كان المفروض انزل هالبوست قبل رمضان بس انشغلت شوي مع السفره والاهل وماحبيت ينزل البوست بسرعه وانسى شي خصوصاً اني عرفت من ناس وايد انهم مو عارفين بالضبط شنو كيدزانيا ونظام الالعاب فيها
انا كنت كاتبة بوست بسيط عن الافتتاح – اضغط هنـا
وبهالبوست ان شاء الله اقولكم تفصيليا بالصور علشان يستفيدون الامهات والاهل اللي بياخذون اليهال لكيدزانيا
اول شي المكان كلكم تعرفون انه بالافنيوز فيز 3 فوق سوق الذهب على طول
طبعاً دخولي كان علشان ولد اختي الله يحفظه كنت مواعدته اوديه و روحتنا كانت يوم سبت ومع الاسف رحت بال 11 وشوي وكان الطابور وايد طويل وانتظرت مايقارب الساعه وشوي فأنصحكم تروحون مبجر اذا ناوين تروحون بالويك اند خصوصاُ انه يفتحون مبجر بال9
وصلنا الكاونتر ودفعنا الرسوم 12 دك للاطفال و 8 دك للكبار ولبسونا سوار مثل الساعه وسلموا نصوري شيك من البنك الوطني علشان يصرفه فلوس كيدزوز وخريطة للمكان
وخذينا البوردينج (التذاكر) ودخلنا
اول شي قابلنا هالمزايين
المكان كبير والله ماتوقعته جذي انا استانست اكثر من نصوري 🙂
اول شي رحنا البنك الوطني وطلبوا منه نوقف عند الباب ويدخل الطفل فقط علشان يعتمد على نفسه بصرف الشيك وسلموه اذا الفلوس الكيدزوز نسيت جم بالضبط
وثاني شي ركبنا التور باص علشان ناخذ جولة بكيدزانيا ونعرف شكو ماكو .. الاهل يركبون بلاش واليهال يدفعون من الفلوس اللي عندهم
واحنا ماشين بالباص خذيت لكم هالصور
طبعاً قبل اغلب الالعاب يطلبون من اليهال شهادة المحكمه علشان جذي لازم يدخلون المحكمه قبل لا يفترون بكيدزانيا
وهذي الشهاده خذاها ناصر علشان يلعب في باقي الالعاب
حبيت اوضح شي اغلب الالعاب ماسكينها فلبينيين يعني اللغه اللي يكلمون فيها اليهال الانجليزيه ومو كل اليهال يفهون خصوصاُ الصغار
كل لعبة يمها توضيح لها وطريقة لعبها والعمر المسموح فيه للدخول وجم مدتها
وحلم كل الصبيان جيش وشرطة ههههه مادري ليشم و دكتور مهندس ياحلوهم كلهم بيدافعون عن الوطن الله يطرح فيهم البركه
ودخلنا المسرح وكان فيه عرض ازياء لبنوتات اختاروا لبسهم من جيستس
وصار وقت برجر كينج يدخلون اليهال ويلبسونهم المريول ويغطون شعرهم ويلبسونهم كاب ودسوس ويخلونهم يسوون جيز برجر يحطون المكونات ويلفونها وياخذونها معاهم مع الكبوس كهدية
وهني يعلمون اليهال على السياره واجزائها او شلون يصبون بانزين وياخذون شهاده وهم فلوس كيدزوز لأنهم اشتغلوا
جريدة الوطن – قسم الصحافه وايد حبيته يلبسونهم الفيست ويعطونهم كرت الصحافه ويصورونهم ويطلعون بتغطية في كيدزانيا واخر شي يسلمونهم فلوس كيدزوز وجريدة عليها صورهم
الخطوط القطرية يخلونهم يصيرون طيارين ويلبسونهم اللبس ويعلمونهم على القياده واجهزة الملاحه
مركز سلطان يختارون اليهال للكاشير او العمال اللي يحطون الاغراض بالجياسه او المتسوقين
طبعاً من كثر الزحمه ماقدر ناصر يلعب وايد العاب مع ان قعدنا فترة طويله من 1 وشي الى 8 الا ربع تقريباً
وانصحكم لاتنسووون شاحن الموبايل انا توهقت ناسيته وماتوقعت اقعد هالكثر بصراحه
طلبت منهم شاحن قالولي ماعندنا واقترحت عليهم يوفرون انواع من الشاحن في المتجر خصوصا ان شي مهم والمكان يحتاج ان الاهل يقعدون فتره كبيره اذا ناوين يجابلون عيالهم بدون تسوق
اما بالنسبة للاكل لا تحاتون كل شي متوفر ما شاء الله برجر كينج – بوتبيلي – بيتزا اكسبرس – ستاربكس وبينك بيري
وحتى مركز سلطان حاطين فرع اكسبرس صغير فيه الاساسيات اللي تحتاجونها
في الارضي مكرم السامع تلقون الحمامات ورا بوتبيلي وهم بالطابق الاول الحمامات والمصلى للحريم والرياييل وستاربكس ثاني للاهل وغرفه راحة للمربيات
طبعاً في مكان خاص تستلمون فيه صور عيالكم اذا مصورينهم احد المصورين في كيدزانيا وتقدرون تحطونهم على المق او الميداليات او صوره عادية وغيرهم من الاشياء
وفي محل كبير عندهم فيه العاب وادوات مكتبية وملابس تنكرية وغيرها خاصه بماركتهم
انصحكم تشترون حق اليهال اول ماتدخلون البوكت اللي بالصورة اللي فوق يلبسونها برقبتهم ويحطون داخلها فلوسهم والشهادات وكل شيع لشان لا يضيعون واااايد مفيدة بصراحه وقيمتها 2 دك
وقت الطلعه لازم تمرون بكاونتر خاص ياخذ منكم السوار وتتوكلون على الله
ان شاء الله اكون عطيتكم معلومات وافيه تستفيدون منها بزيارتكم للمكان 🙂
الله يعطيج العافيه
تغطيه حلوه وعساكم على القوه
المشكله انه وصل متأخر الكويت والامارات سابقينا بكيدزانيا على العموم نتمنى نشوف وايد شغلات تهتم بهوايات
الاطفال وتنمي مهاراتهم وشكرا مره ثانيه
على فكره ترى كيدزانيا الكويت اكبر من مال دبي على كلام الي يشتغلون هناك سائلهم انا ويمكن يكون اكبر واحد بالشرق الاوسط يعني زين منهم وما قصروو
الله يعطيج العافيه اخوي يحن يبي يروح وما كنت عارفه طريقتهم
الله يعافيج حبيبتي .. روحي ونسيه انا ولد اختي تشقق
والله حلوه حيلل ودي اروحلها بس في الخطوط الجويه الكويتيه ولا بس قطريه
kidzania_q8
احلى العاب في العالم نفس حلمك حقيقه
kidzania_ea_q8
والله الكيد أنيا ترا وايد يجنن فلوس كيدزانيا الكويت وايد فلوس هم مرة رحتلا الكيدزانيا ب٢٠دينار والله
حلو كتير وروعة افادتني كتير ها المعلومات
من فرح واختها ماريا
والله يوفقكم ان شاء الله
كتييييير حلوة هالصور والاماكن الله يعافيكي اعطتيني معلومات ما كنت بعرفها بالمرة الله يوفقك
حلو كتير الله يعافيكي والله يعطيكي العافية والخير المعلومات كتيييير مفيدة
كيدزانيا تصلح للاطفال بعمر كم؟
انا عندي. طفلين ٤سنين و٥ سنين هل تنفع لهم والا صغار عليهم ارجو مساعدتي
اهي تونس الكل لكن احس حق ٥ وفوق يفهمون اكثر
واغلب اللي يشتغلون يتكلمون انجليزي ترى
انا مرة رحلته ودفعت ٦٠ دينار بس حلوه مره حتى لو بقت فلوس يمديك تسوي بطاقة تصرف منها بس المحل اللي تشتري منه مو اللي حق مشاركتهم واحد ثاني بس الكيدزوز اللي جمعناه ماما حق اي لعبة لازم تجمع اكثر من١٠٠ كيدزوز مره حلو والأكل أيضاً متوفر عندهم يعني يمكن لأطفالك انهم يسوون برجر او بيتزا او كب كيك وفي مكان مخصص للأطفال تحت عمر ٤ سنوات وفي التمثيل وعرض الأزياء ان شاء الله بكره راح تروحله الصبح بدري
Comments are closed.