![betdekson1](https://pinkgirlq8.com/wp-content/uploads/betdekson1.jpg)
الكويت فيها اماكن وايد تستحق الزياره .. اماكن يمكن ولا مره رحنالها مع انه عايشين على هالارض الطيبه
متاحف واماكن تاريخيه رائعه لكن منسية ! والله ما اذكر حتى ايام المدرسه ودونا برحلات لهالاماكن ! مادري ليش مع انه تاريخ الديره والمفروض المدارس تخلي رحلات دوريه علشان الطلبه يعرفون هالتاريخ والاماكن الاصيله
المهم انا وصديقاتي سلفر بلينج بلاك واما ترافيلر وكويت وي بلوق قررنا نسوي رحله كل فتره لمكان ما شفناه بديرتنا الحلوة
منها نشوف معالم تاريخيه واشياء ما شفناها ومنها نشارككم الصور وتستفيدون ان شاء الله من المعلومات اللي في البوستات وهم اصدقائنا من الدول الثانية يشوفون اماكنا الطيبه 🙂
زيارتنا الاسبوع اللي فات كانت لمركز بيت ديكسون الثقافي
ومكانه على شارع الخليج العربي بعد سوق شرق ومقابل لمرسى السفن
![betdekson2](https://pinkgirlq8.com/wp-content/uploads/betdekson2.jpg)
يرجع تاريخ انشاء بيت ديكسون الى بداية القرن التاسع عشر عقب الاتفاقيه التاريخيه التي تمت بين حاكم دولة الكويت الشيخ مبارك الكبير وبريطانيا 1899 م
وفي عام 1904 م اصبح سكنا ومكتبا للمعتمد السياسي البريطاني, كما افتتح به اول مكتب للبريد عام 1915 م اما في عام 1929 م فأصبح مقراً لاول معتمد بريطاني هو الكولونيل هارولد ديكسون
يعتبر بيت ديكسون احد اهم المباني التراثيه في الكويت, فبناؤه المعماري يتسم بشخصيه فريده تمثل عدة طرزز معماريه انصهرت في مبنى واحد
وعلى الرغم من انه يختلف في شكله الخارجي وفي تقسيم المساحات داخله عما نألفه في العمائر الكويتية التقليدية فانه من حيث البناء يعتبر ومبنى السفاره البريطانية القديم هما المبنيين الوحيدين اللذين يمثلان الطراز المعماري الكولونيالي في الكويت اذ ان خواص هذا الطراز تساعد على التغلب على صيف البلاد الاستوائي والمداري المناخ
تسلم البيت على حاله الاصليه اول معتمد بريطاني في الكويت هو الكولونيل نوكس (1904-1909) من دون ان يدخل عليه اي تعديلات وجاء بعده الكولونيل شكسبير (1909-1915) وكان له تأثير كبير في بيت ديكسون من حيث طرازه المعماري اذ اجرى عليه التعديلات حين حوره من نمطه العربي المحلي التقليدي الى مزيج من هذا الطراز والطراز السائد في المباني البريطانيه في مستعمرات المناطق الحاره (الكولونيالي) وذلك ببناء غرفة استقبال عريضة السطح اضافه الى المدفئه الموجوده في غرفة الاستقبال وكذلك الفراندا او الشرفه المرتفعه
تسلم منصب المعتمد البريطاني بعد الكابتن شكسبير عدد من المعتمدين البريطانيين لفترات قصيره متفاوته وفي العام 1920 جاء الكولونيل مور الذي سلم البيت الى المعتمد البريطاني الذي خلفه وهو الكولونيل هارولد ديكسون (1929-1936) في حاله يرثى لها مما حتم على الاخير اجراء عمليات اصلاح واعادة بناء متواصله استمرت طوال فترة معيشته في البيت
تقاعد ديكسون من الخدمه في العمل السياسي في العام 1936 م وكان عمره وقتذاك 55 سنه فعينه الشيخ احمد الجابر الصباح امبر الكويت في منصب الممثل المحلي الاعلى لشركة نفط الكويت التي كانت قد انشئت حديثا عام 1934 م وحين تولى منصبه هذا ترك السكن الديبلوماسي الرسمي الجديد وانتقل الى بيت ديكسون الواقع على الواجهه البحريه وعاش ديكسون فيه حتى وافته المنية عام 1959 م ودفن في مدينة الاحمدي بناء على وصيتيه التي طلب بها ان يدفن في الكويت من شدة حبه لها ومن هنا اكتسب البيت تسميته الحاليه
اصبح بيت ديكسون رمزا للصداقه العميقة وللعلاقات السياسية الوطيده بين دولة الكويت وبريطانيا التي ظلت باقيه الى ماينوف على المائه عام والتي مازالت الجهود آخذه في تعزيزها ودعمها من خلال تعزيز العلاقات السياسية والعسكرية والتجارية والتعليمية (التربوية) والثقافيه
ولما كان بيت ديكسون قد دخل في حقبه جديدة من اعادة البناء والتجديد تحت اشرف المجلس الوطني للثقافه والفنون والاداب فقد اعيد تأهيله ليصبح معلما حيا ومركزا ثقافيا مميزا يعبر عن الصداقه الحميمة التي تجمع بين الكويت وبريطانيا
وصلنا البيت ودخلنا من الباب ولقينا هالريال الطيب اللي سلم علينا 🙂
![betdekson3](https://pinkgirlq8.com/wp-content/uploads/betdekson3.jpg)
هذا بو سعود (هارولد ديكسون) وام سعود (فيوليت) بصورة بالممر الرئيسي بالبيت
![betdekson4](https://pinkgirlq8.com/wp-content/uploads/betdekson4.jpg)
![betdekson5](https://pinkgirlq8.com/wp-content/uploads/betdekson5.jpg)
صور للشيخ احمد الجابر الصباح رحمه الله
وصور أخرى لشيوخنا الله يرحمهم
اضافه لبعض المقتنيات القديمه
![betdekson6](https://pinkgirlq8.com/wp-content/uploads/betdekson6.jpg)
الحوش الامامي وسيارتهم حسافه مغطينها ماشفناها
![betdekson7](https://pinkgirlq8.com/wp-content/uploads/betdekson7.jpg)
الحوش الخلفي مع الجليب
![betdekson8](https://pinkgirlq8.com/wp-content/uploads/betdekson8.jpg)
![betdekson9](https://pinkgirlq8.com/wp-content/uploads/betdekson9.jpg)
نروح فوق
![betdekson10](https://pinkgirlq8.com/wp-content/uploads/betdekson10.jpg)
غرفة الطعام الخاصة في بيت ديكسون
![betdekson11](https://pinkgirlq8.com/wp-content/uploads/betdekson11.jpg)
مكتب ام سعود
![betdekson12](https://pinkgirlq8.com/wp-content/uploads/betdekson12.jpg)
صورة لأم سعود على مكتبها ياحلوها
ابوي يقول ان ام سعود من محبي الرياضه ودايماً كان يشوفها تمشي على البحر حتى لما كبرت
![betdekson13](https://pinkgirlq8.com/wp-content/uploads/betdekson13.jpg)
غرفة الجلوس الخاصه في بيت ديكسون
![betdekson14](https://pinkgirlq8.com/wp-content/uploads/betdekson14.jpg)
اخر صورة لأم سعود (فيوليت) اللي توفت عن عمر يناهز ال 94 عام
![betdekson15](https://pinkgirlq8.com/wp-content/uploads/betdekson15.jpg)
غرفة النوم الخاصه في بيت ديكسون
![betdekson16](https://pinkgirlq8.com/wp-content/uploads/betdekson16.jpg)
استانست وايد لما شفت اجانب يايين بيت ديكسون وايضاً اخوان من الامارات الشقيقه يايين يزورون بيت ديكسون ومعاهم كاميرا يصورون معالمنا التاريخيه 🙂
![betdekson17](https://pinkgirlq8.com/wp-content/uploads/betdekson17.jpg)
يا حلات بيبان اول والشبك عن الحشرات 🙂
![betdekson18](https://pinkgirlq8.com/wp-content/uploads/betdekson18.jpg)
البلكونه اتينن والقعده تشرح الصدر .. ابوي قالي ان البحر كان على طول عن بيتهم يعني مو مثل الحين شارع ولوية
يا بختهم كان وقتها الحياه سهاله والمنظر حلو
تهقون كان وايامها ام سعود تزهب درابيل وحليبه لابو سعود ويقعدون يسولفون بهالمكان 😀
تفكير كويتي بحت درابيل وحليب هااا .. اهي بريطانيه تراوالي تسوي له ابل باي هههه الا اذا خربوها رفيجاتها الكويتيات ههههههه
![betdekson19](https://pinkgirlq8.com/wp-content/uploads/betdekson19.jpg)
جوله كانت مميزه والله واستانسنا بزيارتنا لهالمكان وحبينا بو سعود و ام سعود مثل ما اهم حبوا الكويت وقضوا طول عمرهم على ترابها وسموَا عيالهم باسامي عربيه (سعود وزهره) شي جميل .. الله يرحمكم يا ابو وام سعود ♥