عيدي السنه غير :(


صبحكم الله بالخير
طبعا كالعادة عناد النومه ماتيي ليلة العيد والعيون تصير مبققه مايبقى شي مانسويه ولاهي راضيه تيي
عموما عيدكم مبارك وكل عام وانتوا بخير

وانا حاطه رويسي على المخده قلت اسولف معاكم بالبلوق عن العيد وتذكرت چني كاتبه بوست من قبل عن هالشي
سويت سيرچ وطلعت كاتبه الاولي والتالي وانا ناسيه
اللي ماقراه (ضغطوا هني) اقروه وضحكوا كاتبته من ٤ سنين
الدنيا تركض

اللي خلاني افكر بالعيد اول شي يضيق الخلق وبصراحه دموعي نزلت عليه
كل سنه اول مانطلع من بيتنا نروح بيت يدتي بالمنصوريه نبارك لها بالعيد
هالسنه اول سنه تمر علينا بدون المنصوريه :(
ماما فاطمه مو موجوده :( وما راح ندخل نلقاها منسدحه على القنفه تنطرنا
الله يرحمچ ماما فاطمه ويجعل قبرج روضه من رياض الجنه ويجمعنا فيج وباميمتي وعماتي ويداني وماما منيره وكل حبايبنا بالفردوس

اول العيد غير مع اللي نحبهم بعد ما تزكرتنا امي الله يرحمها مبجر اول شي ننزل تحت ركض حق بابا موسى رحمة الله عليه اخو يدتي كان ايي مبجر ويحبنا وايد ننزل نعايده ونستلم الهمجه اللي حتى لو ماشافنا يعطيها يدتي وتالي نعايد عماتي وننطلق بجولاتنا اللي ماتخلص الا المغرب

نروح اول شي بيت الشاميه عند يدتي منيره ام امي الله يرحمها وماشاء الله يكون البيت عامر ناس تدخل وناس تطلع واحنا وحظنا بالعيادي ههههه
تالي نروح بيت عمة امي ماما حصه رحمة الله عليها وماما جوهره وخالتي عايشه وخالتي نمشه وخالتي سعاد وماما زينب اخت يدتي وماما لطيفه اخت يدتي الثانيه وماما مريم وماما حصه وبيت الشيخه بالدسمه مادوي شتصير لنا ليلحين بس عماتي يحبونها وايد واهي تحبنا الله يرحمها عليها قهوة حلوه موووو طبيعيه نروح لها مخصوص علشان القهوه :)
ياحلو ذيج الايام ويازين فرارتنا من بيت لي بيت بهديماتنا وكشختنا وذهيباتنا وحنانا ونفسنا الحلوه

بعد كل هالبيوت صار اختصار بيت واحد الله يطول بعمر راعيته خالتي الغاليه نوره وقمنا مع السهر واللويه نتكيسل نقوم الصبح ونروح الظهاري ولا العصر
طبعا انا وحده من الكسالى ههههه بنات خالي والله في منهم شحليلهم يروحون الصبابيح اتوقع مواصلين ماظن شادين حيلهم بالقعده هههه

المهم يا محفوظين السلامه انه كتبت اللي في قلبي والحين بحاول انام علشان ما اتاخر على بيت الشاميه :)

عيدكم سعيد والله يحفظ لكم حبايبكم