من المطاعم اللي فتحت في الافنيوز وتحديداً في السوق مطعم اسمه كاشونة البيت
كاشونة كلمة كويتية قديمه وهي عباره عن قطعه في البيت الكويتي القديم طولها من 20 الى 30 سم وعرضها من 7 الى 15 سم وتصنع من سعف النخيل وتستخدم لحفظ الاكل وتعلق في الممر او مايسمى قديماً الليوان
المطعم كبير ما شاء الله ويتكون من قسمين
قسم خاص للغداء والعشاء للعيوش وربعهم
الديكور والالوان جميلة جداً وحبيت انهم مدخلين التراث بالكلاسيك والمودرن مزج وخلطه جميلهالسري اتينن
صوت السهارى يوم مروا عليه عصرية العيد 🙂الفرن والمناقيش عند هالطيب
الويترز لبسهم مرتب
رحنا الساعه 10 صباحاً فترة الريوق واخترنا الطاولة على راحتنا قبل الزحمه
المنيو يشوق والحزاية اللي مكتوبه بأول صفحه ذكرتني بحبابة الله يرحمها 🙂
طلبنا حليبه بالزعفران لذيذة وخنينه والكوب معدن مال اول 🙂ووصلت صينية ريوق المعاريس فيها مربى ولبنه وجبنة الكاشونه وجبدة مشوية وعسل وقيمر وبقصم ودرابيل
وطلبنا بيض طماط توقعناه سكرامبل نفس الشكشوكة بس طلع اومليت وحسافه ماحسيت بالطماط كلش جنه بيضه ساده
سلة الخبز الايراني الحااااااااار من التنور لي الطاولة
لقمه هنية تكفي ميه 🙂
وبعد ما خلصنا وطلبنا الفاتوره يابوها لنا مع
برميت 🙂
Kashounat Al Bait Located in The Avenues, Phase 3, The Souk
Instagram @KashounatAlbait