صايره كسلانه وايد بالبلوق ابط جبد روحي مع اني اوله عليه وايد
تقرير سفرتي شهر ١١ المفروض من زمان نازل بس كل يوم اقول باجر 🙁

بشجع نفسي واحط لكم جزء علشان تحمسوني واكمل الباجي

طبعاً مخطط السفر كله تغير
كان المفروض جنيف ٣ ايام وبعدها ٦ ايام باريس
لكن صارت سالفه الانفجارات واضطرينا نغير الخطه وصارت السفره
جنيف ميلان روما

جنيف بالنسبه لي ذكريات الطفوله
في اماكن معينه بيني وبينها حنين
وكميه حب مو طبيعيه

اخر زياره لي كانت سنه ٩٧
يعني عمر ١٨ سنه ماشفت المكان

زيارتنا السابقه كلها في الصيف فهذي اول مره اروح لها بالشتا
بالصيف كانت لووووويه والسبب الكرنفال والاجازه بس بالشتا بعد الساعه ٦ قمة الكآبة حسافه عليها

حجزنا كان في فندق كمبنسكي (هلتون سابقاً) مكانه مقابل البحيره على طول بس مو جهة السوق الجهه الثانيه
اللوبي
ما راح اتكلم عن سعر الغرف لأن من فتره لي الثانيه يتغير السعر والافضل تسألون السفريات او المواقع اللي بتحجزون منها

هذي ضيافه الفندق عند الريسبشن
الغرف حجمها زين ومريحه
ومتوفر فيها كل اللي تحتاجونه والشي الزين بفنادق هالايام انه يحطون لكم كل يوم بطل ماي مجاني


قطينا الجناط ونزلنا نتمشى شي ونتعشى
مثل ماقلت فرق عن الصيف
هدووووووء وحتى جهة البحيره صخه الواحد يخاف يمشي
ستاربكس مقابل البحيره
ميغروس في جنيف وهذي تحديدا امووووت عليها
فندق بلزك كنا ساكنين فيه سنه ٩٧
على ضيج الايام كانت الغرفه يطرد فيها الخيل كبيررررره وميزته مجابل الجمعيه وتحته مجموعه مطاعم منها تركي يبيع شاورما وهم جدامه ساحه كل احد يسوون فيها سوق للمزارعين وحتى الباص له وقفه يمه ومو بعيد من البحيره
حصلنا مطعم بيتزا وقلنا نتعشى عندهم
اسم المطعم
La Rotorde
اكلهم زين والبيتزا طيبه
ماكو ملاحظات عليه


ان شاء الله اكمل معاكم ثاني يوم قريباً 😉