القرقيعان عادة تراثية حلوة يحتفل فيها اليهال (الاطفال) ليلة 13, 14 و15 من شهر رمضان
وهم يفترون ويطقون البيبان يسألون عن القرقيعان (حلوى ومكسرات) وينشدون الانشودة الشهيرة
قرقيعان وقرقيعان بين قصير ورميضان
عادت عليكم صيام كل سنه وكل عام
يالله تخلي ……….. يالله تخلها لامها
عسى البقعه ماتخمها ولا تواسي على امها
وتختلف مسميات القرقيعان في دول الخليج .. قطر يسمونه قرنقعوه والبحرين قرقاعون والقرنقشوه في عمان 🙂
مع تطور الايام بدا حتى القرقيعان يتطور وبدوا الكبار يهتمون فيه ويتفننون فيه اكثر من الصغار وصرنا ننطر كل سنة شنو الفناتق اللي بتوصلنا البيت من اهلنا ورفيجاتنا 🙂
هالسنه وصلني اكثر من قرقيعان
اول قرقيعان من عبوودي .. خوش قرقيعان جيسته تشوق ومزينه بهلال كبير جميل .. طربوش زوغة على نجمه وهلال فوق صينية فضة مسطحه 
انواع من الحلويات اللذيذة ومكسرات من دين اند ديلوكا يم يم .. عساكم من عوادة يا ام عبدالله
وسلم عبودي يالله خله لأمه يالله 🙂
القرقيعان الثاني كان من شركة فيفا للاتصالات عطونا اياه في الغبقة يوم الخميس اللي طاف وتلقون التفاصيل بوست سابق
بوكس صغير كيوت من الحلوة أوراد .. مشكورة يا ام اوراد اكرمج الله
وسلم ورووودة يالله خليها لأمها يالله 🙂
Nail it Spa قرقيعان كيوت من
عطوني اياه بعد ماخلصت باديكير ومانيكير ماقصروا
لما وصلت البيت استانست لقيت داخله صبغ اظافر زويا مع الجوكليت والمكسرات 😀 
هالقرقيعان وصل حق خالتي بس قلت اصورة مع مجموعتي 🙂
قرقيعان وهابي واراوي بعد غير فنتق بوكس كبير فيه وايد اشياء مشاء الله
امممم وناسه شنو نبدي فيه شنو نفتح شنو نخلي 
مارشميلو على اشكال زوووغه 
حب مقشر وجوكليت كور ومقلمة والوان على كارز 
جاينت لولي بوب ونفيش جاريت وحصالة داخلها قطع جوكليت وسيارة باربي فيها حلاو وعلبة فيها انواع من الككاو اللذيذ
حلاو على هيلو كيتي وشاور جيل
مشاء الله خووش قرقيعان استانسنا واحنا نفجج وعيال اختي طاروا في الاغراض ماقصرتي يا ام وهابي
سلم وهابي واراوي يالله خليهم لأمهم يالله 😀
مثل عادة كل سنة ويعلها عادة ماتنقطع ام فطووومة تتنقص لي من قرقيعان بنيتها
بوكس برتقالي بسيط ناعم وحلو مثل حلاة فطومة السكر
سلم فطومه يالله خليها لأمها يالله 😀
ختامها مسك آخر قرقيعان وصلني من صديقتي الصدوقة ام حمود
وعلى قولتها كل شي بينك في بينك حق بينك لوول
علبه ملفوفة بتور وردي ومربوطة بشرايط وعليها صورة الحلوين حمود وجود
واو علبه تشوق نازكة مكتوب عليها اساميهم ومن فوق عساكم من عوادة 
من داخل مقسمة 4 اقسام ككاو + غريبة ودرابيل + مكسرات + سمسمية وقمردين
سلم حمود وجود يالله خلهم لأمهم يالله 😀 
وكانت حاطة قرقيعان صغار بأشكال لعيال اختي ماقصرت وسي دي اغنيه خاصة بالقرقيعان بأسامي اليهال فكره حلوة 
Update
وصلني هالقرقيعان النازك من مجلة ذوق
جيسه خضرا تشوق جنها خامة نفنوف العروس اول ومعلق فيها ليت على ما اعتقد اول يسمونه زهيوي وهم معاهم ملاس ازرق مربوط بخيط القرقيعان وعليه تاق ذهبي مكتوب عليه ذوق واهم كل الذوق 🙂
ميخالف تسإلين صديقتج الصدوقة
ام حمود
من وين ماخذة بوكسها
حده عجبني
مااااشالله
ان شاء الله اسالها لكم
Eee nafs so2alee… go6ee 7mood o jood ay3aqid!
Abi wa7ed asaweelah design! min wain imsaweetah eyshaweg?
enshallah i will ask her soon
ما شاء الله خووش قرقيعان 🙂
عليكم بالعافيه حبيبتي تستاهلين الطيب
عساكم من عواده وعساها ماتنقطع من عاده
الله يعافيج حبيبتي :*
Hii i would like to ask u about the plastic gerge3an box from 7mood and joud where did your friend design the box??
ماقدرتي تيبين الرقم؟؟؟؟؟
كلمتها والله وقالت لي بالبلوكات بس ماحددت اي صوب والرقم مع الاسف كان بالفاتورة وقطتها 🙁
مرحبا ادري متأخره بالسؤال بس ودي اعرف من وين الاشكال الماشميلو اللي بالقرقيعان ومشكوره
اذا ماني غلطانه من المانيا حبوبة
السلام عليكم اختي الفاضله
لو تكرمتي حبيت اعرف وين امسويه صديقتج الصدوق ام حمود علبة قرقيعان اعيالها حمود ونجود حابه اسوي نفسهم
الله ابي العنوان او التليفون للمحل ض
مشكوووره وايد
Comments are closed.