هالسنة عيدنا مبچر مع هدية حلوة من مخبز كرمز اللي اهدونا صينية لذيذه من كب كيك العيد بثلاث انواع الرد فيلفت والجوكليت والفانيلا
والاشكال تشوق عبارة عيدكم مبارك و عساكم من عواده وفيه بعد على دله و مبخر و وريدات بعد
For Order : 22636614 – 55278627
Instagram @ilovecrumbs
الاسبوع اللي طاف طلبت طلبيه فناجين من اكاونت بالانستغرام اسمه زوارتنا مختص بالكتابه على الاستكانات والفناجين والمطاطير
اخترت اللون الابيض للفناجين سيت كامل درزن و بلغتهم بالاسامي اللي ابيها
قالت لي الدرزن ب ١٧ دك و مع التوصيل ١٩ دك
وصلتني الطلبيه بعد ٣ ايام
شغلهم مرتب و الخط حلو
الشي الوحيد ان بعض الاسامي ماكتبتهم مثل ما ابي لاني قلت لها طيوبه وكتبت طيوب و فطومه كتبتها فطوم بس مو مهم لانه عجبني الشغل 🙂
For Order (WhatsApp) : 50632069
Instagram @Zwartnaa
اليوم غبقة المدونين كانت في المطعم اللبناني سطيحة
مكان جميل في مجمع نور الصالحيه خلف مطعم سم داي مقابل مجمع الصالحية بالدور الخامس
المكان وايد حلو وكبير و ديكوره غير عن المطاعم اللبنانيه التقليديه والوانه مريحه مادري ليش حسيت چني قاعدة بحديقه
استقبلونا بهالفاكهه الحلوة
المطعم من داخل
وهذي القعده بالسطيحه ؛) مادري البرنده
شوفوا الفيووو 🙂
يا زين الكويت زيناه
و يانا راعي الچلاب لذيذذذذ
وهم ماقصروا باشرونا مع القهوة العربيه والتمر
اهم كانوا مجهزين لنا سيت منيو لكن خلونا نشوف منيوهم
وطلبنا عصايرنا المنعشه .. ليمون بالنعناع و ليمون عادي
و وصل الخبز الحااار
و بعد فترة بدوا يقدمون المقبلات
اول شي وصل الحمص و المتبل و حمص سطيحه وبصراحه كل نوع احلى من الثاني وايد يازولنا
السلطات اكيد بتكون فتوش و تبوله
انا ذقت الفتوش وكان لذيذ
الورق عنب كان طيب
البطاطا حره عجييبه وايد استانست عليها
المقالي والمعجنات ذقت السبانخ كانت طيبه والبنات مدحوا رول الجبن
جبده دياي كانت زينه بس انا احبها اكثر بدبس الرمان تكون الذ
مطبقة دياي مع الخضار
ماذقناها مادري ما شوقتني
الطبق الرئيسي اللي وصلنا بس كباب باللبن والنعناع وكان زين بس بارد ولأنه الوقت تأخر ماقدرنا ننطر باقي الانواع
الغبقة كانت وايد حلوة و شفنا البلوقرز اللي من زمان ما شفناهم والمطعم حلو لكن العيب الوحيد كان الخدمة البطيئه جدا وان شاء الله يركزون عليهم
شكرا على الدعوة و موفقين
Tel : 22455000
Instagram @stayha
ومثل عادتهم كل سنة 🙂
وصلتنا دعوة لحضور مسرحية زين والوحش بعرض حصري خاص للمدونين
بانتظار العرض المميز يوم الثلاثا وان شاء الله ننقل لكم العرض بالصور فانتظرونا 🙂
ذكرى الخميس الاسود .. الغزو العراقي على الكويت
اللهم ارحم شهدائنا الابرار والشيخ جابر الاحمد والشيخ سعد العبدالله واغفر لهم واجعل قبورهم روضه من رياض الجنه
اللهم احفظ كويتنا واهلها من كل شر وآمنا وابعد عنا شر الفتن
واحفظ شيخنا صباح الاحمد وهيء له البطانه الصالحه والف بين قلوبنا يا ارحم الراحمين
لن ولم ننسى الغزو العراقي مهما مرت سنين
ولن ننسى وقفه امراء و اهل الخليج والاصدقاء الشرفاء الله يحفظ ديارهم ويامنهم في اوطانهم
كواليتي نت دائما دعاياتهم تكون غير وفيها شي من التميز عن غيرهم
دعاية العيد هالسنه شغل عدل وااااايد حبيتها يازينها ويازين ايام الطيبين 🙂
اتينن الدعاية