أول يوم بالسنة كان غير ولله الحمد كان موفق وونيــس لأنه كان بالأحمدي عند الحبيبه رزه بلوق
الساعه 12 وشوي وصلنا وكانت مزهبه لنا خوووش قعده بحديقة بيتها .. الجو حلو والمكان اينن ما شاء الله
وجزاها الله خير مخدره لنا الجاي السنه على الدوه
وكبب لذيذة من الفوز كيتشن انقرمش فيهم على ما ننطر الجميع يوصل تالي يطيح الغدا 🙂
تمشينا بالمكان وما شاء الله زارعه الحديقة بالورد وهالنحل يحوسون 🙂
الجعده من تربل سسترز
وحاطه هالشي الجميل
من قال ردينا يهال وتزحلقنا 😀
Keek شوفوا اكاونتي ب
ويازين السيرفس مع دراريعهم زوغه
لما وصل الجميع وصارت الساعه 2 طاح الغدا
والبوفيه كان من الفوز كيتشن
Tel : 99520589 – 90977787
شغلهم اينن تبارك الرحمن انا حطيت لي شوي مجبوس دياي ودولمه (ورق عنب) ناااطع خوووش غدا حتى المعابيج والاجار مانسوهم مرتزين تحت القناج
وعلى فكره المواعين بعد يبيعونهم
الغدا كان مجبوس لحم ومجبوس دياي وجريش ودولمه (ورق عنب) وبلاليط وسلطة عادية وتبولة
الماي والمشروبات الغازيه وشربت بيذان وعصير ليمون وفيمتو وخير من الله
وعقب ما تغدينا وسولفنا وصلينا العصر لله الحمد عاد صار وقت الطرب والغناوي
ورزه بعد عمري سائله الكل عن الاغاني اللي يحبونها وانا من شنووووو من شنوووو ؟؟؟
من الطيبين .. اختياري كان سامريات حق عايشة المرطه الله يرحمها 😀
والله مو عيوووز بس احب السامريات مو مني والله وراااااثه هالحب هههههه وهم دكتوره حصة الرفاعي اججت هالحب يوم انها تدرسنا بوحده من محاضراتي بالجامعه عن فن السامري هههههه دكتورة حصه جان احد من اهلها يقرى سلموا عليها وقولولها طيبه تقولج طبقت اللي علمتيها اياه خطوتين جدام وخطوه ورا هههههه والله والله منهج جامعه ومادة تراث شعبي عربي 😛
وافتجت الجناط وطلعت الاثواب
صارلنا اسبوع نحوس بالمباركية ندور اثواب ورازين اسامينا عليهم وآخر شي غدوره تاكل الجو
الله يسامحج يا خالتي (امها) خاشتلها خوش ثوب ما شاء الله تبارك الرحمن هههههههه
اقول يا زين الزين يا بلنق :*
وابشري يا عين جابولك خبر عن حبيب الروح باجر تفرحين .. علموني عن هواه وماقدر واكشفت الايام شوقه والحنين
عاشوا البنات
هضمنا الغدا بعد مو تقولون بس تاكلون 😛
صار دور الحلووو .. ومن يعافه 😛
وازتزت كيكه القهوه العربية من نقصه
ولحقتها قدرة قادر وبلح الشام والقطايف وصب القفشه واللقيمات والمحلبيه والجلي وكيكة الزعفران .. ترى مو كلهم كليناهم لا تصدقون 😛
ككاو عالم دينا ماقصروا حبوا يشاركونه بالسنة اليديدة ودزولنا نقصه اتينن ككاو لذيذ وهدية جميلة لكل بلوقر حضر علبه فيها ككاوه حلوة على لوقو البلوق 🙂
مشكوره دينا اكرمج الله حبيبتي وكل عام وانتي بخير
ام الكرم ما كفاها الغدا وخافت احد ما يعجبه الاكل خصوصا اليهال فمتفقه مع صاج وشاورما .. المغرب كانوا موجودين
شغلهم حده عجيب والشاورما ناطعه
مكسيكانا رقمهم 66600597
اكرمج الله يا رزه وعساه بيت عامر ونستينا عسى الله يونسج بالعفو والعافية وعسى ربي يجعل ايامنا وايامكم افراح ووناسه
