متحف بيت العثمان 2

ونكمل معاكم جولتنا في بيت العثمان لكن اللي ما قرا البوست الاول يضغط هنــا

وصلنا الحين قسم المطبوعات الكويتية من جرايد وكتب ومجلات ومجلدات وغيرها

بصراحه الواحد مايدري شنو يصور وشنو يخلي علشان جذي صورت لي صورتين لعناوين شدتني وبخليكم تستكشفون اذا رحتوا 🙂

في ركن من اركان المتحف حاطين دكيكينات صغار ترمز لتجار معروفين منذ القدم في الكويت ويمارسون مهن قديمه وورثوها اباً عن جد مثل بشت البغلي واطياب المرشود ومجوهرات الفارس وعارضين بعض مقتنياتهم

امممممم وزارة الاعلام .. هالمكان اللي استمتعت فيه جداً .. ماكو فايدة فيني احب هالسوالف 😀

من تدخلون بتسمعون اصوات طالعه من كل مكان ههههههه الحين اقولكم شنو وشلون وليش 😛

قبل لاندخل الغرفه حاطين برا بساط الفقر .. يالله خلنا نروح يالله يالله خلنا نروح يم نجمه وقمر يالله خلنا نزور يالله خلنا نزور بلدان وبشر 😀

ودخلنا الغرفه ترااااااااا

شوفوا شنو فيها 😀حتى السقف مزينينها بصور ممثلينا على شكل فيلم
خلونا نشوف شنو الازياء المعروضه في هالغرفه وحق اي من الاعمال الفنية 🙂

صج قبل لا ابدي خل اوضح لكم سالفة الاصوات !!! الاصوات الله يسلمكم من الشاشات الصغيره اللي يم كل زي وتعرض العمل الفني الخاص فيه مع الصوت 🙂 تخيلوا تمشون وتسمعون مسلسل درب الزلق مني واوبريت شهر العسل مني ومسرحية ليلى والذيب مني ونااااااسه

هذا زي الفنان عبدالحسين عبدالرضا والفنانه سعاد عبدالله في اوبريت شهر العسل 😀

الله يا امون يا حلو العسل وين العسل شايف انت الحين جدامك عسل

وهذي بعض الازياء الموجوده زي هدى حسين في ليلى والذيب وكوت مرعوب (سمير القلاف) اذا ماني غلطانه في مسلسل الاقدار وبدلة الفنان خالد العبيد في مسرحية حفلة على الخازوق ودشداشة المرحوم خالد النفيسي في مسرحية حرم سعادة الوزير والبدلة الجينز المعروفة للفنانه سعاد عبدالله في اوبريت قبل العسل وبدلة الفنانه اسمهان توفيق في مسرحية على هامان يافرعون

آخر صورة للفنان الراحل عبدالعزيز النمش (ام عليوي) الله يرحمه يارب وبعض بطاقاته الرسمية اضافه الى الزي الاشهر في تاريخ المسرح لأم صويلح الذيبه في مسرحية بيت بوصالح 🙂

اتينن هالمسرحية لو شنو ما امل منها وكل ما اشوفها اموت من الضحك جني شايفتها اول مره خصوصاً مشهد الذيييييييييييبه تمقر لي بطنج بلا حتى ذيبه تمقرلي بطنج ومشهد السوق ميرسوووووووووووووو

عسى الله يرحمك ويحللك ويغفر لك يا بو صالح على كثر ما رسمت الابتسامه على ويوهناالفنان الراحل علي المفيدي عسى الله يرحمه ويغفر له موجوده بدلته في مسرحية حامي الديار وزي قحطة في مسلسل درب الزلق اضافه الى بعض المقتنيات الخاصة فيه مثل الساعه وغيرها والبطاقات الرسمية

وفي بطاقة تحمل اسم محمد امين ومهنة صيدلاني هذي كانت بطاقته اثناء تصوير برنامج كاميرا خفيه الفنان عبداللطيف الكويتي ايضاً له مكان خاص في المتحف ومنو مايعرف هالدشداشه الجويتيه والشد الذهبي ؟؟؟ احد ينسى دور من احلى ادوار الفنان الراحل غانم الصالح الله يرحمه ويغمد روحه الجنه .. ذياب دايخ ذيب بنيدر والله لك وحشة يا بوصلاح مثواك الجنه يارب التقيت فيه مرتين الله ياهووو طيب ونفسه حلوة تبارك الرحمن

الزي الثاني حق الملسونه رقيه 🙂 منو غيرها الفنانه سعاد عبدالله

اول زي حق الفنان محمد المنصور في اوبريت سندريلا وايد ناس مايعرفون شي عن هالاوبريت سيرج باليوتيوب وبتشوفون الامير محمد المنصور وسندريلا رجاء محمد كان اختيارهم للفنانين في مكانه بصراحه محمد لايق له امير ورجاء احلى من سندريلا 🙂

النفنوف الاصفر من النفانيف اللي يوم انا صغيره اتحلم البس نفسهم .. مسرحيات هدى حسين وفوازير شريهان كانوا معقديني باللبس المنفوش اموووووت عليهم لما امي الله يرحمها ويحللها شرتلي نفنوف فيه كشاكش زين ما كنت انام فيه من كثر ما احبه واحلم لما البسه اصير سندريلا ههههههههه

المهم شطيت ترى هالنفنوف لهدى حسين في مسرحية شمس الشموس واللي ماشافها ترى وايد حلوة ومعاها داوود حسين وكاظم القلاف وكنعان حمد وعلي سلطان الله يرحمهم وسحر حسين وعلي جمعه

احب اغنيتهم الاخيره .. هذا الوطن هذا الوطن يبقى لنا هذا الوطن احنا نحبه كلنا عاش عاش الوطن تكاتفوا هيا بنا شبابنا ورجالنا ترى الوطن وحب الوطن امانةٍ بارقابنا 🙂 نهاش فتى الجبل والبراري والغفار يا زينه ويازين دشداشته الموف في مسرحية باي باي لندن 🙂

وهالركن خاص لمسلسل درب الزلق حاطين دكان نبوية شبشب وشركة ورثة العاقول ليمتد والججو ججو جوتي موجودين وصورة بن عاقول موجوده والتجوري بسنا يا حسين فلوس بسنا بسنا بسنا موجود وهم لهم مال كلب والقواطي مسطره تشوفونهم لي رحتوا 🙂مكان بوصالح رحمة الله عليه موجود بفلجه ومسانده
وقدوه