أمسية الموسيقى الكويتية (أغاني البحر) لفرقة بن حسين في مركز الميدان الثقافي

اقامت ديوانية الموسيقى التابعة لدار الاثار الاسلامية اليوم أمسية الموسيقى الكويتية (أغاني البحر) التي تؤديها فرقة بن حسين في  مركز الميدان الثقافي

اول مره ادخل المركز واحضر مثل هذه الامسيات ولاحظت وجود اجانب وااايد ما شاء الله عليهم صج يحبون الشي التراثي وانصدمت انه احد الاشخاص اجنبي واثناء الامسية كان يغني معاهم حافظ الاغاني وطريقة الصفقه 🙂 وايد ونسني هالشي 

وهم وااايد حبيت الامسية وفرقة حمد بن حسين بدعوا يعطيهم العافية

ما كانت الامسية بس اغاني البحر .. غنوا سامري واصوات بعد

اول شي دخلوا بالطيران ومعاهم الفريسه

وبعدها وصل العود والمراويس وشالوها اصوات

عاش الحجي 😀

وبعدها غنوا لا هوَد الليل وايد احبها هالاغنية وتذكرني بخالتي قماشة بعرس محبوبة 😀

لا هود الليل وانا في ونيني
يوم اقبل الصبح وانا في نواحيه

يا عاذلي نطرت ليتك تجيني
وتنظر الحال خلك كيف داعيه

كني محموم ولي اربع سنيني
لا اقدر امشي ولا اقدر اداعيه

تحسب اني نسيتك يا ضنيني
والقلب مشغول على ريم الفلاحي

ماترحم اللي غدى شروا الجليلي
وطول ليله وهو كنه يناحي

اللي حاب يحضر مثل هالامسيات الرائعه يتابع حساباتهم في برامج التواصل الاجتماعي

Site Link

FB Link     Twitter & Instagram @DAI_Kuwait