أعلنت الشركة الكويتية ألبان عن اقامتها لعرض حي لتصنيع الاجبان يوم السبت الفائت في البان كافيه بمركز سلطان الشعب عبر التويتر والانستغرام
ولأني من اكبر عشاق الجبن وبالنسبه لي شي جميل اني اشوف جدامي شلون طريقة تصنيعه قررت اشارك اختي انسام اللي بلغتني عن الموضوع واحضر هالحدث الجميل
استقبلنا الاخ بدر الايوبي وعرفنا على المكان وكان عندهم رفوف عرض تحتضن الذ الاجبان والمنتجات المستوردة من اسبانيا وفرنسا
وطبعا الركن الاكبر كان خارج الكافيه لعرض منتجات البان المحلية من البان ومختلف انواع الاجبان ولبنه وغيرها
المكان جميل وطريقة الديكور مرتبه وتوحي بمزارع الدول الاوربيه خاصة سويسرا
كان اختيارهم تصنيع الحلوم بنوعين السادة وبحبة البركة
وهذي مراحل اعداد جبنه الحلوم كامله من الحليب والغليان وضبط الحرارة وغيرها
كان في بالي اعداد الجبن اسهل من جذي لكن طلعت العمليه وايد وايد دقيقة وتاخذذ وقت ويبيلها صبر وطولة بال .. الله يعطيهم العافية مو شي سهل خصوصاً بكميات كبيرة
الحلوم السادة جاهز يحطونه على قطعه قماشة ويلفونه وينضغط علشان يطلع الماي كله
وهذا الحلوم بحبة البركة ونفس عمليه السادة ينلف للضغط
الماي اللي طلع من الحلوم ما ينقط وينضاف عليه الملح وينغلي
بعد ما ينشف فتره لما يصك الحلوم شوي ويبدى الماي اللي ينزل منه يخف يشيلون القماش ويقصصونه وينحط بالماي المغلي مع الملح فتره 10 دقايق تقريباً بعدين يشيلونه ويشخلونه ويعلبونه بسرعه ويحطون فوقة شوي من الماي المالح
والاخ بدر يقدم لنا الجبن الحلوم حااار وفريش 🙂 كان عرض لطيف ومفيد وان شاء الله بيكون لهم عروض لأنواع اخرى من الاجبان كل سبت ان شاء الله تابعوهم على تويتر لمعرفه اخر اخبارهم 🙂
شكراً لألبان على هالفكره الجميلة والعرض المفيد , الاخ بدر الايوبي ماقصرت على الشرح وطولة البال وموفق ان شاء الله
Twitter & Instagram : @AlbanDairy