زمان الطيبين راح وما بقى منه الا ذكراه وبعض الاشياء اللي محتفظين فيها منه .. ومن هالاشياء كاسيتات الاغاني اللي كانت تارسة سياييرنا ودورنا وكل مكان 🙂 

قطيت وايد اشرطة لكن هذا اللي بقى عندي بدرج مغبر في السطح هههههه مغويتهم فوق عن الغبرة ومتحسفه اقطهم ترااااااث 

ذاك اليوم كنت احوس بالبيت جان اتذكرهم وقلت يالله خل يكون لهم في البلوق نصيب حتى لو قطيتهم اتذكرهم هني 🙂 لما فتحت الدرج رديت اياااااام وبردكم معاي

لقيت كاسيتات ناس مالها حس الحين مولية شخباري فرقة سلطانيز ! اعتقد بحرينيين واغانيهم ايرانية وفرقة الكواكب !! ما اذكر اصلا اي من اغانيهم .. فرقة السيف شعبيه شكو شاريه كاسيتهم مادري

الشريط الشفاف اغاني فيلم هندي اسمه دوبلكيت حق شاروخان هههههه نحفظ ونغني وماندري شيقولون مثل الشباب اللي قبل يعلون الاغاني الانجليزية بالسيايير ومايعرفون كوعهم من بوعهم هههههه

تذكرون اول اكو حفلات بالفنادق وكل حفله بعدها بفترة ينزلون لها كاسيت وهذا الاصفراني شريط وحده من حفلات الشيراتون

الله يا عبدالمجيد اهو وراشد وعبدالله ونبيل كان الرباعي اللي ما استغنى عنهم اما بشار يحليله هبوا بالقلب المحتاس وطخوا عنه شحاس قلبه مادري والاغنية مالها طعم بس مستانسين فيها وضربت مادري ليش 

اما الست عتاب فعين ورمني كانت الاغنية الظاربة بالعرَوس ذيج الحزة 

محمود انور اممممم والله مادري منو اهو بالضبط 

منوو ماعنده هالكاسيتين ؟؟ تايتنيك سيلين ديون واغنية الترون جون لما توفت الاميرة ديانا

مهرجانات دن دون كانت عامله عمايل اول 

هالشريط كنت اموت عليه .. اهلا هلا كان اغاني افتتاحية دورة كأس الخليج (الصداقة والسلام) بالكويت سنه 90 قبل الغزو العراقي علينا الله لايعود ذيج الايام

كنت مشاركة برقصة الافتتاح وكنا نمثل دولة قطر وليلحين اتذكر الاغنية (حيا الله هالقطري حيا الله حبه ربى في حشاي مانحتاج حق السري مانحتاج سراينا هالجاي سراينا هالجاي هذا هو ابن قطر هذا هو أقولها و بكل فخر هذي قطر عنها شقول شعب وفي وحاكم عدول هذا خليفة بن حمد جعل السعد فاله أهوا لنا عز وسند تشهد له أفعاله) يا حلو ذكريات الطفولة والله 

الكلمات ابدع فيها الشهيد الشيخ فهد الاحمد عسى الله يرحمه والشاعر عبداللطيف البناي والالحان كانت للمبدع راشد الخضر الله يرحمه  والغناء للكبار عبدالكريم عبدالقادر وعبدالله الرويشد 

لا ونفنتق بالاشرطة وحركات .. اهم شي ميني ماوس ههههه

منو الداثر اللي يذكر هالاوبريت هههههههه صابرين ومحمد المنصور يسافرون ويغنون عن كل ديرة

غير كاستات المسرحيات اللي لالالالالازم نشتريها بعد كل مسرحية هم المسلسلات كان لها نصيب 🙂

كنت احب مسلسل الماضي وخريف العمر اللي فيه الفنان سعد الفرج وبوسي 

شرايكم بالطيبين ؟؟؟ انا ناطرة يوم اسوي اقتحام على بيت يدتي لأنه فيه من الطيبين وايد انتظرونااااا قريباً 😛