كان المفروض انزل هالبوست قبل رمضان بس انشغلت شوي مع السفره والاهل وماحبيت ينزل البوست بسرعه وانسى شي خصوصاً اني عرفت من ناس وايد انهم مو عارفين بالضبط شنو كيدزانيا ونظام الالعاب فيها

انا كنت كاتبة بوست بسيط عن الافتتاح – اضغط هنـا

وبهالبوست ان شاء الله اقولكم تفصيليا بالصور علشان يستفيدون الامهات والاهل اللي بياخذون اليهال لكيدزانيا

اول شي المكان كلكم تعرفون انه بالافنيوز فيز 3 فوق سوق الذهب على طول

طبعاً دخولي كان علشان ولد اختي الله يحفظه كنت مواعدته اوديه و روحتنا كانت يوم سبت ومع الاسف رحت بال 11 وشوي وكان الطابور وايد طويل وانتظرت مايقارب الساعه وشوي فأنصحكم تروحون مبجر اذا ناوين تروحون بالويك اند خصوصاُ انه يفتحون مبجر بال9

وصلنا الكاونتر ودفعنا الرسوم 12 دك للاطفال و 8 دك للكبار ولبسونا سوار مثل الساعه وسلموا نصوري شيك من البنك الوطني علشان يصرفه فلوس كيدزوز وخريطة للمكان

وخذينا البوردينج (التذاكر) ودخلنا

اول شي قابلنا هالمزايين

المكان كبير والله ماتوقعته جذي انا استانست اكثر من نصوري 🙂

اول شي رحنا البنك الوطني وطلبوا منه نوقف عند الباب ويدخل الطفل فقط علشان يعتمد على نفسه بصرف الشيك وسلموه اذا الفلوس الكيدزوز نسيت جم بالضبط

وثاني شي ركبنا التور باص علشان ناخذ جولة بكيدزانيا ونعرف شكو ماكو .. الاهل يركبون بلاش واليهال يدفعون من الفلوس اللي عندهم

واحنا ماشين بالباص خذيت لكم هالصور

طبعاً قبل اغلب الالعاب يطلبون من اليهال شهادة المحكمه علشان جذي لازم يدخلون المحكمه قبل لا يفترون بكيدزانيا

وهذي الشهاده خذاها ناصر علشان يلعب في باقي الالعاب

حبيت اوضح شي اغلب الالعاب ماسكينها فلبينيين يعني اللغه اللي يكلمون فيها اليهال الانجليزيه ومو كل اليهال يفهون خصوصاُ الصغار

كل لعبة يمها توضيح لها وطريقة لعبها والعمر المسموح فيه للدخول وجم مدتها

وحلم كل الصبيان جيش وشرطة ههههه مادري ليشم و دكتور مهندس ياحلوهم كلهم بيدافعون عن الوطن الله يطرح فيهم البركه

ودخلنا المسرح وكان فيه عرض ازياء لبنوتات اختاروا لبسهم من جيستس

وصار وقت برجر كينج يدخلون اليهال ويلبسونهم المريول ويغطون شعرهم ويلبسونهم كاب ودسوس ويخلونهم يسوون جيز برجر يحطون المكونات ويلفونها وياخذونها معاهم مع الكبوس كهدية

وهني يعلمون اليهال على السياره واجزائها  او شلون يصبون بانزين  وياخذون شهاده وهم فلوس كيدزوز لأنهم اشتغلوا

جريدة الوطن – قسم الصحافه وايد حبيته يلبسونهم الفيست ويعطونهم كرت الصحافه ويصورونهم ويطلعون بتغطية في كيدزانيا واخر شي يسلمونهم فلوس كيدزوز وجريدة عليها صورهم

الخطوط القطرية يخلونهم يصيرون طيارين ويلبسونهم اللبس ويعلمونهم على القياده واجهزة الملاحه

مركز سلطان يختارون اليهال للكاشير او العمال اللي يحطون الاغراض بالجياسه او المتسوقين

طبعاً من كثر الزحمه ماقدر ناصر يلعب وايد العاب مع ان قعدنا فترة طويله من 1 وشي الى 8 الا ربع تقريباً

وانصحكم لاتنسووون شاحن الموبايل انا توهقت ناسيته وماتوقعت اقعد هالكثر بصراحه

طلبت منهم شاحن قالولي ماعندنا واقترحت عليهم يوفرون انواع من الشاحن في المتجر خصوصا ان شي مهم والمكان يحتاج ان الاهل يقعدون فتره كبيره اذا ناوين يجابلون عيالهم بدون تسوق

اما بالنسبة للاكل لا تحاتون كل شي متوفر ما شاء الله برجر كينج – بوتبيلي – بيتزا اكسبرس – ستاربكس وبينك بيري

وحتى مركز سلطان حاطين فرع اكسبرس صغير فيه الاساسيات اللي تحتاجونها

في الارضي مكرم السامع تلقون الحمامات ورا بوتبيلي وهم بالطابق الاول الحمامات والمصلى للحريم والرياييل وستاربكس ثاني للاهل وغرفه راحة للمربيات

طبعاً في مكان خاص تستلمون فيه صور عيالكم اذا مصورينهم احد المصورين في كيدزانيا وتقدرون تحطونهم على المق او الميداليات او صوره عادية وغيرهم من الاشياء

وفي محل كبير عندهم فيه العاب وادوات مكتبية وملابس تنكرية وغيرها خاصه بماركتهم

انصحكم تشترون حق اليهال اول ماتدخلون  البوكت اللي بالصورة اللي فوق يلبسونها برقبتهم ويحطون داخلها فلوسهم والشهادات وكل شيع لشان لا يضيعون واااايد مفيدة بصراحه وقيمتها 2 دك

وقت الطلعه لازم تمرون بكاونتر خاص ياخذ منكم السوار وتتوكلون على الله

ان شاء الله اكون عطيتكم معلومات وافيه تستفيدون منها بزيارتكم للمكان 🙂