النوير حركة، هدفها نشر الوعي لرؤية الأمور بطريقة إيجابية في الكويت, يؤمنون بأنّ الإيجابية هي أسلوب حياة وطريق لبلوغ السعادة والرضى. وإحدى أهم النتائج التي توصّلت إليها البحوث العلمية في جامعة هارفرد هي أنّ السلوك الايجابي هو قرار يتّخذه الشخص نفسه, ومهمتهم هي أن يجعلوا الناس يدركوا هذه الحقيقة البسيطة ويلهموهم ليطبّقوها في حياتهم.

هل تعلم ان “نوير” هي مجموعة من خمس نباتات صحراوية تزهر في نفس الوقت وليست نبتة واحدة!

هذا الكلام قريته في الفيديو اللي شفته لهم قبل ما اروح .. لكن بعد ما دخلت المكان الخاص بمبادرة النوير فهمت الفيديو والكلام اللي فوق عدل 🙂

الطابق الارضي كانت مساحه يطغي عليها الاصفر وبعبارات ايجابيه على الحوائط والنوافذ وحتى السلم

اما الطابق الاول فكان اهو المركز الاساسي 🙂

نركب فوق علشان نطبق 9 تمارين مثبت علمياً انها تجعل الشخص يبتسم ويشعر بأنه افضل وتشجع على الايجابيه ورأية الامور من زوايا متعدده 

وقبل لا تبدون اي تمرين راح يكون هناك فلاير او نشره فيها معلومات عن التمرين والهدف منه وتأثيره على الشخص

اول ما صعدنا كان فيه مظلات صفراء 

وفسروا في الفلاير وجود اللون الاصفر اللي يطغي على المكان انه اكثر الالوان فرحاً في مجموعه الالوان ويرتبط بالسعادة والذكاء والطاقة ويحفز العمل الذهني وينتج الطاقة العضليه وينشط الذاكره 

التمرين الثاني كان كلمة نو من زاوية ونو من زاوية اخرى وهالشي يبين لنا ان اي امر سلبي له ناحية ايجابيه فنظرتك انت للامور هي المقياس ففيها ترى نفسك والعالم من حولك فأنت تتحكم بهذه الخيارات وبيدك ان تخلق سعادتك

وصلنا للبالونات وعلى ورقة كتبنا كل ما يقلقنا الفترة المقبلة وعلقناها على البالونه وفتحنا الدريشة وسمينا بالرحمن وطيرنا كل ما يقلقنا اكيد بعد الاستعانه بالله

باي يا القلق 🙂

ليمونتي خذيتها من رقم 4 وليلحين حاطتها يمي على الدرج بس ناويه اعصرها على كوب سفن اب لأنها ما تكفي الليموناده 🙂

تمرين قلم الرصاص لما تحطونه في حلجكم يحرك العضلات اللي نحركها واحنا نبتسم  ممل يحول مسار تدفق الدم نحو الدماغ وهذا يحفز الشعور بالسعاده لديكم يعني هالابتسامه الجذابه اللي ترتسم على حلوجنا لما نحط القلم فيه يمكن تؤدي الى شعور بسعاده حقيقية 

BBC وهالكلام مصدره مايكل موسلي من قناة ال

ويا حلو الشيخه انتصار الصباح واريج الخرافي واهم يبتسمون 🙂 بس ابتسامتهم وايد احلى بدون الاقلام

ابتسم واختار عنصر وساهم في رسم الابتسامه

Smile and live PINK

ابتسم وعيش ترى الحياه وردية مو سعاد حسني قالت الحياة بآ لونها بمبي 😀 

محطة الازهار تقول التقطني وفرح شخصاً في هذا المكان .. بصراحه انا التقطتها وفرحت عمري احب الورد هههههه

ورسمت هبي فيس يضحك لأني احب هالويهه جداً متفائل

واخر مهمه حطيت لايك لكل التمارين اللي شاركت فيهم لأني صج استانست وعجبوني

وتعهدت اني انشر الايجابيه واكون شخص ايجابي واخفف تحلطم واشوف الحياه من عدة زوايا قبل لا اتحلطم وببدي برفيجاتي تزهبوا ههههههه 

اشكر الشيخه انتصار الصباح على هالفكره الرائعه والتفكير الايجابي الجميل عسى الله يوفقج انتي وكل اللي معاج وتنشرون هالفكره اكثر واكثر ونشوف شعب ايجابي 100% ومبتسم ويشوف المستقبل مشرق .. اسعدتني زيارتكم ومشكورين جداً على الدعوه

اللي يحب يزور المكان اهو مفتوح للعموم بالسالمية قطعه 7 منزل 51 مقابل مطعم قصر النخيل

Instagram & Twitter @alnowair