معرض الكتاب من الاماكن اللي انطرها من سنه لي سنه علشان اخذ بعض الروايات والكتب اللي استمتعت فيها بوقت الفراغ
واحرص على مؤلفين معينين اخذ اصداراتهم الجديده كل سنه

دور النشر كثيره منها القديمه والجديده من الكويت واخرى من الخليج والدول العربيه
بالنسبه لي اول الكتب اللي احرص اخذها اول ما ادخل المعرض هي الاصدارات الجديده للكاتب عبدالوهاب السيد وعنده هالسنه اصدارين حالات نادره ٣ والابعاد المجهوله ٣

الاخ المهندس عبدالوهاب السيد مع اصداراته وتوقيعه على نسختي من الاصدارات الجديده

هالسنه كان عدد الزوار فضيع كل سنه اروح ما اشوف هالزحمه الخياليه !! استغربت مقولة احنا شعب لا يقرأ ! عيل هالناس شتسوي ؟ معقوله يايين حق الذره مثل مسجلت الطنازه اللي دزوها بالواتس اب !
هالسنه شفت ناس ماشاء الله عليهم مضبطين شغلهم عدل وحتى الجناط اللي تندز يايبينها معاهم

حبيت الخدمه اليديده اللي مقدمينها واهو وجود اشخاص لابسين ڤيست مكتوب عليه اسألني ! تقدرون تسألونهم عن اي كتاب او دار نشر او اي سؤال يخص المعرض

وهم التطبيق اللي منزلينه على الآب ستور زين مع انه مو ١٠٠٪ مفيد لانه حطيت وايد اسلمي كتب ماطلعتلي لكن المحاوله حلوه

وانا اتمشى شفت بعض الكتب باسماء غريبه شدتني واخرى حبيتها .. اعترف انا وايد يشدني العنوان 🙂

ذات السلاسل كانوا حاطين مكان للتصوير للذكرى كأفضل كاتب

وموفرين سلة من كرتون لها عجلات تقدرون تحطون اغراضكم وتدزونها جزاهم الله خير

نادي الاطفال

معرض للصور الفوتوغرافيه واللوحات التشكيليه

والمكان اللي قومت سوقه مسجات الواتس اب :p

خوش ايس كريم 🙂

وبالنهايه هذي حصلتي لهالسنه بواقع زيارتين 🙂

اليوم اخر يوم للمعرض 🙁 كان المفروض انزل البوست ابچر شوي لكني كنت كسلانه شويونه بس اكيد بتحصلون الاصدارات في المكتبات ان شاء الله 🙂