امس بالليل جربنا مطعم يديد متخصص بالبرجر
دكان برجر
فاتح في بنيد القار على البحر بجانب فندق لورويال
كونسبت المطعم ميكس الثيم العربي بالهمبرجر الغربيه
شعار المطعم ولبس الويترز عربي مودرن
لابسين تيشيرت على بشوت وغتره وعقال مقصب زري مال اول
هالويتر قاعد بره خاص للطلبات الخارجيه تطلبون وانتوا بسيارتكم
ضيوفونه ضيافه عربيه تمر وقهوة شغل عدل
ديكور المطعم وايد حلو والكتابات اللي على الطوفه حلوه واستخدام المعلبات والبطول وبساتيق الاچار معطي لمسه جميله
المنيو
عندهم ميكس عصاير وميلك شيك ويقدمونهم بطريقه حلوه
يكتبون اساميكم على تاق ويعلقونهم على القلاص
انا طلبت موهيتو بالبرتقال ومعاه شوي ريحان
الميكس غريب بس الطعم لاباس فيه جيد
نيي الحين حق الاكل
المقبلات كانت كولا باربكيو تيبس
اللي اهو بيكن ملفوف ومغطس بصلصه باربكيو وكولا
طعم طيب
افترشوك
ربيان مقرمش مغطس بصلصه دكان الخاصه
عجيـــــــب لازم تطلبونه
ويابولنا ماعون يشوق مقسم فيه حلقات بصل مع صلصه الرانش بالباربكيو وبطاط مقلي مع رشه بهارات محليه وخيوط بطاط مع صلصه الكريمه والمعبوج
جربنا السيقنجر برجر عندهم واهي ذي دكان
برجر بتتبيلة الشاورما وجبن القشقوان وبصل مع السماق والبقدونس وصلصه دكان
طعمها لذيذ وغير عن باقي انواع البرجر
قهوة فرنسيه
تراميسو التمر
دكان برجر في بنيد القار على شارع الخليج العربي، مقابل نينو
Tel : 1800011
instagram : @Dukkan Burger
