كانت لنا زياره سريعه لدبي مدتها يوم واحد وقبل السفر فكرت بفندق قريب وبنفس الوقت تكلفته مو كبيره لأنه باختصار ماراح نقعد ونستمتع فيه مجرد نحط راسنا وننام ونقوم نسوي جيك اوت
بعد بحث في الانترنت عن لقيت فندق وايد ناس مدحوه وبنفس منطقة دبي مول
Ramada Downtown Dubai Deluxe Suites
لقيت السويت اللي عرفه وحده ب48 دك Booking وعن طريق موقع
وعلى طول تم الحجز
الريسبشن ودودين جداً وبأقل من 10 دقايق كان كرت الغرفه جاهز حتى بدون اخذ تأمين مثل ما اغلب الفنادق يسوون
ما توقعنا السويت هالكبر ما شاء الله راهي .. سويتنا غرفه مع الصاله والمطبخ التحضيري والحمام تكرمون
في مكان خاص لطاولة الأوتي مع أوتي للملابس
المطبخ مجهز بالكامل .. مايكرويف وسخان ماي مع عدة القهوه وبطلين ماي مجاناً وثلاجه كبيرررة خاليه والصحون والقفاش وكل شي
احلى شي موفرين خدمة الطلب من ستاربكس في الفندق 😀
الغرفه وكبت كبير تتوفر فيه سجادة الصلاة والقرآن اضافه للتجوري وتلفزيون آخر وبرنده مع الكراسي وطاولة
تكرمون الحمام وفيه بابين واحد على الصالة والثاني على الغرفه
بصراحه وبدون مقدمات ما شفت ولا سلبيه على الفندق !!!! وهذا نادراً ما يصير لكن اقروا ايجابياته
* الفندق قريب من دبي مول جدا جدا لو الجو حلو الواحد يمشي لكن اخذنا تاكسي ومبلغ التوصيل 7 دراهم فقط لكن التكاسي اقل شي ياخذون 10
* التكاسي موجوده على طول مايحتاج تنطرون
* الانترنت مجاني ل 3 اجهزة كل واحد باسوورده مختلف وسرعه الانترنت ممتازة
* السرير مريح جداً جداً
* موفرين مخدات زيادة في الكبت مع وجود 4 مخدات على السرير
* وجود فيش كهرباء بكثره بالسويت مع موزعات صغيره وهذا عمري ماشفت احد من الفنادق وفره من قبل
* الحمام تكرمون فيه بربيش
هالمميزات تخليني ارجع مره ثانيه اسكن بنفس المكان .. مريح وممتاز وسعره اكثر من ممتاز على هالخدمات الراقيه
للحجز وتفاصيل اكثر … اضغط هنــــا
