كنت معزومه الاسبوع اللي طاف على افتتاح مطعم يديد متخصص بالمأكولات الكويتيه اسمه فـــله
في فندق هوليدي ان داون تاون
الحلو انه مكانه معزول عن الفندق يعني الدخله والطلعه بروح
الديكور وايد عجبني والالوان هاديه وشرحه والمكان اتوقع الصبح بيكون اشرح خصوصا انه الدرايش كبار والقعده الخارجيه عجيبه بس حسافه دش الصيف
الاغاني على المكتوبه على الطوفه تشوق
خوش مزهريه بالغوري
والعده زاهبه المفروض للعيوش بس يوم الافتتاح ماكان اكو عيوش كان خفايف
استقبلونا اول ما دخلنا بقلوب الفل يا حلات الريحه خنيـــــنه
حنون صديقتي كاشخه بالمضاعد لايقه مع الثيم
الاوراق اللي على الطاولات مكتوب فيها هالاغاني الفله
شربت البيذان حده ناطع ومنعش
وفاجئوناااا انهم يايبين فرقه وصارت سمره خفيفه في المطعم 🙂
وايد ناس لما حطينا الفيديوات بالانستغرام مو عاجبهم الوضع !
بس هالشي كان عادي والمطعم كله عايلات اللي مع ريلها واللي اخوها واللي ابوها مافيها شي مثل كل الافتتاحات
والصبيان اللي رقصوا كانوا يايين مع الفرقه مو معزومين !!
الحمدلله كلنا نعرف السنع والاصول قاعدين على طاولتنا باحترامنا ونستمتع بالاكل الزين والاغاني الحلوه
هالفيديو حق بعض الاغاني اللي غنوها 🙂
وهذي بعض الاشياء اللي قدموها
باف بيستري على فقع
بلاليط
يريش
ورق عنب
هذا مادري شنو ماجربته بس لونه خطير 🙂
سمبوسه جبن وفطاير سبانخ
كبه
المحشي كان شي خيال
والحلو كان إلبه بس حسافه ماكانت مضبوطه يابسه ان شاء الله يعدلون على الوصفه
وختمناها بحليبه
كل الشكر لمطعم فله والاخ بوحمد وشركه حمد قلم على الدعوة ونستونا الله يونسكم بالعافيه 🙂
مطعم وقهوة فلـه في فندق هوليدي ان داون تاون – دسمان
Instagram @Fallah_kwt