مسرحية الطرطنقي بطولة طارق العلي, داوود حسين, شهاب حاجيه, امل عباس, مريم حسين, سلطان الفرج, محمد باش, هاني الطباخ, فرحان العلي

من فتره ماحضرت مسرح طارق العلي وهالسنة خواتي خاطرهم بمسرح فحجزنا خصوصاً ان المسرحية بطولة كوميديانين طارق وداوود حسين فقلنا اكيد المسرحيه بتكون عجيبة

اول ماقربت صوب شباك التذاكر لفت نظري اعلان يمنع دخول المسرح بالشورت !! ثاني شي جنه اسعار هالسنة اوفر 20 دينار شدعوه طول عمرنا درجه اولى 10 دنانير صارت دبل !! الغلا وصل المسارح بعد سنتين التذكره ب 50 !! ياحلو الديفيدي من البسطات ب دينار لوول وواضح وصوت اصفى  

شي يديد مسوينه هالسنه حاطين ركن حجز تصوير مع الممثلين و بيع الورود  والبروشات ذكروني ببوست العيد قبل غير لوول شككوني انه قروه بس مايمدي حاطته يوم العيد لوول بس ها تدرون الصورة بجم !! 5 دنانير مو من صجهم الله يرحم ايام اول دينار واحد والصورة شكبرها الحجم العود

بعد المسرحية تدخلون من باب خلفي وحاطين ستوديو مصغر تصورون مع الفنانين 

وبعد حاطين كاونتر يبيعون فيه مسرحيات طارق العلي وعلى فكره نزلوا مسرحية بخيت وبخيته ديفيدي

المسرح صاير وايد ارتب ومغيرين الكراسي يعني بهالسالفة ماقصروا .. المهم بدت المسرحيه الصوت بالاول كان مو شي بعدين تعدل اشوة

اللي لفت نظري حاطين بكل زاوية سيكيورتي مصري وعسى ماتطل بموبايلك الا عينه عليك يعني هااااا لا تصور شدعوة عاد قاعدين بالقصر الابيض !! يعني ماله داعي هالسالفة طول عمرنا نصور بالمسرحيات ماصار شي ولا خايفين يبوقون فكره الديكور مثلا 😛

المهم بتكلم عن المسرحية انا بإختصار ما حبيتها كلش

القصة مكرره ومستنزفه واحد يتفق مع صديقه يزوجه بنت مرته الغنيه علشان يبوق فلوسها مقابل انه يرد له كمبيالات سابقة موقعها,  الحوار الله يهديهم وايد وايد كلمات وايحاءات تحتها خط احمر

التكفخ والتعيب كان الغالب بالمسرحية

العنصر النسائي ماكانوا موفقين فيه امل عباس ومريم حسين .. امل فنانه جيدة بس يبيله ممثله جيدة معاها يشيلون بعض اما مريم حسين مسكينه مو مالت مسرح بصراحه وعدم مشاركة هيا الشعيبي معاهم هالسنة خلا المسرحيه بلا طعم

هيا كانت كرت طارق الناجح في كل اعماله الاخيره ومع الاسف ما استخدمه هالمره