عادة تسجيل المسلسلات والبرامج وحتى الكرتون موجودة كانت عند اغلب الكويتيين قبل ظهور اليوتيوب والسوشال ميديا خصوصاً بالمواسم مثل الاعياد الوطنية ورمضان والعيد وغيرها ويمكن شهر رمضان المبارك كانت فتره خصبه للفيديو يشتغل بضمير

VHS و Betamax جيلي لا تقولون ما لحقتوا على اشرطة ال 😛

على فكره هالتراث الغالي على قلبي ليلحين احتفظ فيه من الاثنين 🙂 وصعب التفريط فيهم بصراحه رغم وجود الديفيدي لكن لهم معزه خاصه

المهم بما ان ما بقى شي على شهر رمضان وكل سنة الوالد ينقل لنا بكراتين الاشرطه قبل شهر علشان ما يخلصون من السوق وبقولكم شي بس لا تعلمون ترى ليلحين فيني طبع التسجل خاصه برمضان 🙂

تذكرون بعد صلاة المغرب يحطون لنا مسلسل كارتون يديد ونتسبه ماندري ناكل ولا نجابل التلفزيون هههههه يا حلو ذيج الايام توتا في كوكب المريخ وسالي وفلونه ولولو الصغيره وغراندايزر والسنافر والشناكل والسندباد وربعهم .. اراهنكم لو افتح لكم واحد من الاشرطه بيرد لكم تسبهه اول وبتجابلون الشريط طول اليوم باختصار لأنه قبل غير وكل شي فيه غير ومهما نعيد فيه لا يمكن نمل ونرد نشوفه مثل ما شفناه اول مره

بعد المسلسل الكارتوني كان تلفزيون الكويت بعصره الجميل يعرض اجمل واحلى مسلسلات الاطفال كانت الميزانية بذاك الوقت مو مهمه كثر القيمه والهدف اللي يقدمه المسلسل .. كان الصرف على الملابس والاغاني والديكور وكانت اغلب اعمال الاطفال تراثية مثل الغرباء والمغامرون الثلاثة وجحا ومدينة الرياح والطماعون وكلها كانت مكلفه مادياً لكن ممتعه ومتابعه من كل اطفال الخليج .. اما الحين مع الاسف ما قمنا نشوف هالاشياء الحلوة وجان زين لو يردون تنعاد لنا مثل هالمسلسلات وياخذونها كفكره ان كل رمضان يعيدون لنا جزء مما قدم في سنوات المجد ويطلعون لنا كنوز الارشيف بدال ارشفته والغبار اللي عليه

الساعه 10 كان موعد مسلسلات الكبار ويبدا المداحر بين الوالدة والوالد وبينا ناموووووووو ناموووووو لا نبي نشوف المسلسل الله يخليكم بس نشوفه واناااام هههههههه موال كل يوم ويا زينه من موال مو الحين كل واحد بغرفته وسهر لي الفجر

مسلسلات منحفره بالذاكره مثل خالتي قماشه وعلى الدنيا السلام والدانه والاسوار ودرس خصوصي ودرب الزلق والاقدار وغيرها من المسلسلات الكويتية الجميلة الهادفه الراقيه بالطرح

اتذكر برمضان كانوا يحطون مسلسلات ال 30 حلقه وبغير رمضان كان فيه مسلسلات بو 15 حلقة او ثلاثيات وسباعيات وسهرات بعد الحين ماكو الا 30 حلقه وبس

وما يمر العيد الا واحنا رايحين هالمسرحيات الزينه واغلبها كان يعرض على مسرح كيفان ومسرح سينما السالمية ولازم عقب المسرحية ندخل نصور مع الممثلين ونعطيهم وردة ومانطلع من المسرح الا شريط اغاني المسرحية الكاسيت بالإيد ونحفظه صم اكثر من دروسنا 🙂  هههههه والله ايام حلوة

وبعد ماتطلع المسرحية على الفيديو نأكد على شريط الكاسيت اللي حفظناه ونغني معاهم ههههههه تذكرون ؟ لو البس فستان جديد جنطة بإيد ووردة بإيد .. ولا اممم شتعرف عن النعامه ؟ النعامه طير كبير له جناح وما يطير .. بعد شنو شنو تذكرون ربنا يحرسج حقنا يا ديره الاجداد انتي هوانا وحبنا وانتي اعز بلاد كلنا نحبها الكويت والله نعزها الكويت 🙂

خل اذكركم بجم مقطع من الايام الحلوة

وهالسنه حاطه عيني على ساهر الليل 3 ومزهبه اشرطتي وبسجله ان شاء الله خصوصا انه بيتكلم عن فتره من الفترات الاليمه للكويت الله لا يعودها ويحفظ ديرتنا

قولولي الحين من اللي كان يسجل ؟ ومن اللي ليلحين مستمر بالتسجيل ؟ 🙂