امس كنت تعبانه شوي و طول وقتي بغرفتي بين غافيه وبين قاعده ونوعي لما اتعب احب اكون بريحاتي وطرى على بالي اغنية قالتها حياة الفهد بمسلسل على الدنيا السلام (عدت يا يوم مولدي) !! ماعرف الاغنية الا من هالمسلسل لوول ولما سويت سيرج لقيتها تضيق الخلق
عدت يا يوم مولدي **عدت يا أيها الشقي
الصبا ضاع من يدي **وغزا الشيب مفرقي
ليت يا يوم مولدي ** كنت يوما بلا غد
قعدت افكر بالكلمات بما ان مابقى على عيد ميلادي المجيد الا 4 ايام بس .. شقي وشيب وبلا غد حسبي الله على بليسج يا محظوظة انا اقول انزل يا جميل بالساحه واايد احلى لوول
الايام طياره مشاء الله صج اذا قالوا كله من اعمارنا .. شريط ذكريات يمر علي ايام الطفولة واعياد ميلادنا انا واختي اللي تشاركني عيد ميلادها بنفس الشهر ودوم الوالدة الله يرحمها تخلي عيد ميلادنا مع بعض
لما نقول عيد ميلاد و حفلة كانت حفلاتنا اول صج صج حفلات صح الحين الزينه احلى والفناتق اكثر لكن اول القليل كان يفرحنا ولو ان امي الله يرحمها ماكانت تسوي شي قليل والله اتذكر حتى الالعاب اللي توزعهم على اليهال كانت مو اي شي كلها من شرق مو بو 100 بعد قلبي كانت تحب الزين وتقعد تغلفهم بايدياتها وتكتب على كل واحد من المعزومين اسمه على الهدية جنه عيدميلاده مو عيد ميلادنا واحنا ناطرين الهدايا 🙂 والكيكة لالالالازم تكون من العالمية اللي بالسالمية كان ابو الكشخه عشتوا كيكه يحجي ذيج الايام
اما المعازيم كل الفريج مشاء الله والصاله فل ماكو مكان احد يقعد مايبقى عيوز بالفريج مو معزومة 😛
وبنص الثمانينات صارت هبه ثانيه بالكويت اعياد الميلاد بهارديز والارنب الجائع .. هارديز الشامية حفظونا من كثر ما نسوي اعياد ميلاد عندهم 😀
اما التسعينات الكيكة لازم مطبوع عليها صورنا واحنا صغار ليش مادري هبة البرنت على الكيكة ولاتزال موجودة
والحين اغلب اعياد الميلاد بالمطاعم كيكة صغيره وصفقتين من الفلبن ومع السلامه .. رفيجاتي الله يخليكم مابي فضايح هالسنه 😛
سنه جديدة بتبدا من عمري بعد جم يوم يارب تكون سنه خير ونجاح وصحه وتوفيق
وهذي جم صورة من ارشيفي لأعياد ميلاد الثمانينات يا زينها من ايام وبما ان عيد ميلاد دندون اختي معاي اقولها كل عام وانتي بخير اخيتي الغاليه :*
سوري هذي الصورة مو من الثمانينات ماكان حزتها في نت ابورتير 😛
من ابلة نوره Early Birthday Gift هذي
مشكورة واااايد حبيبتي عسى الله لا يحرمني :*
