من صغري احب الفن وما يتعلق بالفنانين ومكتبة الاشرطة البيتاميكس زاخره بأقدم المسلسلات والمسرحيات 🙂
ومن عمر وانا احوس بالمسرحيات واتصور مع الفنانين ويتني فترة مسكت اكثر من منتدى خاص بالفن وكنت مشرفة التغطيات الحصريه لكن لظروف هديت كل شي لكن مازال عاشقة للفن والابداع
من اكثر الفنانين اللي احبهم الجيل القديم والتقيت بالفنان عبدالحسين عبدالرضا والفنانه سعاد عبدالله لكن مع ليلحين ما صارت لي فرصه التقي بأم سوزان حياة الفهد اللي صج حابة اني اشوفها عن قرب واسولف معاها 🙂
يوم الخميس كان لي فرصه رائعه اني ازور احد مواقع تصوير مسلسل (توالي الليل) اللي راح ينعرض على شاشة الراي بشهر رمضان المبارك و اني التقي احد العمالقة في الكويت ومن حظي اني قعدت وسولفت معاه وحبيته اكثر بعد هاللقاء بو بدر سعد الفرج قمة في الحبابة والطيبه والتواضع الله يطول بعمره ويعطيه الصحه والعافية
سولف لنا عن ايام درب الزلق وشلون اشتغلوا فيه وعن المسرح ايام اول .. سوالف حلوة وكثيره استمتعنا فيها 🙂
وهالسنه ان شاء الله بيقدم لنا مسلسل توالي الليل مع مجموعه من الفنانين منهم عبير الجندي, اسمهان توفيق, هبه الدري, نور, عبدالله الطراروة, حمد العماني, صمود, حمد اشكناني, ابراهيم الحساوي ومن اخراج البحريني علي العلي وتأليف الكاتب جاسم الجطيلي
المسلسل يناقش فترة التسعينات والمشاكل اللي فيها ويسلط الضوء على جزيرة فيلكا بعد الغزو وهجرة سكانها الى الكويت
الفنانه نور عرفتوها ؟ اللي مثلت دور الزوجة العراقيه في ساهر الليل السنه اللي فاتت .. يحليلها وايد حبوبة وذربه وعلى فكره وايد احلى من التلفزيون 🙂
كفر تلفون نور 😛
الفنانه الحبوبة هبه الدري بلوك التسعينات والفنان السعودي ابراهيم الحساوي
الفنانه صمود يحلوها وايد سمحه
هاللوك لوك الالفين 😉
وهاللوك الخاص بالمسلسل لفترة التسعينات 🙂
صديقتي العزيزه ام محمد (عبير الجندي) وايد استانست لما شفتج من زماااااااااااان يا دكتوره عنج :*
حمد العماني كان اللوك عجييييييييييييب والشوارب مغيرته وايد .. لايق عليك هاللوك 🙂
مابي اتكلم عن حمد من ويهه يقول انا طيب جداً 😀
ختامها مسك 😀
اسمهان توفيق شيخه ام السان طويل تذكرون ؟ (الى ابي وامي مع التحية) احب دورها وايد كان لايق عليها وضابطته وهم الدور اللي وايد حبيتها فيه بمسلسل نعم ولا الجده الطيبه الصارمه الحنونه كانت صج عجيييييييييبه
بالصج هادية وايد وحبيبه ياحلوها
شكراً لفريق توالي الليل على هالاستضافه الحلوة وشكراً لصديقاتي اللي نسقوا هالزياره الجميله
وهذا برومو مسلسل توالي الليل علشان تتشوقون اتابعونه 🙂
كنت بجمعية الشامية و أول ما دخلت من باب الجمعية شفت ستاند كبير حاطين عليه جناط شفافه وداخلها علب ادوية اساسية في كل بيت منها البندول اكسترا وفيتامين سي فوار وحبوب مص ولزقة الظهر ودهان العضلات وبلاستر وغيرها
الحقيبة مرتبة ومفيده بصراحه وفكره حلوة تحسب لجمعية الشامية خصوصاً انه احنا بموسم تغيير جو والامراض من فلونزا وحساسية موجوده الله يكافينا وياكم الشر
سعر الحقيبة الاساسي 8,205 دك لكن يبيعونها ب 6,400 دك
