مع دخول شهر رمضان الكريم تبدا القنوات الفضائيه تبث الدعايات الجديده واللي يتفنون فيها لجذب المشاهد
اول من نزل دعايه هالسنه شراب راوخ
انا انصدمت انه المشاركين هالسنه بالدعايه هلا وبيبي ! فراشتين بالسوشال ميديا
اتوقع باجر بنشوف ناس اكثر من نجوم السوشال ميديا دخلوا عالم الدعايات التجاريه
عاد يوم التواصل الاجتماعي العالمي وعادت فناتق زين 🙂
وصلتني الدعوه في بوكس مرتب عليه اسم المدونه
فتحته لقيت ووك مان !! شخباااري 🙂 صج من زمن الطيبين
ومعاه فلاش ميموري وكنت متأكده الدعوه بتكون بالاسم لانه زين تميزت بهالسالفه خصوصا بهاليوم العالمي
الاغنيه بصوت مروه بن صغير وعبدالعزيز النصرالله
وثل ما عودونا زين لازم يكون الاحتفال في مكان يديد ومختلف
مكان الحفل كان في القاعه الجديده في برستيج الافنيوز
دخلتها بروحها والفاليه الخدمه ممتازه وايد عجبتني
طبعا استقبلونا فريق التواصل الاجتماعي بشركة زين مثل كل سنه الله يعطيهم العافيه وسلمونا بطايق للسحوبات المختلفه اللي بيسوونها اثناء اقامة الحفل
القاعه مرتبه والتنظيم جميل وحتى اهل الكره مانسوهم ونقلولهم مباريات كاس العالم
يعني مافاتهم شي
هالمره الايكونز صاروا على الطاولات ههههه فكره حلوه حق السيلفي
استانسنا عليهم
على الطاولات حاطين بعض الاطباق الخفيفه
مسوين سكشن خاص للتصوير 🙂
اي والله احببببببكم
مقدم الحفل كان مايك مبلتع وحمــزه
فقرات الحفل كانت منوعه بين مسابقات وسحوبات اضافه الى وجود جرس لمن يجرء للتحدث عن مشواره في السوشال ميديا
والله الجريئين وايد ماشاء الله عليهم 🙂
واستضافوا ايضا المقدم يوسف الحبيب من اداره الجرائم الالكترونيه في وزارة الداخليه والسيد علي الحبشي وتكلم عن كيفيه اخذ الحذر من الهكرز وطريقة حمايه الحسابات في مواقع التواصل الاجتماعي والمدونات وكانت هناك كلمه من دكتورة الاسنان نوره رمضان عن تعاملها مع الفلولورز في الانستغرام وتقديم الاستشارات المجانيه عبر ردها عليهم
وكعادته كل سنه يقول كلمته بأسلوبه الطريف اللي تعودنا عليه السيد محمد المهيني من فريق السوشال ميديا في شركة زين 🙂 ثالث سنه وعقبال الميه 🙂
فيديو لبعض مشاهير الانستغرام في ميكس طريف
وفجأه انتشروا مصورين الفوري في القاعه
ونااااسه 🙂
حبيت الحركه
وصار وقت القهوه والحلو
حلوياتهم من لينوتر
صوره لاسرة شركة زين
والختام مع سيلفي كبير للحضور 🙂
كل الشكر لشركة زين على انكم قاعدين تيمعونا كل سنه ودايما يمعاتكم اهي الاجمل والاكمل وقواكم الله فريق السوشال ميديا 🙂
الشكر موصول للشركة المنظمه سنيار اللي دايما شغلهم ١٠ علي ١٠ قواكم الله
على الوعد السنه القادمه بإذن الله وناطرين الفناتق اليديده 🙂
بسفرتي الاخيره لدبي كنت رايحه الجي بي ار ولفت نظري فندق اوشن فيو فقلت اذا الله كتب المره اليايه بسوي سيرج عنه واذا زين بحجز فيه
وفعلا لما حصلت لي سفره لدبي وكان خاطري بمكان قريب للبحر سويت سيرج ودخلت الموقع شفت الغرف كل شي يبشر بخير فحجزت عن طريق موقع بوكينج ٤ ليالي وطبعا يحجزون مبلغ معين لكن حطوا بالكم اذابتحجزون هذا مو السعر النهائي لانه في تاكس وسوالف جذي يزيد المبلغ بنسبه مو قليله والله خصوصا في دبي الكل ملاحظ هالشي
الفندق تلقونه تقريبا بنهايه شارع الجي بي ار
البوست طويل شوي بس علشان بحطكم بالصوره كامله واراويكم الفندق والشاطيء
اللوبي مجكنم وفيه محل صغير وكافيه ومطعم
استقبالهم كان ممتاز وطلبت منهم الغرفه تكون جهة البحر ووقعت الاوراق وخذوا التأمين ٥٠٠ درهم واستلمت كروت الغرفه
الغرفه كانت حلوه اثاث يديد ونظيف ومرتبه والوانها حلوه والسرير مريح والبرنده قعدتها حلوه
المنظر من البرنده
حمام السباحه
الريوق
خوش مطعم عود ماشاء الله
البوفيه مفتوح وكل خير الله فيه
حمام السباحه والشاطيء
مع كرت الغرفه تلقون كرت خاص لعدة البحر
تسلمونها كشك صغير عند حمام السباحه ويعطونكم جنطه فيها فوطتين والقطعه اللي يفرشونها على الرمل مادري شسمها وشمسيه
واذا رديتوهم تستلمون الكرت مره ثانيه
الحمام سباااحه نظيف جدا و مو عميق يعني نسبة العمق عاديه اللي فوق متر و ٦٥ لهم قيش 😛
بعض حمامات السباحه يمنعون اللي يلبسون مايوهات اسلاميه بحجة والله الملابس طويله بس الحمدلله عندهم محد تكلم والوضع طبيعي جدا
وسياستهم مثل كل هالاماكن اي ياهل اقل من ١٦ سنه لازم اهله معاه ولا مايدخل
طبعا مراوح الماي موجوده وشغل عدل حتى حق اللي بيقعد بالمطعم الموجود على حمام السباحه
وقت الغدا قلنا محنا طالعين وبنجرب اكلهم
طلبنا مقبلات شرقيه .. نتيييييفه بس لذيذ
وبيتزا مارغريتا كانت طيبه
وهذا الفيو الليلي للمكان
الشاطيء قريب من الفندق بس يبيله مشيه شويه لانه المنفذ اللي جدام الفندق مسكر قاعدين يسوون صيانه لبعض المباني
والحلو بالفندق انهم حاطين مصعد خاص من حمام السباحه تنزلين لي الشارع بدون لاتمرين باللوبي خوش شي
الشاطيء مرتب يهبل وكله مطاعم اشكال والالوان وبعض المحلات وسوبرماركت وسينما و واي فاي مجاني
الحمامات مكرم السامع نظيفه
الماي اينن والرمل نظيف مايعور الريل وماتحتاجون جوتي بحر كلش
فرشنا شمسيتنا
عيب الفندق انه مافيه خدمات على الشاطىء يعني لا ماي لا عصير لازم تشترون من هالمطاعم والماي ب٢٠ درهم تخيلوا
فحطوا في بالكم انكم تييبون كل شغلكم معاكم
الشركه اللي على الشاطىء توفر لكم سراير البحر وتقدرون تأجرونهم بقيمه ٥٠ درهم طول اليوم
آخر ليله في الفندق ردينا من بره لقينا هالبطه الحلوه هديه وذكرى حلوه لاقامتنا فيه مع استبيان علشان يعرفون راينا بكل شي
الفندق انصح فيه بصراحه نظافه ومعامله وترتيب
قبل لا اروح دبي كنت حاطه في بالي اماكن معينه بروح لهم وفي ناس بعد بالانستغرام مدحولي اماكن من ضمنهم هالمخبز
مخبز ياباني هذا اول فرع له في الشرق الاوسط
المكان اللي اهو فيه اسمه مجمع الوصل سكوير اهو مكان مفتوح وفيه جم محل وكافيه بس عموما ماعليه ضغط يعني اذا بتروحون بتتعنون لمكان معين حتى التكاسي اغلبهم مايعرفونه الا اذا عطيتوهم رقم المكان واهم يوصفونه
المهم اهو كافيه ويقدم معجنات بأشكال وساندويتش واكيد مشروبات
ايس كريم ماچا
خذينا جم قطعه تيك اوي نجربه
الهيلوكيتي على نوتيلا ودونتس وهوت دوق
كان طيب والعجينه ترفه بس مو مال عنوه بصراحه لانه المكان مثل ماقلت ماعليه ضغط وطريقة المعجنات موجوده عندنا بالكويت في مخبز ليشس فما حسيت في شي يديد
Yamanote Atelier is located in Al Wasl Square Complex on Al Wasl Road
Tel : 043881811
Instagram @YamanoteAtelier
على كثر مارحت دبي مول ودخلت السينما مادري ليش مافكرت ادش الڤي اي بي او البلاتينيوم
لكن هالمره عزمت عليها لانه مدحتها لي بنت عمي
احلى شي انه من قوانين البلاتينيوم عدم دخول من اهم اقل من ١٨ سنه
يعني ماكو واق وويق وازعاج
حجزنا تذكرتنا بقيمة ١٣٠ درهم لفيلم
The Fault in our Stars
وصعدنا الدور الرابع مكان السينما
مكان الانتظار يشوق جنه لوبي في فندق
مطعم خاص للبلاتينيوم مو بس نفيش وناتشوز !! عصاير وبرجر وفرايز انواع وسلطات وشوربات وغيره وكل شي بسعره
الممر
الكراسي شي مو طبيعي مرررررريحين جنهم فراش شغل عدل الواحد ماوده يقوم عقب الفيلم
واول ماتقعدون تييكم اللي تشتغل تعطيكم مخده وكنبل مرتبين
طلباتنا وصلت
وفيه دقمه خاصه على الطاوله تضغطونها اذا تبون شي
بصراحه تجربه عجيبه وتستاهل الفلوس اللي اندفعت فيها
الواحد وده يغير ويدلع عمره شوي مايضر ندفع هالمبلغ لقاء تجربه وخدمه ممتازه 🙂
مطعم منقوشه بكل مناسبه يقدمون شي مميز لزباينهم
سبق ووصلتني منهم مشروحه لعيد الام
وهالمره مسوين عرض جميل لمباريات كأس العالم بتقديمهم فطاير او مشروحه على اعلام الدول المشاركة
الاسبوع اللي طاف وانا مسافره وصلولي مشروحه على علم اسبانيا صورها لي الوالد
ومكونه من الدياي بالنص واللحم المفروم الحار على الجانبين
للطلب : ١٨٣٨٣٠٣
Instagram @Manousheq8