من الاماكن اللي رحت لها في البحرين وحبيتها كونها جمعت التراث بأكله وبعض الديكورات وبالمكان الشعبي الجميل اضافه الى لمسات عصريه بسيطه خفيفه
مطعم زعفران باي جينا
لو اروح بروحي مستحيل ادله لانه بين فرجان ودواعيس بالمحرق القديمه الجميله
عندهم اكثر من فرع بس ماني عارفه مواقعم بالضبط اضافه اني طلبت اشوف المكان الاقدم فيهم
المطعم ماخذ مكان مدبسه مابي اشرح وافتي لاني ماعرف الشرح بالضبط لكن مكان كانوا يزلون فيه الدبس من التمر
والشرح بيي بالصور القادمه
القعده بره تشوق بس يبيها جو حلو
وهذي المدبسه وشرحها
وهذي مدبسه داخل المطعم ومسكرينها بارضيه شفافه تمشون فوقها
المطعم صغير لكن شرح وخدمتهم حلوه
وايد يعجبوني الناس اللي يدربون العماله على حسن التعامل مع الزباين
عندهم فلبينيه اسمها ايرنا حد الذرابه والضحكه البشوشه
احلى شي وانتوا قاعدين تسمعون الاغاني البحرينيه الحلوه مثل يالزنه ذكريني وما معاكم خبر زين وهلا باللي لفاني ياهلا به
ضيافتهم تميرات
سألناهم اذا عندكم منيو قالوا لا وريوقنا واحد
قلنا يالله هاتوا اللي عندكم 🙂
يابولنا ماعون مقسم فيه فول وحمسة بطاط وبيض طماط وفاصوليا حمره
كل شي كان طيب
بلاليط مع بيض
خبزهم التنور خفييييف ولذيذ وفريش تبارك الرحمن
جان زين خبابيزنا بالكويت يسوون الخبز جذي خفيف
وهذي فطاير على جبن
وباكوره ساندويتش
كرك
وبعد ما خلصنا ريوق وطلبنا الحساب وزعوا علينا قلاص صغير فيه ماي الزعفران باااارد
الموقع: سوق القيصر ّية – مدينة المحرق
أوقات العمل: الساعة ٩ صباحا – ١ ظهرا ومن الساعة ٤ مساءا – ٨ مساءا
تلفون : +9713623191
مرحبا حبيبتي نورتينآ ❤️بس حبيت اوضح شغله بسيطه رقم زعفران غلط لان فتح الخط مالنه ٠٠٩٧٣ وان شاء الله نلتقي فيج قريب
Comments are closed.