من متع السفر عندي تجربة الفنادق سواء الفخمه او العاديه
احب اقارن واشوف شنو المميز بكل فندق اقعد فيه
هالسفره ماكانت موفقه وايد خصوصاً بالنسبه للانترنت
جربت هالمره فندقين اول مره اقعد فيهم

الاول مروج روتانا في الجي بي ار
الفندق مكانه وايد حلو وكل شي حواليكم من مطاعم وقهاوي وشاطيء اينن

الاستقبال كان ممتاز وضيافه ماي وقهوه بس نطروني مايقارب ساعه الا ربع على ما جهزت الغرفه
الانترنت مجاني فقط في اللوبي
تبي انترنت بالغرفه ادفع

شي يديد يطبق الان في فنادق دبي وهو دفع ضريبه اضافيه باليوم ٢٠ درهم لفنادق ال٥ نجوم و١٥ درهم ل٤ نجوم و١٠ دراهم عن بو٣ نجوم
وهالمبلغ تدفعه عن كل ليله وعليكم الحساب

غرفتنا كانت ديلوكس بقيمه ٩٥ دك الليله حجزتها عن طريق مكتب سفريات
اذا بتسئلون ليش ما احجز عن طريق بوكينق جربت جم مره لكن الضرايب في دبي عاليه يقولك ٢٠٠ دك ولما تيي بتدفع تنقلب فوق ال٤٠٠ عااااادي
علشان جذي قمت احجز عن طريق السفريات على الاقل ما اشيل هم جم بدفع هناك

الغرفه زينه وحجمها حلو والسرير مريح ويوفرون الماي بشكل يومي كهديه من الفندق لكن العيب الوحيد مكرم السامع الحمام مافيه رشاش للبديه 🙁

فيو غرفتنا

الخدمات المقدمه مع الاقامه هي الجيم وحمام السباحه ويوفرون لكم شمسيه وفوط وجنطه ومفرش شاطيء وثلاجه صغيره للمشروبات مع الماي اذا بتروحون الشاطيء
وعندهم ممر او جسر من صوب حمام السباحه وتنزلون منه بالاصنصير لي الشارع يعني ماتمرون بالرسبشن واللوبي اذا بتروحون البحر او ترجعون

الريوق بوفيه مفتوح

واذا عندكم يهال بتلقون بغرفتكم هالاشياء 🙂

لتفاصيل اكثر عن الفندق – اضغط هـنــا