والله ادري اني صايره كسلانه ومن اشوف صور وايد اتنح وادري في ناس وايد يسألون عن باقي تقرير تركيا
بس ميخالف اعذروني شويه والله الصور تقص الظهر وقت التسنع والتصغير واللويه
المهم علشان ما اطول عليكم وعلى شان اذكركم باليوم اللي قبله – اضغط هنـا
اليوم السادس الله يسلمكم قررنا نقضيه من الصبح في مدينة العاب كانوا فاتحينها يديده اسمها
Vialand
اتذكر حزتها كنت مسويه سيرج بالنت و ماحصلت الا جم صوره للافتتاح مايبردون الجبد بس كاتبين انها يديده وكبيره فقلنا نروح نستكشف المكان
فأول ماقربنا يمها بالتاكسي شكلها كان صج يشوق والاحلى انه يمها مرتفع عليه مول كبير
احسن شي علشان نخلص ونتسوق مره وحده
هذي كاونترات الحجز
التذكره كانت بقيمه ٧٩ ليره للشخص
عند باب المدينه لقينا هالمهرجين يستقبلون الاوادم ويحلوهم نفسهم حلوه
البوابه
اول ماتدخلون تلقون منطقه لالعاب الاطفال
يعني لي حد ٨ سنين تقريبا او اقل
بعدها تمشون في ممرات مستوحاة من البيوت التركيه القديمه
وحتى الارضيه نفس طريقتهم بالقرى والارياف
احنا كان معانا ويل جير حق خالتي فتلعوزنا شوي مو سهل حق العربانات الثقيله
بعدها عاد بتشوفون بعض الالعاب
بعدها تييكم نزله ودريات تنزلونها فاصحاب العربانات لهم نزله خاصه شوي بعيده
الالعاب اللي تحت تكون شبابيه اكثر وحق الكبار
تمثال القرده يونس للتصوير التذكاري
عندهم اكشاك موزعه للحلويات والايس كريم
وهم محلات خاصه للتذكارات الخاصه بالمدينة
في بالمدينه مطعم واحد مو ذاك الزود وخذينا منه ماي وشي بسيط نسد فيه يوعنا
رايي في الحديقه يعني ونيسه كأول مره اروح لها بس على كبرها المفروض تكون واو اكثر من جذي
يعني باختصار رحت لها مره بس ماظن اعيدها
عقب رحنا نتمشى في المول واهو مول مفتوح شارع بالنص محلات دار مداره ومسكر بالدور الارضي وفيه مطاعم سريعه فوق
المول يونس حق اللي ياي فيالاند م،و مال عنوه حق المول بروحه
طبعنا نصنا تعبوا وقالوا بيروحون الفندق عقب المول والنص الثاني قلنا نبي نشوف مكان ثاني فخذيت براي احد من متابعين الانستغرام وقررنا نروح مطعم وقهوه اسمها يوليوس وايد مشهوره والتكاسي يعرفونها
موقعها اينن والمنظر اينن لانه المطعم على مرتفع ويطل على البحر
انا طلبت قهوه تركيه
والباجي طلبوا كابتشينو
كانوا موصيني اذوق التراميسو
وكان فعلا شغل عدل لذيذذذذذ
وطلبنا حلو ثاني على كريب وايس كريم ماكان ذاك الزود
المطعم ماشاء الله زحمه وبعد مابدت تظلم الدنيا صار الجو احلى والقعده اتينن
شوفوا المنظر
صار براااد ويابولنا كنابل وشغل عدل فقلنا بنتعشى موليه محنا طالعين
وطلبنالنا جويهه قبل العشا
واحنا قاعدين مانشوف الا هالريال اللي كل شوي احد سلم عليه ووقف يصوره
ويهه مو معروف بس قلت ماني مفوته الفرصه يمكن شخص مهم واتحسف لووول
قلت للويتر منو هذا ؟ المهم بعد جهد جهيد فهمت انه لاعب كره معروف عندهم
جان اقوله هاك الكاميرا صوره لي هههه مات ضحك بس اشوه حبوب راح استأذن منه وقاله هالطاوله يبون صورتك فسلم علينا من بعيد وصور
عشانا كان بيتزا مارجريتا وتكا لحم وكل شي لذيذ عندهم
هذا كان اليوم السادس وباقي بس يوم واحد ونخلص التقرير التركي اللي مو راضي يخلص 🙂
