سوق المباركية مع ام عزيز وليال

اتوقع تعودتوا على طلعاتي المباركيه 🙂 

بس اليوم شوي غير لأني اشتغلت مرشد سياحي للعزيزه ام عزيز وليوله وهم اول مره اودي عيال اختي الله يحفظهم ويصلحهم .. اول مره ياكلون بالمباركيه واول مره يتمشون عدل !! اي اي شوقتهم الظاهر وسوووها وياو المباركيه 

وصلنا ولا المكان متروس تبارك الرحمن مو بس دلق سهيل كل المطاعم فل نطرنا تقريبا نص ساعه وفضى مكان

ام عزيز مشتهيه قلوب ومشلتت واليهال الا يبون عيش وانا خاطري بمشويات وانترست السفره ولله الحمد

قلوب وجبود ومجبوس دياي ومشاوي ومشلتت وسلطة دلق سهيل وحمص وخبيزات وطاحوله الربع 🙂

بعد الغدا لازم عاد شوية تهضيم وتمشي بربوع المباركيه الجميله 

وجااان نطيح على لحق علينا يا ولد يحليله راعي الخضره زوغه يغني ويبيع وماقصر غنالنا وصورته وتلقون الفيديو بأكاونتي ببرنامج كيك (اضغط هنـا) ان رحتوا المباركية مروا عليه ونيس 

ومجابل سوق الخضره لقينا محل يشوق كله مجسمات صغيره العاب وملبسينهم لبسنا التراثي اللي تبيع باجلا واللي ماسكه جدر واللي شايله صورة الامير الله يحفظه وهم رياييل شي شايل رادو وشي كندري وشي يشرب قدو يشوقون

حتى مايكل جاكسون مزبر عند المحل ههههههه

واشياء التقليد طحيحه مايبقى فورلا مايبقى توري بورج ولا هارودز كل شي كل شي حتى ليدي ديور 

وصلنا لي صوب عمارة الكويت ومسجد العوازم وشفنا مطعم الرميح والهندي اللي يبيع السمبوسه .. بالغصب ضحك للصوره 😀 

وختمناها بحليب وهيل .. سحلبهم حده لذيذ مع الدارسين والمكسرات وبسبوسه بالقشطه

ودله قهوه عربيه مع تميرات 

ماجذبوا لما قالوا مالك غير سوق المباركية يا ولد الحجيه 😀

مشكوره حجيه ام عزيز اكرمج الله والوعد بالفحيحيل الجولة اليايه 😛