج بالشي الشين محتر منج
ولو انتي مدونتج ماتهبل جان ماوصلتي لهل عدد من القراء
استمري ومنها للاعلى يا البيج بوس هيههيههههيههي
ههههههه حبيبتي اخيتي فديتج :*
كلامج عدل مدل ..في ناس لا اله الا الله تحسد الفقير على موتت يوم اليمعه
انتي ماشاء الله قدوه و اكثر المدونين يحاولون يصيرون مثلج
و الصراحه في ناس ماتقدر كلش و في ناس بالعكس وايد يشجعون و يمدحون
عالم التدوين وايد حلو
تحسينه جنه ولدج تحاتينه و تفكرين فيه
انا اقولج خل اولون بالعكس الي يتكلم جذي محتر وحاسدج
موفقه يارب
بعد قلبي اجمعين يارب والله يكافينا شر الحساد :*
الناس الفاضيه ما عندهم غير الكلام وانتي إنسانة مشغوله. لا اتضيعين وقتج لهم والله ايوفقج
اي والله فاضيين .. يوفق الجميع يارب مشكووورة :*
3eeen el3agel wallah, 9a7 ynga9 thaharna ga9 hatha o gher elkalam elli t7a9leena mn ahalech aw raylech le2anna 7a6een 7elna bel ketabah bs nsaweh le2anna n7ebba! 🙂
allah yarzegech ya rb o ya36eech 3la gad netech :*
7iaaty swera ajm3eeen ya rabiiii :*
يعطيج مليوون ستين الف عافيه
انتي مميزه بين كل البلوقات اشوفج وسبق وقتلج شغلج مميز لان كله اجتهادات شخصيه واضحه
بس شغل اكيد وتعبج مايروح على الفاضي انا عن نفسي ليه بقيت اجرب مطعم ولاشي يديد على طول فتحت بلوقج
:*
الله يعافيج حياتي .. البلوق مميز بقرائي المميزين وانتي وحده منهم يالغاليه فديت قلبج :*
ely thayegch akeed ma shafech o lo eshofech yet7asaf enty ma testahleen ely alklam alzain edesheen algalb eb 6eebtech o alnas al6aiba alla emayezha o ewafegha XXxoxo
7bebty miraa ma 3leech zood enty al6eeeb kila wallaah .. luv u :*
قواج الله حبيبتى وان شاء الله كلام الناس ما تأثر بعطائج الأكثر من متميز ورائع
ومدونتج من أساسيات تصفحي اليومي بالنت ووايد استفدت منج
والله يتمم عليج هالنجاح ويعطيج الصحه والعافيه ياااارب
ان شاء الله ما راح يأثر لأني حابة اللي اسويه ومجرد كان شي بخاطري وفضفضت لخواتي واخواني قراء مدونتي اللي احبهم واليوم عرفت شكثر معزتي عندكم عسى الله لا يخليني :*
افضل شي اقوله لج اهو الدعاء
الله يوفقج ويزيدج من خيره ويعطيج الصحه والعافيه ومنها
للأعلى
يا بعد عمري والله احلى دعاء ماقصرتي :*
ـ الله يعطيج الف عافيه ولاتزعلين احنا مانقدر على زعلج ـ بس للامانه من اهم المدونات الي احرص عليها يوميا مدونتج لانها متنوعه وبسيطه وسريعه ويضيق خلقي اذا مر يوم ماكتبتي شي .. ماعليج هذا ضريبة النجاح ربي يوفقج ويسهل امورج يارب