بحمد الله تعالى تم تركيب الثيم الجديد بالمدونه من تصميم اختي العزيزه جمانه الغضبان اللي ماقصرت ابدعت في التصميم وكل شي كان على ذوقي، صج تأخرت سنه كامله و١٠ ايام بس طلعت شي وايد حبيته 🙂
ادري تعودتوا على الثيم القديم وادري انا بعد بفقده بس التجديد مطلوب علشان لا تملون وامل
كل الشكر لاخوي محمد النقي اللي صمم لي الثيم القديم اللي استمر معاي ٤ سنوات وله مكانه خاصه بقلبي كونه البدايه الحقيقيه للمدونه على دومينها الجديد
اتمنى يعجبكم الثيم الجديد 🙂
قولولي شرايكم ؟
الويك اند اللي طاف حبينا نتري ونجرب مكان يديد فقلنا نجرب ريوق مطعم فله
انا رحت الافتتاح بالليل كان شكله شوي غير لكن الصبح وااايد اشرح ما شاء الله
الثيم يبين اكثر الصبح وحاطين اغاني قديمه عجيييبه كل اغنيه احلى من الثانيه
اللي مختارهم حده ذويق
طلبنا ريوق دسمان
فيه حمص ومتبل وبيض عيون وفطاير سبانخ ولبنه وجرجير مع الجبن الابيض
اضافه الى سلة الخبز و جاي او قهوه او حليب
طلبنا كرك ووصل بغوري مع شمعه وماشاء الله راهي عيزنا نشرب فيه وحاااار
مربى انواع وزبده
الخدمه ماشاء الله سريعه وحتى الخبز فريش ومن يبرد يبدلونه بحار
صينيه ريوق دسمان
بصراحه كل شي كان لذيذ وانصحكم فيه 🙂
الفاتوره ماذكر بجم بس ماتعدت ال ١٠ دك
مطعم وقهوة فلـه في فندق هوليدي ان داون تاون – دسمان
Instagram @Fallah_kwt
الاربعا اللي طاف صديقاتي الغاليين عزموني على العشا بمناسبة عيدميلادي بمطعم يديد اول مره اجربه في برج كيبكو اسمه
Mezzo
المطعم يونس ديكوره بسيط واضاءته وايد خافته والموسيقى وايد عاليه فاللي مايحب هالنوع من الاماكن لا يروح
استقبلونا بشوربة مشروم
كانت بارده حسافه
المنيو
استانست على طريقه تقديم الصوص
موهيتو
Warm Goat Cheese & Walnut Salad
حدها عجيبه لازم تجربونها
بوراتا
Jalapeno Glazed Almond Shrimp
شي مو صج ربيان باللوز والسمسم الاسود خيال
BBQ Rib
Brisket Pizzetta
باستا مادري شسمها
وكيكة عيدميلادي كانت بودينغ موز 😀
مشكورين يالغاليين احلى يمعه واحلى احتفال بوجودكم أحبكم :*
Mezzo is located in Kipco Tower
Tel : 22943209
Instagram @Mezzo_kw
وصلتني دعوة جميله من دار هاء (السنابل) لحضور حفل اطلاق وتوقيع كتاب روان الشريف
Dose of Sunshine
الكتاب باللغه الانجليزيه وفيه عبارات تحفز على الايجابيه والسعاده والعطاء
وقبل لا نطلع من الايفنت عطونا ورده صفرا نهديها شخص مانعرفه و ورد مع عباره جميله لازم نسقيه بيدنا كل يوم وفورچن كوكي ناكلها ونشوف حظنا 🙂
كانت الورده من نصيب احد الاخوان اللي يشتغلون بعصير القادسيه 🙂
يوم الجمعه خذيت بنات اختي الله يحفظهم ورحنا الافنيوز
كنت مواعدتهم نسوي لهم دبب في محل بيلد ا بير
المكان يونس واحنا الكبار تطير بوهتنا شلون اليهال 🙂
اول شي تختارون الدب ويكون فاضي بدون حشوه
اشكال والوان دبب وقطاوه وارانب وغيرهم
عندهم جهاز تقدرون تسجيلون صوتكم وتحطونه داخل الدب او تختارون من العبارات الجاهزه عنهم اي لوف يوو و بيرثداي والسلام الوطني الكويتي وغيرهم
وهم عندهم شي يطلع ريحه حلوه بعدة نكهات فراوله وچوينيق قم وكاندي علشان لما اليهال يلم الدب يشم ريحه خنينه
وصار وقت انحشي الدب بالقطن ويكون باختيار الطفل يبي الدب لين ولا متروس
وبعد الحشوه يعطون اليهال قلب ويقولون لهم يتمنون امنيه ويحطون القلب داخل الدب
واستلموا اليهال الدبب
واحلى شاور هههه
بعدها اختيار الملابس
وبصراحه كل شي نتيفه يشوق واليهال قاموا يحوسون يدورون
الدشداشه والعباة زوغه
والاكسسوارات نظارات وجناط وشبابيص والعاب
مكان التلبيس
واخر شي يدخلون البيانات عندهم في الكمبيوتر ويستخرجون شهاده ميلاد الدبدوب
سميناهم سنوي و لوفلي ههههه
وتقدرون بعد تسوون لهم جواز عشتوا 😛
لولو مع لوفلي 🙂
خوش باكيج 🙂
Thanks Build A Bear Workshop, Janat, Veronica & Sunil 🙂
Build A Bear Workshop Located in The Avenues, Phase 2
Instagram @Buildabear_gulf
الاسبوع اللي طاف كنا بالدوام نبي نتريق شي غير
فحست شوي بالانستغرام وحصلت اكاونت يبيعون ساندويتش بس بطريقه غير شوي
كان المفروض الطلب قبلها بيوم بس صاحبة المشروع ماقصرت وقدرت تسويلي الطلبيه بساعتين ونص
عندها انواع وايد من الحشوات ولازم نختار ٤
فأخترنا البيض مع المشروم وبطاط وبيديان وحلوم وجبن ابيض
وصل الطلب حار ماشاء الله وقيمته مع التوصيل ١٣ دك
الماعون مقسم كل نوع بروح وكل ساندويتش منها ٦ قطع
وبالنص حاطه طحينه
وايي مع العلبه علبه ثانيه اصغر بطاط شبس
البيض والمشروم
لذيذه
الجبن الابيض بساندويتش مغلف بالزعتر
كانت الجبنه حامضه مع الزعتر فالحموضه وايد فاللي مايحب الحوامض لا يطلبها
الحلوم كانت طيبه وايد مالحه
الملكه كانت البطاط والبيديان الكل استانس عليها والوحيده اللي خلصت من اول الريوق هههه
For Order (WhatsApp) : 99174322
Instagram @Valleys_Factory