ماما أنيسه
من الشخصيات النسائيه الكويتيه المهمه جدا في تاريخ الكويت
فعطاءاتها الاعلاميه والثقافيه الكثيره واهتمامها بالطفوله وحرصها طوال مده عملها على التواصل مع اطفال الكويت جعل هذا التواصل حب كبير من صغير وكبير لذلك حظيت بكل جداره بلقب ام الكويتيين
انا مو كاتبه هالبوست علشان اعرفكم بماما انيسه وتاريخها، مجرد ضغطة زر بعد كتابه اسمها على محرك البحث قوقل يطلع لكم كل شي تاريخها وسيرتها وبرامجها والكتب اللي نكتبت عنها والمقالات وغيرها الكثير
انا كاتبه هالبوست لاني اخترت من قبل مدرسة ماما انيسه المتوسطه للمشاركه بفيلم وثائقي عنها، سيناريو واخراج الفيلم والحان وكلمات الاغاني لمعلمة اللغه العربيه الاستاذه نوال العبيدان !! ما اقد اعبر لكم عن فرحتي بهالاختيار وانا احد ابناء ماما انيسه واللي تشرفت اني اكون وانا صغيره ضيفه مرتين في برامجها
اذكر كان عندها معامله بوزارة الماليه وامي الله يرحمها كانت موظفه هناك فسألتها عن امكانيه مشاركتنا بالبرنامج وياحلوها رحبت واتفقت مع امي على الموعد
منووو فينا ما يحبج يا ماما انيسه ومنو فينا ما جابل برامجج واحنا صغار وحتى بعد ماكبرنا ترى كنا نتابع شلون تروحين المدارس وتلملمين اليهال وتبوسينهم لما يرقصون جدامج ولا يقولون شعر في حبج وحب الكويت الغاليه
يقولون الصغير ما ينسى بعض المواقف وتتم بذاكرته في برنامج ماما انيسه والصغار واذكر كان التصوير ليوم العيد كنت مشاركه بلعبه فيها خرده ولازم نطلعهم من الماي بواسطة قفشه
كلهم طلعوا الفلوس الا انا هههههه لما وصلتي عندي بتعدين جم طلعت قلتيلي حبيبتي والله ولا وحيَده كسرت خاطرج جان تقولين لنا دخلوا ايدكم واخذوا الفلوس كلها هههههه
ويافرحتنا عيد وخرده وفوقهم هديه 🙂
والمره الثانيه كانت بأحد برامجج اللي نسيت شسمه بس كان بمناسبه يوم المرور اعتقد وسويتي معاي مقابله وقلت شعر عن بلادي 🙂
الله يحفظج يا ماما انيسه ويطول لنا بعمرج ويعطيج الصحه والعافيه
احبج وايد
بنتج
طيبه عبدالعزيز
