من الهبات اللي حبيتها هالسنه هبة جواتي الرياضه او السنيكرز
وان الماركات قاعدين يتفنتقون فيها
بعد شانيل وديور
اعتقد الهبه اليديده اللي بتكون ضاربه جوتي الرياضه آسترو المرصع بالكرستال من ميو ميو
يقولون انه ماراح يكون موجود الا في بوتيكات معينه ومنهم ذا ليفل في دبي
حبيتوه ؟
من فتره سمعت انه مطعم سيميت سراي التركي فتحوه بالكويت
وتحديدا في اي مول بحولي
واخيرا صارت فرصه امر اجربه للريوق
المكان والله استانست عليه مريح وماكان متروس يعني خذينا راحتنا وطلبنا خلص بسرعه
والاسعار معقوله
سميت تركيا
اشياء تشوق
عندهم انواع بيض ونوتيلا سميت يم يم
المكان
الچاي عجيب
سميت بالشيدر والزيتون
هذي فيها بطاط
بيض بالطماط والجبن اسمها نمنم ومادري منمن هههه
المهم كانت عاديه مو واو
Tel : 22664606
Instagram @SimitSarayi_kw
اليوم الرابع قضيناه في منطقة ليل الى العصر تقريباً
قمنا الصبح وطلعنا نتمشى بالمنطقه
شوفوا الشجر ماشاء الله الالوان عجيبه
كانوا يجهزون للكرسمس والزينه شحلوها وبابا نويل موجود بعد 🙂
بعض الصور من ليل
لندن في وسط ليل ههههه مادري شيايب كبينة التلفون هناك
C&A
من المحلات اللي وايد احبها ملابسهم واغراضهم كواليتي حلو وبسعر معقول
وايد زين للصوايغ وهدوم اليهال وحتى الكبار
لافييت ليل صغيرونو كلش مافيه شي زود ماحبيته
واحنا نتمشى شفت كلمة شيخ على جاكيت واحد من اللي يمشون واعتقد دعايه حق ككاو ميلكا
او يقصدون ميلك شيك خخخخ
وجان نلقى سوق الكرسمس 😀
احلى شي يونسووون
اكشاك يبيعون مختلف انواع البضايع خصوصا المتعلقه بالكرسمس وهم الاكل
ككاو وجبن وكبابيس واكسسوارات وتحف وغيرها
التلفزيون يصورون
هذا يسوي الاسامي بوايرات الحديد وايد حلو
Old is Gold
تذكرون هالفرارات اللي ننفخهم 😀
Churros ومن يقاوم ريحة ال
وظلينا نتمشى بعدين رحنا الفندق خذينا الجناط اللي كنا مخلينهم بالمخزن ووصلت السياره اللي متفقين عليها
علشان ننطلق الى بلجيكا وتحديدا بروكسل وطبعا كل هذا تم بعد ماحجزنا فندق هناك
وهذي الخيره في الغاء حجزنا السابق في ليل
لأنه ليل ماعجبتنا وايد يعني مو مال الواحد يقعد فيها بصراحه مدينه فرنسيه عاديه
وبينت بروكسل 🙂
ووصلنا الفندق
Radisson Blu Royal Hotel
الفندق مكانه ممتاز والفندق جيد جيدا
محلات الشوكولاته والمطاعم والقهاوي والسنتر قريبين جدا من الفندق
حطينا غريضاتنا وطلعنا
لفتت نظري هالمزيونه
وسيدااااا على المكان الاكثر لذااااااذه يم يم ككاو كل مكان
Galerie de la Reine
مبنى صاير مثل السكه او الممر وفيه محلات كثيره للشوكولاته مثل ليونيداس ونيو هاوس وقودايفا وغيرهم
بالنسبه لي احلى ككاو حبيته كان ليونيداس خيااال وحده حده رخيص
نيو هاوس عجيب بعد
تخيلوا كل مكان تدخلون يذوقونكم علشان تختارون امبي الككاو يطلع من خشومكم ههههه
ووصلنا لي الساحه غراند بليس
على ماخلصنا محلات الككاو الا ناشف ريجنا وقفنا عند قهوه وشرينا ماي
مايهم نازك عنونووو
ومرينا على محل عنده شراشف ومفارش ومشغولات يدويه حلوه
عجبني هالشي للشوك والقفاش
طول ما احنا بمحلات الككاو نجرب خالتي هدى تقولنا لاتكثرون وراكم باييلا وراكم باييلا
وانا بصراحه مع السي فود مو ذاك الزود
فقلت اكيد عاديه وماراح تعجبني
وصلنا المطعم
السلطة طيبه
ولاني خفت تطلع الباييلا مو حلوه طلبت سباغيتي
كان لذيذ لكن ماكليت منه الا قفشتين تدرون ليش ؟
لأن الباييلا كانت خياااااال واي شي مو طبيعي
طلبناها بس بالربيان بدون كلاماري ومحار وهالسوالف
بس والله هديت السباغيتي مابغيته لانها ماتنهد
اللي يروح بروكسل ومايجربها طافه شي عدل لااااازم تجربونها
وهذا اليوم خلص 🙂 قريبا انزل لكم ان شاء الله تكملة الرحله
فنانه ماقضت بالوسط الفني الا سنوات قليله وبعدها اختارت الاعتزال والتفرغ لحياتها الزوجيه والامومه
رغم السنوات القليله الا انها كانت علامه بارزه بالفن الكويتي والكل يتذكر ملامحها الناعمه وكلامها الراقي وهدوئها ويذكرها بالخير
رجــاء محمــد
فنانة الزمن الجميل اللي لما اسمع اغنيه شويخ من ارض مكناس اتذكرها واللي حبيتها بسبب شبهها وبوهتها القريبه من الوالده الله يرحمها
كانت لي فرصه حلوه اني التقيت فيها قبل شهرين مع الاخ العزيز سعود المزيعل اللي كنت من متابعينه لما كان صحفي فني ومن متابعين صفحته الحاليه اللي تعبق بالتراث الكويتي في الانستغرام
قبل لا اقولكم عن قعدتنا الحلوه وطيبة ماما رجاء
هذا فيديو اهداء لماما رجاء محمد ولكم 🙂
اجتمعنا في كافيه جوكليت بمشرف وقعدنا قعده جميله جدا حبيت من خلالها الانسانه رجاء محمد
قمة الذرابه والبساطه والخلق الجميل
سولفت لي عن بداياتها بالفن وانها كانت تحب الغنا واما التمثيل فكل ادوارها سوتهم بفضل توجيهات من الفنانين الكبار اللي معاها
تقولي ماعرف امثل !! قلت لها عيل شلون هالجم سنه خلت الاوادم تحبج وتذكرج ليلحين هههه اقولها علشان انتي جميله تقول انا عاديه
هههههه يازينها
والله قضينا اكثر من ٣ ساعات يميع ماحسيت فيهم مقعدها تبارك الرحمن حلوو ولا هان الاخ سعود
هذي طلباتنا 🙂
هديه بسيطه لماما رجاء
@Special_2you من مشروع
ماحلى الخاتم الا بيدچ
ملبوس العافيه :*
وايد استانست انا واختي ام ناصر معاكم والله يحفظج يا ماما رجاء لعيالج وحبايبج وتشرفنا بمعرفتچ يالحبيبه وربي يحفظك يا اخوي سعود للحبيبه الوالده ويخليها لك
اليوم الثالث كان المفروض نسوي فيه جيك اوت علشان المغرب حاجزين قطار ياخذنا لمدينة ليل
فجهزنا اغراضنا وسوينا جيك اوت من الصبح وخلينا الجناط بمخزن الفندق علشان عقب مانتمشى بالسوق نمر ناخذهم ونروح سيدا الستيشن
نزلنا نتريق وانا شريت لي هالبريتزل بالجبن
وكلش ماعجبني فكان من نصيب الحمام عليهم بالعافيه 🙂
قلتلكم حريم وسوق هههه
كانوا قايلين لنا في تفتيحة جديده بشانيل علشان جذي عقب الريوق سيدااا البوتيك
كانوا منزلين السنيكرزات وكولكشن كروز دبي
بعدها مرينا ديور
بوتيكات بره فيهم سنع ضيافه ويجابلونكم عدل ونفس حلوه
شحلو الزينه
الى جاليري لافييت
فترينتهم تشوق بس من كثر الاوادم والزحمه ماقدرت اصور
زينه الكرسمس داخل لافييت
يشوقون جناط سيلين .. هناك يبردون القلب يطلعون لكم كل الالوان
هالماكرون مشهور بلافييت بس ديروا بالكم اغلب الانواع يستخدمون فيها الكحول
قعدنا شربنا قهوتنا وخلينا في انجلينا كافيه
بالنسبه لي عادي مادري الاوادم ليش ميتين عليه مافيه زود ابدا
بعدها رحنا الفندق خذينا غريضاتنا وطيران للستيشن
اشوه لقينا وحيَد ساعدنا على قشنا لما وصلنا داخل
حبيت الحركه
اللي يشتري شي من الكوفي شوب حاطين طاوله والكرسي مالها على قاري
يعني منها تاكل او تشرب ومنها تتحرك 🙂
محل نيو هاوس للجوكليت البلجيكي
كنا حاجزين درجه اولى لانه السعر كان مايفرق وايد عن العادي
احسن شي انهم حاطين بلاك كهربا وشحنا تلفوناتنا 🙂
تبعد ليل عن باريس ساعه الا ربع تقريبا
ليل مدينة تقع في أقصى شمال فرنسا وتعد رابع أكبر المدن الفرنسية وقريبه من بلجيكا
وصلنا بال٦ وشوي وخذينا تاكسي لي الفندق
وكانوا مجهزين الويل والزينه للكرسمس
سوقهم صغير كلش
وصلنا الفندق اسمه واي
وبصراحه صج واي هههه
لأنه دشينا وعطيناهم الحجز اللي كنا مسوينه في موقع بوكينج جان يقولون الحجز امس مكنسلينه !!!!
ودلول صديقتي اللي حاجزه الحبيبه مو معرفه ايميلها على تلفونها
وتوهق البطل !!!
والمشكله الفندق فل وكان عندهم بطوله تنس في ليل عقبها بيوم فالفنادق فل وقاموا يدقدقون يدورون لنا فندق ثاني
ولله الحمد تسهلت ولقولنا ليله وحده في فندق كراون بلازا
وكل هالشي خيره بعدين اقولكم ليش 🙂
وصلنا الفندق ولله الحمد وهذي غرفتنا
فيو غرفتنا
وطلعنا نتمشى ونتعشى
هذا مجمع عندهم بليل
دار الابرا في ليل
ووصلنا لي الويل 🙂
اتشوق
كان اكو جم مطعم صغير اخترنا واحد قعدته حلوه
حاطين بلانكيت عن البرد
المنيو
طبعا كله فرنسي بس اشوه اللي يشتغل كان من المغرب العربي اسمه الاخضر يحليله فطلبنا منه شوربه وباجيت فيها جبن وطماط
الاكل الله يزيد النعمه 🙁
الشوربه ماتنشرب والباجيت كلش مو واو
يعني بس نسكر اليوع
عقبها مرينا سوبرماركت صغير شرينا ماي
وصورت لكم هالصوره لككاواتهم للكرسمس
وين رحنا بعد ليل ؟؟ متابعيني في الانستغرام اكيد يدرون 😉
من زمان ماسولفت معاكم بالبلوق صار كل شي الحين بالانستغرام !
بس ولهت اني افرغ كل اللي بقلبي هني وعلى راحتي مع ان ماكو تفاعل زايد بالكومنت مادري ليش متابعيني طاقهم الصمت هني بس يشوفون بعينهم ههههه
المهم كنت بتكلم عن سالفة الطلعه بروحكم !!
السنين اللي طافت كان عندي مشكله اني اتمشى بالسوق بروحي او اتغدا بروحي او حتى اشرب قهوه بمكان بروحي
كنت استحي ان الاوادم تطالعني وتقول شهالمينونه اللي قاعده بريحاتها بس مع الايام صرت احس اني بحاجة لهالقعده وانه الاوادم شوي شوي قاموا يتعودون على هالوضع خصوصا بوجود الانستغرام والسناب جات وهالبرامج صارت ونيس بالقعده ههههه
شوي شوي عودت نفسي اني استانس بالطلعه حتى لو كنت بروحي مع ان الصديقات وخواتي موجودين بس ساعات اتعييز حتى ارفع السماعه اقول حق احد تعال
اطق سيارتي سلف واروح اخلص شغلي بريحاتي بهدوء
بديت اول شي اشرب قهوتي بروحي او اخذ معاي الاب توب بعدين تشجعت اني اروح السينما بروحي خصوصا اذا العرض بقاعه في اي بي احلى واحلى اكو احسن من ان الواحد يدلع عمره
وبعدها شوي صار عندي الجرأه اني اقعد بمطعم اطلب غدا بروحي وعلمت رفيجاتي على هالسالفه
ما لنا غنى عن اليمعه والطلعه بس لازم الواحد يعتمد على نفسه ومايربط وناسته بالناس والوقت
يالله يا متابعيني الصامتين سولفوا معاي وقولولي جربتوا تطلعون بروحكم ؟ ولا ليلحين تستحون الناس يشوفونكم ؟ 😛