الثوب هو احد الملابس النسائيه القديمه والتي كانت ترتديها النساء ويتباهين بها في دول الخليج, ويتصف بالاتساع وانه مفتوحا من جانبيه في أطرافه السفلى، و يتم تطريز أطرافه وما حول الرقبة، ويصنع من أنواع مختلفة من الأقمشة السادة أو الملونة كالحرير والقطن والصوف والكتان ويأتى بالاقمشه من الهند او البحرين
يتميز الثوب بألوانه الزاهية لكن الاسود يظل سيد الالوان بجاذبيته وتفضله الكثير من النساء على باقي الالوان وتلبسه النساء في المناسبات الكبيره كالاعياد وحفلات الزواج وجرت العاده ان تلبس النساء المتزوجات فقط الثوب, أما الفتيات غير المتزوجات والصغيرات فيلبسن ما يسمّى بـ”البخنق”
في الكويت اكو انواع وايد من الاثواب منها ثوب جز ، ثوب أمفح ، ثوب ثريا ، ثوب مخوص ، ثوب منثور ، ثوب تور
اما في البحرين معروف ثوب النشل ويتميز بتطريز ذهبي ونقوش متنوعه ويصنع يدوياً من قبل حرفيين ويباع بأسعار مرتفعه جداً
هذي صورته من النت
قبل جم سنه كان خاطري في ثوب نشل وخذيته من محل بمجمع السيف مو غالي وايد اذا ماني غلطانه كان ب 35 دينار واكيد لونه وردي 🙂
كانوا يشوقوني بنات أول في الحفلات الوطنية تذكرون اللي يرقصون ؟؟ مع سناء الخراز وشادي الخليج ؟ يا جارتي سيعودو بحاري المغامر يا زينهم لي رقصوا وسووا حركة الثوب مثل الموج
بس النشل اختفى وصار الطلب اكثر على الثوب التور حق العروس والحفلات اللي فيها رقص سامري ومن عمر نحط نطرز اسامي العوايل او البنت اللي ترقص على الثوب
اذكر امي الله يرحمها بعرس اختي سوت ثوابه للعرس بس مادري عاد وين بالضبط مسويتهم
لما عزمتنا رزه قالت لنا ترى لبس اليمعه الرسمي الثوب .. دورت الثوابه اللي امي مسويتهم الله يرحمها مادري وينهم 🙁
العاده اذا بغينا الشي يختفي
وجزاها الله خير صديقتي ابله نوره دقت علي وكانت بالمباركية وقالت لي بسويلج تفصال ثوب على اسمج
الله يريحج يا نوير شي جاهز مجهز :*
قلتلها من وين قالت لي دواعيس بالمباركية واذا خلص اروح معاج نستلم وادليج .. خوش
والله ورحنا .. اثاري ورا الصراريف بهالدواعيس شكثر محلات يسوون و يبيعون اثواب بس مو الكل يطرز الاسامي عاد انتوا نشدوا وتنقوا والاسعار على حسب التطريز وجم اسم تبين على الثوب
وهذي اثوابنا التور
واكو شي ملونين بعد وشي وايد خبه وشي يزهش وشي ناعم عاد كل وحده وذوقها ومشتهاها
وهذي اهداء مني لكل محبي التراث والثوب 🙂
