آخر روحه لي للخيران كانت ب ٢٠١٢ يعني قبل سنتين
وكتبت بوست عن هالشي – اضغط هنـا
وكنت داشه مع اسرة رفيجتي من اول يوم وبدون سيارتي فما اعرف شنو اساسيات الزياره للمنتزه
هالمره غير لاني يايه زياره فقط وصلت تقريبا بال ١ عند البوابه الاساسيه وقالولي انه بوابة الزوار غير وعلموني مكانها
رحت مكان الدخول فقالي الموظف انه لازم ندفع على الشخص ٥ دك رسوم دخول المنتزه وهالشي طبيعي وجود رسوم
و ٥٠ دك للتأمين ونستلمها عند الطلعه الساعه ١٠ م كحد اقصى
انا هالشي يديد علي مادري فيه رسوم تأمين اشوه انهم حاطين مكينة سحب عند البوابه الرئيسيه فإضطريت ارجع اسحب
المهم اللي يايب اغراض لازم ايون ياخذونه مع قشه من عند مواقف الزوار وهذا اللي سوته ابراري
الحمدلله اليوم الجو زين ماكو رطوبه
طبعا وصلنا حزة غدا فيزاها الله خير ام فيصل طابخه لنا خوش مرق عدس ومشخووول
لذيذذذذ
هذي ابرار تنچب الغدا
طبخه خنينه صراحه تسلم ايدج ايمان
وكان بخاطري صراحه اسبح فحاسبه حسابي ويايبه مايوهي الاسلامي اللي اسميه يمشي على الدانه ههههه
بصراحه من البسه احس نفسي قبقب بس ميخالف الستر زين والله يرزقنا الجنه 🙂
كشخت كشخة البحر وهذا انا بالطريق للشاطيء عشتوا
المره اللي طافت قبل سنتين ماسبحت فما ادري شلون قايل البحر هناك
انصدمت بصراحه وضاعت احلامي الزرقه اني استمتع ببحر سنع
البحر خااااابط ولما ادوس بالبحر اشياء تترخوط استغفر الله مادري شنو
هذا غير الوصاخه وبقايا الجياسه مادري ليش هالاوادم قلقين 🙁
X بعد عوع حطيت على السباحه بالخيران
حلاته بالشتا تمشي وقواري وبلعه وبس
وانا بالبحر لچحت هالرحله ام دينار
الله يديم الرخص 🙂
ووصل الرقي البارد المقصص
يعل ربي يبرد على قلبج بكل شي زين وحلو يا برور
الساعه ٧ ونص شلت شلايلي وتوكلت على الله
شكرا بروره وايد استانست معاكم مجابلكم ماينمل بدون سبااااحه هههههه
