تم افتتاح محل جديد في جمعية الزهراء اسمه سلافه كراتس متخصصين في الحلويات وخاصه الطباعه على الشوكولاته
شغلهم يونس خصوصا لليهال والحفلات الخاصه والمدرسات يحبون هالسوالف بعد 🙂
وخصم ٢٠٪ بمناسبه مهرجان الشوكولوغرافي في المحل
Tel : 99844947
Instagram @Solafas_crafts
وانا اتمشى بالمباركيه لاحظت وجود فرع جديد لبياله كافيه الموجود بالافنيوز بمنطقة السوق
القعدات حلوه وشكله بيكون عجيب بالشتا خصوصا بوجود الدوه
توه فاتح لكن لما مريت كان مسكر مادري شالسبب !!
جوز كافيه من المطاعم المشهوره بلندن وافتتح مؤخرا في الكويت لكن ليلحين ماحصلت لي فرصه اجربه
جربت اللي في دبي مول ومكانه بآخر منطقة ركن الازياء بالدور الاول
قدمولنا سلة الخبز الفريش مع الزبده
طلبت وكالعاده موهيتو منننننعش
وكان لازم اجرب الروزيتو اللي ما بقى احد ما مدحه ولقيت بالمنيو مكتوب سبيشل روزيتو قلت اكيد اهو فطلبته مع الدياي
انا كنت شايفه صورته من قبل عند صديقتي مدور لكن اللي ياني لا فسألتها قالت هذاك الروزيتو العادي وهذا السبيشال نفس الطعم لكن هذاك مو مخلوط انتي تخلطينه وهذا مجهزينه وخالصين
والله ما جذبوا طعمه خيااااااااال وااااااايد لذيذ بس ما شاء الله الكميه وايد راهيه تكفي تقريبا شخصين اذا يواعه
وطلبنا بيرجر كانت عاديه باستثناء البن او نوعيه الخبزه كانت وايد ترفه وطيبه
A Madea Christmas حضرت قبل جم يوم فيلم
الفيلم نوعه كوميدي وقصته ونيسه
قصته عن بنت اسمها لاسي تكون متزوجه من كورنر بالسر وهو مهندس زراعي ابيض ومغبيه عن امها لانه امها عندها حساسيه من البيض كون زوجها تم قتله من ابيض
لاسي عايشه بمنطقه ريفيه وتعمل مدرسه في مدرسه ابتدائيه وكانت المدرسه لديها مشاكل ماديه وماتقدر تسوي احتفالات عيد الميلاد لكن لاسي تقنع صديق قديم لها بالحصول على رعايه من الشركه التي يعمل فيها لاقامة الفعاليه بالكامل
وبما ان زوجها ساكن معاها في بيتها الريفي تضطر انها تعتذر لامها عن الحضور لعيدالميلاد لكن امها وعمتها ماديا يسوون لها مفاجأه بحضورهم لها !!
ماديا حدها خفة طينه عكس الام والمشكله اللي راح تصير انه والد ووالدة كورنر كانوا يايين يقضون معاهم الكرسمس فيضطرون يمثلون انه كورنر عامل بمزرعه لاسي الى ان يفتضح الامر وهم الرعايه كان وراها مؤامره اذا رحتوا الفيلم بتعرفونها 🙂
خوش فيلم يستحق الحضور 🙂
الاسبوع اللي فات كنت مدعوة من كرمبز على حفل شاي انجليزي على الطريقه القديمه ايام العشرينات وكان المفروض اللبس يكون فنتج او علي طريقه العشرينات
مع الاسف ما سمحت لي الظروف اني احضر فطلبت من صديقتي افنان تصورلي جم صوره للمكان لانه ادري انه ترتيبات كرمبز عجيبه وماكان بخاطري افوت عليكم مشاهدة ترتيبات مثل هذي 🙂
اسيل واروى دايما ما يطلع منكم الا الشي اللي يشوق :*
للي متابع الانستغرام يدري ان شانيل من الماركات اللي احبها وايد
بكل سفره لدبي اكون حاطه في بالي جم شغله اخذهم من البوتيك لانه ما شاء الله بوتيك الكويت مايقعد فيه شي
وبدبي عندهم اكثر من بوتيك فالخيارات تكون اكبر 🙂
على فكره فرع مجمع وافي سكروه اتوقع لانه المجمع ماله رواد مثل اول 🙁
المهم هذي بعض الاشياء اللي شفتها في بوتيكات شانيل دبي (الامارات مول، دبي مول + ليفل، برجمان)
نزل عنهم كولكشن الكروز بس ما شفت كل الجناط
الاغلب احذيه
اخليكم مع الصور
