من زمان ما كتبت بوست اسولف فيه 🙂
بديت التدوين سنة ٢٠٠٨ و ب٢٠١٠ بديت اتعرف على بعض المدونين خصوصا بعد ماصار في بعض الايفنتات اللي تجمعنا وكنت محظوظه لله الحمد بالتعرف على اشخاص ينحطون على الجرح يبرى من ضمن الاشخاص صديقتي الغاليه دندرمه والحقيقه مو بس صديقه ندويه بمثابة اخت دنيا عسى الله يحفظها والبيت اللي فعلا ارتاح ولا اتكلف وافضفض فيه بيتها 🙂 عساه دوم عامر بحس راعيته و راعية يارب
اليوم ندوي عازمتنا على غبقه صغيره انا وحبيبات قلبي سويره ام جوجو و جاكي والله احلى غبقه بالدنيا هههههه
من زمااااان ما قعدت على الارض اشرب شاي اليوم كلنا تجابلنا على الارض بين مطارة الجاي ودلة القهوه وخير رب العالمين دار مدارنا
يازين قعدتهم وسوالفهم الله يديم المحبه 🙂

هالقهوة الزينه يابتها ندوي من دله بكيفان

شرايكم بهالمغريات

اللقيمات نقصه من حمد قلم ماقصرت امه مسويتهم بيدها الله يحرم ايدياتها النار واايد لذيذه

والحلو البارد من الدنماركيه انا ماجربته بس مدحته ام جنى

وهذا الحلو (كرونت) هبة هاليومين بنيويورك يابته ام جنى من بيكينج تراي على جوكليت او كسترد

اهي عباره عن شي يجمع بين الدونت و الكرواسون لذيذه بس ثقيله مال قطيعه صغيره بس
شوفوا داخلها

ماخلصنا دندرمه اذا ما ترست المكان ماتكون دندرمه ههههه كثر الله خيرج خيتووو
شوفوا الجانب الاخر سلطات وسندويتشات وكنافه وبيبي بيتزا قيصر وصاج عسى الله يتمم علينا بنعمته

وبعد ما خلصنا غبقتنا المجكنمه المريحه ودعتنا قطيوتهم اليديده عند الباب هههه ندوي مسميتها توته

خوش غبقه ماقصرتي ندوي ويازين مجابلكم يالحبايب و نلقاكم الاسبوع الياي يارب زهبوا سوالف هههههه