حبيبتي دندرمة خاطرها بكوكتيل أول بوطبقات الظاهر شايفته في واحد من بوستاتي ونفسها في كوكتيل محظوظة ومبروكة 😛

وبما انه كنا قراب من بنيد القار تذكرت انه في مطعم لبناني يديد اسمه (السـاحة) فقلت خوش اكيد فيه الكوكتيل العجيب

وصلنا وكان المكان زحمه مشاء الله

المكان اينن الديكور شامي بحت ضيعه كامله على شكل مطعم بممراتها وصالاتها واقسامها .. القريه اللبنانية بأحجارها وتفاصيلها بتلقونها بمطعم الساحه

المكان اينن للتصوير ونقطه حبيت اذكرها مهمه جداً انهم من اول ما قلتلهم بصور قالولي مكانج واعملي اللي بدك اياه .. شكراً على الرقي بالتعامل حتى من غير سؤال من انتي علشان بتصورين

كان بخاطري المكان يكون فاضي علشان احوووس مع كامرتي اجكجك بس كان وايد عوايل وما حبيت اضايق الناس

هواة التصوير انصحكم في هالمكان 🙂

الطابق العلوي ليلحين مافتحوه

وصار وقت المنيو والطلبات

الضيافه ترمس 🙂

في اي مطعم شامي يقدمون الخبز الفريش المنتفخ لكن في الساحه عندهم نوعين هالخبز وخبز تنور .. تخيلوا حمص وخبز تنور يم يم

واخيراً وصل كوكتيل دندرمة .. استانستي ؟ 😀

وطلباتنا بدت توصل واولهم الفتوش .. وايد لذيذ بخلطته وحموضته

حمص بيروتي .. ممتاز

بطاطا حره كانت جيدة مع انها حاااره فيها فلفل بس افتقدت ذرات الفلفل الاحمر اللي تزين البطاطا الحره

تكا لحم كانت عجيبة

المطعم وايد لذيذ وقعدته حلوة انصحكم فيه

Assaha Located in Bnaid alGar, Gulf Road

Tel : 22533377 – 88